ನಾನೊಬ್ಬ ಸ್ಲಮ್‌ಡಾಗ್‌: ಬಾಕ್ಸರ್‌ ಟೈಸನ್‌!

ಮುಂಬಯಿ: ಭಾರತ ಪ್ರವಾಸದಲ್ಲಿರುವ ಅಮೆರಿಕದ ಖ್ಯಾತ ಬಾಕ್ಸರ್‌ ಮೈಕ್‌ ಟೈಸನ್‌, ತಮ್ಮನ್ನು “ಸ್ಲಮ್‌ಡಾಗ್‌’ ಎಂದು ವರ್ಣಿಸಿಕೊಂಡಿದ್ದಾರೆ. ಮುಂಬಯಿಯಲ್ಲಿ ಪತ್ರಿಕಾಗೋಷ್ಠಿ ನಡೆಸಿದ ಟೈಸನ್‌, “ಖ್ಯಾತ ಬಾಕ್ಸರ್‌ಗಳೆಲ್ಲ ಕೊಳಚೆ ಪ್ರದೇಶಗಳಿಂದ ಬಂದಿದ್ದಾರೆ. ಪ್ರಸ್ತುತ ಎಲ್ಲ ಅಗ್ರ ಬಾಕ್ಸರ್‌ಗಳು ಕೊಳಚೆ ಪ್ರದೇಶದವರು. ನೀವೆಷ್ಟು ಬಡವರಾಗಿರುತ್ತೀರೋ, ಅಷ್ಟೇ ಒಳ್ಳೆಯ ಬಾಕ್ಸರ್‌ಗಳಾಗುತ್ತೀರಿ’ ಎಂದರು.

“ಸ್ಲಮ್‌ಡಾಗ್‌ ಮಿಲಿಯನೇರ್‌’ ಎಂಬುದು ಹಾಲಿವುಡ್‌ ಸಿನಿಮಾ. ಮುಂಬಯಿಯ ಕೊಳಚೆ ಪ್ರದೇಶದ ಬಾಲಕನೊಬ್ಬನ ಜೀವನವನ್ನಾಧರಿಸಿ ಇದನ್ನು ತಯಾರಿಸಲಾಗಿತ್ತು. ಇದಕ್ಕೆ ಆಸ್ಕರ್‌ ಪ್ರಶಸ್ತಿ ಕೂಡ ಲಭಿಸಿತ್ತು. ಇದೇ ಕಾರಣಕ್ಕೆ ಟೈಸನ್‌ ಸ್ಲಮ್‌ಡಾಗ್‌ ಪದ ಪ್ರಯೋಗ ಮಾಡಿದ್ದಾರೆ. “ನಾನೊಬ್ಬ ಸ್ಲಮ್‌ಡಾಗ್‌, ಕೊಳಚೆ ಪ್ರದೇಶದಲ್ಲಿ ಬೆಳೆದೆ. ಆ ಪ್ರದೇಶದ ಹೊರಬರುವ ಮಹತ್ವಾಕಾಂಕ್ಷೆ ನನ್ನಲ್ಲಿತ್ತು. ಅದೇ ಕಾರಣಕ್ಕೆ ನಾನಿಲ್ಲಿದ್ದೀನಿ’ ಎಂದು ಟೈಸನ್‌ ಹೇಳಿಕೊಂಡರು.