ನಾ ಏನೆಂದು ಬರೆಯಲಿ ಹೇಳು? ಈ ಹೃದಯ ಬರೆಯುವ ಕವನದಲ್ಲಿ ಭಾವನೆಗಳು ನೂರಾರು, ಭಾವನೆಗಳ ಮಡಿಲಿನಲ್ಲಿ ಕನಸುಗಳು ಹಲವಾರು. ನಾ ಕಂಡ ಕನಸಿಗೆ ಜೊತೆಯಾದವ ನೀನು. ನೆನಪಿದೆಯಾ ಗೆಳೆಯ? ನನ್ನೊಂದಿಗೆ ಸ್ನೇಹ ಬೆಳೆಸಲು, ನಿನ್ನ ಫೋನ್‌ನಂಬರ್‌ ಅನ್ನು ಚೀಟಿಯಲ್ಲಿ ಬರೆದು, ನಾ ಬರುವ ರೋಡಿನಲ್ಲಿ ಎಸೆದು ಹೋಗಿದ್ದೆ. ಅದನ್ನು ನಾನು ನೋಡಿಯೂ ನೋಡದಂತೆ ಹಾಗೆಯೇ ಇಟ್ಟು ದಿನಾ ನಿನಗೆ ಬೇರೆ- ಬೇರೆ ನಂಬರ್‌ಗಳಿಂದ ಮಿಸ್ಡ್ಕಾಲ್‌ ಕೊಟ್ಟು ಆಟವಾಡಿಸುತ್ತಿದ್ದೆ ಅಲ್ವಾ? ಅಂತೂ- ಇಂತೂ ಒಂದಿನ ಮರೆಯಲ್ಲಿ ನಿಂತು ಮಿಸ್ಡ್ಕಾಲ್‌ ಬಂದಾಗ ರಿಸೀವ್‌ ಮಾಡಿ ಕಂಡು ಹಿಡಿದಿºಟ್ಟೆ !
Advertisement
ನೀನೇನೂ ಅತಿ ಸುಂದರನಲ್ಲ. ತುಂಬಾ ಓದಿಕೊಂಡವನೂ ಇಲ್ಲ. ಆದರೂ ಗೊತ್ತಿಲ್ಲದಂತೆ ನನ್ನನ್ನು ಗೆದ್ದುಬಿಟ್ಟೆ. ಹತ್ತಿರದಲ್ಲೇ ಸ್ನೇಹಿತರೆಲ್ಲರೂ ಟ್ರಿಪ್‌ ಹೋಗೋಣ ಅಂತ ಹೇಳಿ ಗೋಪಾಲಸ್ವಾಮಿ ಬೆಟ್ಟಕ್ಕೆ ಕರೆದುಕೊಂಡು ಹೋಗಿದ್ದೇ ನಿನ್ನ ಜೊತೆ ಪ್ರೀತಿಯಲ್ಲಿ ಬೀಳಲು ಕಾರಣವಾಯಿತು. ನನ್ನ ಜೀವನದಲ್ಲಿ ಅದೇ ಮೊದಲ ದೂರ ಪ್ರಯಾಣ. ಅದೂ ಒಬ್ಬ ಹುಡುಗನ ಜೊತೆ. ಅಂದು ನಿನಗಾಗಿ ನಾ ಬರೆದ ಕವನ…
ಜೊತೆಯಲ್ಲಿದ್ದ ನನ್ನ ಗೆಳೆಯ
ಆ ದಿನ ಹೊಸ ಅನುಭವದ ಸಮಯ
ಸ್ವಲ್ಪ ನನಗಾಗುತ್ತಿತ್ತು ಭಯ…
ಆ ಹಸಿರಿನ ಪರಿಸರದಲ್ಲಿ ನಿನ್ನೊಡನೆ ಬೈಕಿನಲ್ಲಿ, ಬೆಟ್ಟ ಗುಡ್ಡಗಳ ಮಧ್ಯೆ ನಿನ್ನೊಡನೆ ನಾನಿದ್ದೆ. ಆಗಲೇ ನೀ ನನ್ನ ಮನಸ್ಸನ್ನು ಕದ್ದಿದ್ದೆ. ನನ್ನ ಹುಟ್ಟಿದ ದಿನದಂದು ನೀ ಕೊಟ್ಟ ಸೀರೆ, ಗೊಂಬೆ, ಮುಂಗಾರು ಮಳೆ ವಾಚು- ಇವು ನನಗೆ ಅತ್ಯಮೂಲ್ಯ ಮಾಣಿಕ್ಯ ಕಣೋ!
