ವಜ್ರೋತ್ಸವದಲ್ಲಿ ಸಾಧಕರಿಗೆ ಸನ್ಮಾನ

ಮೈಸೂರು: ಗಣಪತಿ ಸಚ್ಚಿದಾನಂದ ಸ್ವಾಮೀಜಿಯವರ 75ನೇ ಜನ್ಮದಿನೋತ್ಸವದ ಅಂಗವಾಗಿ ಮಂಗಳವಾರ ಆಶ್ರಮದ ನಾದಮಂಟಪದಲ್ಲಿ ವಿವಿಧ ಕ್ಷೇತ್ರಗಳ ಸಾಧಕರನ್ನು ಸನ್ಮಾನಿಸಲಾಯಿತು.

ನಂಜನಗೂಡು ರಸ್ತೆಯಲ್ಲಿರುವ ಆಶ್ರಮದ ನಾದಮಂಟಪದಲ್ಲಿ ನಡೆದ ಧಾರ್ಮಿಕ ಪೂಜಾಕೈಂಕರ್ಯದಲ್ಲಿ ಶ್ರೀಚಕ್ರ ಪೂಜೆ ಮತ್ತು ರುದ್ರಹೋಮ, ಪೂರ್ಣಾಹುತಿ ಸೇರಿದಂತೆ ಹಲವು ಧಾರ್ಮಿಕ ಕಾರ್ಯಗಳು ಭಕ್ತಿ ಬಾವದಿಂದ ಜರುಗಿದವು.

ದೇಶ-ವಿದೇಶಗಳಿಂದ ಆಗಮಿಸಿದ್ದ ಸಹಸ್ರಾರು ಭಕ್ತರು ಕಾರ್ಯಕ್ರಮದಲ್ಲಿ ಭಾಗವಹಿಸಿ ಪುನೀತರಾದರು. ಸಾಲದ ಸೂಲಕ್ಕೆ ಬಲಿಯಾದ ರೈತರ ಕುಟುಂಬದವರನ್ನು ಸನ್ಮಾನಿಸಿ, ಆರ್ಥಿಕ ಸಹಾಯ ಮಾಡಲಾಯಿತು. ಅದರಂತೆ ಬಿದರಹಳ್ಳಿಯ ಹೊಂಬಾಳಮ್ಮ, ಪುಟ್ಟಮಾದಮ್ಮ, ಮೆಲ್ಲಹಳ್ಳಿಯ ಸಿದ್ದಮ್ಮ, ತಾಯಮ್ಮ, ಮಹದೇವನಹುಂಡಿಯ ಸಾವಿತ್ರಿ ಅವರುಗಳಿಗೆ ಶ್ರೀಗಳು ಆರ್ಥಿಕ ನೆರವು ನೀಡಿದರು.

ಅಲ್ಲದೇ ಆಶ್ರಮದಲ್ಲಿ ಸಂಜೆ ಸಂಗೀತ ಕಟ್ಟಿ ಅವರಿಂದ ಹಿಂದೂಸ್ಥಾನಿ ಗಾಯನ ಕಾರ್ಯಕ್ರಮ ನಡೆಯಿತು, ಚೈತನ್ಯಾರ್ಚನೆ-ವಜ್ರಮಹೋತ್ಸವ ಅಂಗವಾಗಿ ಕೇರಳದ ಮಲ್ಲಿಯೂರ್‌ ಪರಮೇಶ್ವರನ್‌ ನಂಬೂದರಿ, ಹಿಂದೂರಿನ ಪ್ರದೀಪ್‌ ತಾರನೇಕರ್‌ ಸೇರಿದಂತೆ ಹಲವು ವಿದ್ವಾಂಸರನ್ನು ಸನ್ಮಾನಿಸಲಾಯಿತು.