ದುಬೈ: ಏಷ್ಯಾ ಕಪ್ ಕೂಟದ ಮೊದಲ ಸುತ್ತಿನ ಪಂದ್ಯದಲ್ಲಿ ಭಾರತ ಮತ್ತು ಹಾಂಕಾಂಗ್ ತಂಡಗಳು ಬುಧವಾರ ಮುಖಾಮುಖಿಯಾಗಿದೆ. ಈ ಪಂದ್ಯದಲ್ಲಿ ನಿರೀಕ್ಷೆಯಂತೆ ಭಾರತ ಗೆದ್ದರೂ, ಹಾಂಕಾಂಗ್ ತಂಡ ತನ್ನದೊಂದು ನಡೆಯಿಂದ ಕ್ರಿಕೆಟ್ ಪ್ರಿಯರ ಹೃದಯ ಗೆದ್ದಿದೆ.
ಟೀಂ ಇಂಡಿಯಾ ಮಾಜಿ ನಾಯಕ ವಿರಾಟ್ ಕೊಹ್ಲಿಗೆ ತಮ್ಮ ಜೆರ್ಸಿ ನೀಡಿರುವ ಹಾಂಕಾಂಗ್ ತಂಡವು ಅದರಲ್ಲಿ ಹೃದಯಸ್ಪರ್ಶಿ ಸಂದೇಶವೊಂದನ್ನು ಬರೆದಿದೆ. ಇದರ ಚಿತ್ರವನ್ನು ಸ್ವತಃ ವಿರಾಟ್ ಕೊಹ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ.
“ವಿರಾಟ್, ಒಂದು ಪೀಳಿಗೆಗೆ ಸ್ಫೂರ್ತಿ ನೀಡಿದ್ದಕ್ಕಾಗಿ ಧನ್ಯವಾದಗಳು. ನಾವು ನಿಮ್ಮೊಂದಿಗೆ ನಿಲ್ಲುತ್ತೇವೆ! ನಿಮ್ಮೆದುರಿಗೆ ಹಲವು ಅದ್ಭುತ ದಿನಗಳಿವೆ. ಶಕ್ತಿಯೊಂದಿಗೆ, ಪ್ರೀತಿಯಿಂದ- ಹಾಂಕಾಂಗ್ ತಂಡ” ಎಂದು ಜೆರ್ಸಿಯಲ್ಲಿ ಬರೆಯಲಾಗಿದೆ.
ಇದರ ಚಿತ್ರವನ್ನು ಇನ್ಸ್ಟಾಗ್ರಾಮ್ ನಲ್ಲಿ ಹಂಚಿಕೊಂಡಿರುವ ವಿರಾಟ್ ಕೊಹ್ಲಿ, ಹಾಂಕಾಂಗ್ ಕ್ರಿಕೆಟ್ ಗೆ ಧನ್ಯವಾದಗಳು. ನಿಮ್ಮ ಈ ನಡೆ ಅತ್ಯಂತ ವಿನಮ್ರವಾಗಿದೆ, ತುಂಬಾ ಸಿಹಿಯಾಗಿದೆ” ಎಂದು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ:ಬಿಜೆಪಿ ಮುಸ್ಲಿಮರನ್ನು ಬೆದರಿಸಿ ಮತ ಸೆಳೆಯಲು ಬಯಸಿದೆ: ಸಂಸದ ಮೌಲಾನಾ ಅಜ್ಮಲ್
ಕಳಪೆ ಫಾರ್ಮ್ ನಲ್ಲಿರುವ ವಿರಾಟ್ ಕೊಹ್ಲಿ ಏಷ್ಯಾ ಕಪ್ ನಲ್ಲಿ ಫಾರ್ಮ್ ಕಂಡುಕೊಳ್ಳುತ್ತಿದ್ದಾರೆ. ಹಾಂಕಾಂಗ್ ವಿರುದ್ಧ ವಿರಾಟ್ 44 ಎಸೆತಗಳಲ್ಲಿ ಅಜೇಯ 59 ರನ್ ಗಳಿಸಿದರು. ಈ ಇನ್ನಿಂಗ್ ನಲ್ಲಿ ವಿರಾಟ್ ಒಂದು ಬೌಂಡರಿ ಮತ್ತು ಮೂರು ಸಿಕ್ಸರ್ ಬಾರಿಸಿದರು.
