ಇಡಾ ಚಂಡಮಾರುತ ಹಾವಳಿಯಿಂದ 46 ಸಾವು : ನ್ಯೂಯಾರ್ಕ್‌ನಲ್ಲೇ 26 ಸಾವು

ನ್ಯೂಯಾರ್ಕ್‌: ಅಮೆರಿಕದಲ್ಲಿ ಇಡಾ ಚಂಡಮಾರುತ, ದೇಶದ ಈಶಾನ್ಯ ಭಾಗದ ಆರು ಪ್ರಾಂತ್ಯಗಳಲ್ಲಿ ಅನಾಹುತಕ್ಕೆ ಕಾರಣವಾಗಿದೆ. ಮೇರಿಲ್ಯಾಂಡ್‌, ಕನೆಕ್ಟಿಕಟ್‌, ವರ್ಜೀನಿಯಾ, ಲೂಸಿಯಾನಾ, ಮಿಸಿಸಿಪ್ಪಿ, ನ್ಯೂಯಾರ್ಕ್‌ ಪ್ರಾಂತ್ಯಗಳು ಹೆಚ್ಚು ಹಾನಿಗೊಳಗಾದ ಪ್ರಾಂತ್ಯಗಳು. ನ್ಯೂಯಾರ್ಕ್‌ನಲ್ಲಿ 26 ಮಂದಿ ಜನ, ಮೇರಿಲ್ಯಾಂಡ್‌, ಕನೆಕ್ಟಿಕಟ್‌ ಹಾಗೂ ವರ್ಜೀನಿಯಾದಲ್ಲಿ ತಲಾ ಒಬ್ಬರು ಸಾವನ ಪ್ಪಿದ್ದಾರೆೆ. ಮತ್ತೂಂದೆಡೆ, ನ್ಯೂಯಾರ್ಕ್‌ ಮತ್ತು ನ್ಯೂಜೆರ್ಸಿಯಲ್ಲಿ ಪರಿಸ್ಥಿತಿ ಮತ್ತಷ್ಟು ವಿಕೋಪಕ್ಕೆ ಹೋಗುವ ಸಾಧ್ಯತೆಗಳನ್ನು ಮನಗಂಡಿರುವ ಅಮೆರಿಕ ಸರಕಾರ, ಆ ಪ್ರಾಂತ್ಯಗಳಲ್ಲಿ ತುರ್ತು ಪರಿಸ್ಥಿತಿ ಘೋಷಿಸಿದೆ.

ಜನಜೀವನ ತತ್ತರ : ಇಡಾ ಚಂಡಮಾರುತದ ಪರಿಣಾಮವಾಗಿ, ಲೂಸಿಯಾನಾದಲ್ಲಿ ಜನರ ಜೀವನ ಅಸ್ತವ್ಯಸ್ತವಾಗಿದೆ. ಅಲ್ಲಿ ಒಂದೆರಡು ದಿನಗಳಿಂದ ವಿದ್ಯುತ್‌ ಇಲ್ಲ, ಕುಡಿಯಲು ಶುದ್ಧ ನೀರೂ ಸಿಗುತ್ತಿಲ್ಲ. ಗಂಟೆಗೆ 240 ಕಿ.ಮೀ.ನಷ್ಟು ರಭಸವಾಗಿ ಸಾಗುತ್ತಿರುವ ಚಂಡಮಾರುತ, ಈ ಪ್ರಾಂತ್ಯಗಳಿಗೆ ವಿದ್ಯುತ್‌ ಪೂರೈಸುತ್ತಿದ್ದ ದೈತ್ಯ ವಿದ್ಯುತ್‌ ಕಂಬಗಳನ್ನು ಬುಡಮೇಲು ಮಾಡಿದ್ದರಿಂದ ಎಂದು ಲೂಸಿಯಾನಾ, ಮಿಸಿಸಿಪ್ಪಿ, ನ್ಯೂ ಆರ್ಲಿಯನ್ಸ್‌ ಪ್ರಾಂತ್ಯಗಳಲ್ಲಿನ ಸುಮಾರು 10 ಲಕ್ಷ ಮನೆಗಳು ಹಾಗೂ ಕಾರ್ಖಾನೆಗಳಿಗೆ ವಿದ್ಯುತ್‌ ಸರಬರಾಜು ನಿಂತು ಹೋಗಿದೆ.

ನೀರು ಶುದ್ಧೀಕರಣ ಘಟಕಗಳಿಗೆ ನೀರು ನುಗ್ಗಿದ್ದರಿಂದಾಗಿ ಕುಡಿಯುವ ನೀರಿನ ಸರಬರಾಜು ಕೂಡ ನಿಂತು ಹೋಗಿದೆ ಎಂದು “ಅಸೋಸಿಯೇಟೆಡ್‌ ಪ್ರಸ್‌’ ತಿಳಿಸಿದೆ. ಇನ್ನು, ರಸ್ತೆಗಳಲ್ಲೆಲ್ಲ ನೀರು ನಿಂತು ವಾಹನ ಸಂಚಾರವೂ ನಿಲುಗಡೆಯಾಗಿದ್ದು ಅಗತ್ಯ ವಸ್ತುಗಳ ಪೂರೈಕೆಯಲ್ಲೂ ವ್ಯತ್ಯಯ ಉಂಟಾಗಿದೆ.