Asia Cup Super 4: ಬಾಂಗ್ಲಾವನ್ನು 21 ರನ್ನುಗಳಿಂದ ಸೋಲಿಸಿದ ಶ್ರೀಲಂಕಾ

ಕೊಲಂಬೊ: ಸದೀರ ಸಮರವಿಕ್ರಮ ಮತ್ತು ಬೌಲರ್‌ಗಳ ನಿಖರ ದಾಳಿಯ ನೆರವಿನಿಂದ ಶ್ರೀಲಂಕಾ ತಂಡವು ಏಷ್ಯಾ ಕಪ್‌ ಸೂಪರ್‌ -4 ಹಂತದ ಪಂದ್ಯದಲ್ಲಿ ಬಾಂಗ್ಲಾದೇಶವನ್ನು 21 ರನ್ನುಗಳಿಂದ ಸೋಲಿಸಿದೆ.

ನಾಯಕ ದಾಸುನ್‌ ಶಣಕ, ಸ್ಪಿನ್ನರ್‌ ತೀಕ್ಷಣ ಮತ್ತು ಮತೀಶ ಪತಿರಣ ಅವರ ಅಮೋಘ ಬೌಲಿಂಗ್‌ ದಾಳಿಯಿಂದಾಗಿ ಬಾಂಗ್ಲಾದೇಶವು 236 ರನ್ನಿಗೆ ಆಲೌಟಾಗಿ ಸೋಲನ್ನು ಒಪ್ಪಿಕೊಂಡಿತು. ಈ ಮೊದಲು ಶ್ರೀಲಂಕಾ ತಂಡವು ಸಮರವಿಕ್ರಮ ಅವರ ಹೋರಾಟದ 93 ರನ್‌ ನೆರವಿನಿಂದ 9 ವಿಕೆಟಿಗೆ 257 ರನ್ನುಗಳ ಉತ್ತಮ ಮೊತ್ತ ಪೇರಿಸಿತ್ತು.

ಸತತ ಎರಡನೇ ಸೋಲು ಕಂಡ ಬಾಂಗ್ಲಾದೇಶವು ಫೈನಲಿಗೇರುವ ದಾರಿ ಕಠಿನವಾಗಿದೆ. ಸೂಪರ್‌ 4 ಹಂತದ ಮೊದಲ ಪಂದ್ಯದಲ್ಲಿ ಬಾಂಗ್ಲಾದೇಶವು ಪಾಕಿಸ್ಥಾನಕ್ಕೆ 7 ವಿಕೆಟ್‌ಗಳಿಂದ ಶರಣಾಗಿತ್ತು. ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಲಂಕೆಗೆ ಅಬ್ಬರದ ಆರಂಭ ಸಾಧ್ಯವಾಗಲಿಲ್ಲ. ದಿಮುತ್‌ ಕರುಣಾರತ್ನೆ 18 ರನ್‌ ಮಾಡಿ ಔಟಾದರು.

ಸಂಕ್ಷಿಪ್ತ ಸ್ಕೋರ್‌
ಶ್ರೀಲಂಕಾ-9 ವಿಕೆಟಿಗೆ 257 (ಸಮರವಿಕ್ರಮ 93, ಮೆಂಡಿಸ್‌ 50, ನಿಸ್ಸಂಕ 40, ಶಣಕ 24, ಹಸನ್‌ ಮಹ್ಮದ್‌ 57ಕ್ಕೆ 3, ಟಸ್ಕಿನ್‌ ಅಹ್ಮದ್‌ 62ಕ್ಕೆ 3, ಶೊರೀಫುಲ್‌ ಇಸ್ಲಾಮ್‌ 48ಕ್ಕೆ 2); ಬಾಂಗ್ಲಾದೇಶ 48.1 ಓವರ್‌ಗಳಲ್ಲಿ 236 (ಮೆಹಿದಿ ಹಸನ್‌ ಮಿರಾಜ್‌ 28, ಮುಶ್ಫಿಕರ್‌ ರಹೀಂ 29, ತೌಹಿದ್‌ ಹೃದಯ್‌ 82, ಶಣಕ 28ಕ್ಕೆ 3, ತೀಕ್ಷಣ 69ಕ್ಕೆ 3, ಪತಿರಣ 58ಕ್ಕೆ 3).