ಇಂದಿಗೆ 5 ವರ್ಷ ನಮ್ಮ ಪ್ರೀತಿಗೆ. ಮನೆಯವರಿಗೆ ನಮ್ಮ ಪ್ರೀತಿಯ ಸುಳಿವೇ ಗೊತ್ತಾಗದಂತೆ ನೋಡಿಕೊಂಡೆವು. ನಮ್ಮ ಓದು, ಕೆಲಸ ಎಲ್ಲವೂ ಅವರ ಇಷ್ಟದಂತಾಯಿತು. ನಿಮ್ಮ ಮನೆಯವರು ನನ್ನನ್ನು ಒಪ್ಪಿದ ಹಾಗೆ, ನಮ್ಮ ಮನೆಯಲ್ಲೂ ನಿನ್ನನ್ನು ಒಪ್ಪಿದರೆ ಸಾಕು ಎಂದು ಪ್ರಾರ್ಥಿಸುತ್ತೇನೆ. ಮುಂದೆ ಯಾವುದೇ ಕಾರಣಕ್ಕೂ ನನ್ನ ಮೇಲೆ ಕೋಪ ಮಾಡಿಕೊಳ್ಳಬೇಡವೋ. ಯಾಕೆಂದರೆ ನಿನ್ನದು ಭಯಂಕರ ಕೋಪದ ವ್ಯಕ್ತಿತ್ವ ಕಣೋ… ಆದರೂ ಇಷ್ಟ ಆಗುತ್ತೀಯಾ, ಯಾಕೆ ಗೊತ್ತಾ? ನೀನು ನನ್ನನ್ನು ನೋಡದೇ ಕೆಲಸಕ್ಕಾಗಲೀ, ಮನೆಗಾಗಲೀ ಹೋಗುವುದೇ ಇಲ್ಲ. ಎಷ್ಟೊತ್ತಾದರೂ ನಮ್ಮ ಮನೆಯ ಮುಂದೆ ನಿಂತು, ಫೋನ್‌ ಮಾಡಿ ನೋಡಿಕೊಂಡು ಐ ಲವ್‌ ಯೂ ಅಂತ ಹೇಳಿದರೇನೇ ನಿನ್ನ ದಿನ ಪೂರ್ತಿ ಆಗೋದು ಅಲ್ವಾ? ಈ ಐ ಲವ್‌ ಯು ಎಂಬುದನ್ನು ನಾವು ದಿನದಲ್ಲಿ ಎಷ್ಟು ಸಲ ಹೇಳುತ್ತೀವೋ ಲೆಕ್ಕ ಇಲ್ಲ ಅಲ್ವಾ? ಲೋ, ಮುಖ್ಯವಾದ ಒಂದು ವಿಷಯಾನೇ ಮರೆತಿದ್ದೆ ಕಣೋ, ಐ ಲವ್‌ ಯು. ನಾನು ನಿನ್ನ ತುಂಬಾ ತುಂಬಾ ಪ್ರೀತಿಸ್ತೀನಿ ಕಣೋ. ಎಷ್ಟು ಅಂದ್ರೆ, ಮಗುವಿನ ಥರ. ನಿನಗೆ ಗೊತ್ತಾ? ನಮ್ಮನ್ನು ದೂರ ಮಾಡಲು ದೊಡ್ಡ ಕಾರಣ ಬೇಕು. ಆದರೆ, ನಾವಿಬ್ಬರೂ ಸನಿಹ ಸೇರಲು ಸಣ್ಣ ನೆಪ ಸಾಕು… ಹಣವನ್ನು ಯಾರು ಬೇಕಾದರೂ ಸಂಪಾದಿಸಬಹುದು. ಆದರೆ, ಪ್ರೀತಿಯನ್ನು ಹಣ ಕೊಟ್ಟು ಖರೀದಿಸಲು ಸಾಧ್ಯವಿಲ್ಲ ಅಲ್ವಾ? ನನ್ನಷ್ಟು ನಿನ್ನನ್ನು ಇಷ್ಟಪಡೋರು ಯಾರೂ ಇಲ್ಲ ಕಣೋ… ನೆನಪಿರಲಿ!
ಇಂತಿ ನಿನ್ನ ಪ್ರೀತಿಯ
ಜೀವನದ ಸಂಗಾತಿ ಗೆಳತಿ