ಟಿ20: ಸ್ಮತಿ ಮಂಧನಾ ವಿಶ್ವ ನಂ.2

ದುಬೈ: ಇಂಗ್ಲೆಂಡ್‌ ಪ್ರವಾಸದಲ್ಲಿ ಉತ್ತಮ ಪ್ರದರ್ಶನ ಕಾಯ್ದುಕೊಂಡು ಬಂದಿರುವ ಓಪನರ್‌ ಸ್ಮತಿ ಮಂಧನಾ ನೂತನ ಟಿ20 ಹಾಗೂ ಏಕದಿನ ಬ್ಯಾಟಿಂಗ್‌ ರ್‍ಯಾಂಕಿಂಗ್‌ನಲ್ಲಿ ಉತ್ತಮ ಪ್ರಗತಿ ಸಾಧಿಸಿದ್ದಾರೆ.

ಟಿ20ಯಲ್ಲಿ ದ್ವಿತೀಯ ಸ್ಥಾನಕ್ಕೆ ಏರಿದ್ದಾರೆ. ಇದು ಅವರ ಸರ್ವಶ್ರೇಷ್ಠ ರ್‍ಯಾಂಕಿಂಗ್‌ ಆಗಿದೆ. ಇಂಗ್ಲೆಂಡ್‌ ಎದುರಿನ 3 ಪಂದ್ಯಗಳ ಟಿ20 ಸರಣಿಯಲ್ಲಿ ಸ್ಮತಿ ಮಂಧನಾ 111 ರನ್‌ ಹೊಡೆದಿದ್ದರು. ಬಳಿಕ ಮೊದಲ ಏಕದಿನ ಪಂದ್ಯದಲ್ಲಿ 91 ರನ್‌ ಬಾರಿಸಿ ಇಲ್ಲಿಯೂ ರ್‍ಯಾಂಕಿಂಗ್‌ ಪ್ರಗತಿ ಕಂಡರು. ಏಕದಿನ ರ್‍ಯಾಂಕಿಂಗ್‌ನಲ್ಲಿ ಅವರಿಗೀಗ 7ನೇ ಸ್ಥಾನ.

ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಟಿ20 ಬ್ಯಾಟಿಂಗ್‌ ರ್‍ಯಾಂಕಿಂಗ್‌ನಲ್ಲಿ ಒಂದು ಸ್ಥಾನ ಮೇಲೇರಿದ್ದಾರೆ (14). ಏಕದಿನ ರ್‍ಯಾಂಕಿಂಗ್‌ನಲ್ಲಿ ಅವರದು 4 ಸ್ಥಾನಗಳ ನೆಗೆತ (9). ಮೊದಲ ಏಕದಿನದಲ್ಲಿ ಮಿಂಚಿದ ವಿಕೆಟ್‌ ಕೀಪರ್‌ ಯಾಸ್ತಿಕಾ ಭಾಟಿಯಾ ಅವರದು ಬರೋಬ್ಬರಿ 8 ಸ್ಥಾನಗಳ ನೆಗೆತ (37).  ಬೌಲರ್‌ಗಳಾದ ರೇಣುಕಾ ಸಿಂಗ್‌ ಮತ್ತು ರಾಧಾ ಯಾದವ್‌ ಟಿ20 ರ್‍ಯಾಂಕಿಂಗ್‌ನಲ್ಲಿ ಕ್ರಮವಾಗಿ 10ನೇ ಹಾಗೂ 14ನೇ ಸ್ಥಾನಕ್ಕೆ ಬಂದಿದ್ದಾರೆ.