ರ್‍ಯಾಂಕಿಂಗ್‌: 11ನೇ ಸ್ಥಾನಕ್ಕೇರಿದ ಭುವನೇಶ್ವರ್‌

ದುಬಾೖ: ಇಂಗ್ಲೆಂಡ್‌ ಎದುರಿನ ಸರಣಿ ಮೂಲಕ ಭರ್ಜರಿ ಪುನರಾಗಮನ ಸಾರಿದ ಭುವನೇಶ್ವರ್‌ ಕುಮಾರ್‌ ನೂತನ ಐಸಿಸಿ ಏಕದಿನ ಬೌಲಿಂಗ್‌ ರ್‍ಯಾಂಕಿಂಗ್‌ನಲ್ಲಿ 9 ಸ್ಥಾನಗಳ ಪ್ರಗತಿ ಸಾಧಿಸಿ 11ನೇ ಸ್ಥಾನಕ್ಕೆ ಏರಿದ್ದಾರೆ. 3 ಪಂದ್ಯಗಳಿಂದ ಭುವಿ 6 ವಿಕೆಟ್‌ ಉರುಳಿಸಿದ್ದರು. ಅಂತಿಮ ಪಂದ್ಯದಲ್ಲಿ 42ಕ್ಕೆ 3 ವಿಕೆಟ್‌ ಕಿತ್ತು ಭಾರತದ ಜಯದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

ಕೊನೆಯ ಮುಖಾಮುಖೀಯಲ್ಲಿ 4 ವಿಕೆಟ್‌ ಕೆಡವಿದ ಶಾರ್ದೂಲ್‌ 93ರಿಂದ 80ನೇ ಸ್ಥಾನಕ್ಕೆ ಏರಿದ್ದಾರೆ.

ಕೊಹ್ಲಿಯೇ ನಂ.1 :

ವಿರಾಟ್‌ ಕೊಹ್ಲಿ ಬ್ಯಾಟಿಂಗ್‌ ವಿಭಾಗದ ಅಗ್ರಸ್ಥಾನ ಕಾಯ್ದುಕೊಂಡಿದ್ದಾರೆ. ಇಂಗ್ಲೆಂಡ್‌ ಎದುರಿನ ಸರಣಿಯ ಮೊದಲೆರಡು ಪಂದ್ಯಗಳಲ್ಲಿ 56 ಮತ್ತು 66 ರನ್‌ ಬಾರಿಸಿದ ಕೊಹ್ಲಿ 870 ಅಂಕ ಹೊಂದಿದ್ದಾರೆ. ಸರಣಿಯಲ್ಲಿ ಅಮೋಘ ಬ್ಯಾಟಿಂಗ್‌ ಪ್ರದರ್ಶಿಸಿದ ಕೆ.ಎಲ್‌. ರಾಹುಲ್‌ 31ರಿಂದ 27ಕ್ಕೆ ಬಂದಿದ್ದಾರೆ. ಆಲ್‌ರೌಂಡರ್‌ ಹಾರ್ದಿಕ್‌ ಪಾಂಡ್ಯ ಮತ್ತು ವಿಕೆಟ್‌ ಕೀಪರ್‌ ರಿಷಭ್‌ ಪಂತ್‌ ಕೂಡ ರ್‍ಯಾಂಕಿಂಗ್‌ ಪ್ರಗತಿ ಕಂಡಿದ್ದಾರೆ.