ಕೋರ್ಟ್ ನೊಳಗೆ ಕುಸಿದು ಬಿದ್ದ ಹನಿಪ್ರೀತ್, 6 ದಿನ ಪೊಲೀಸರ ವಶಕ್ಕೆ

ನವದೆಹಲಿ: ಅತ್ಯಾಚಾರಿ ಡೇರಾ ಸಚ್ಚಾ ಸೌದಾದ ಮುಖ್ಯಸ್ಥ ಗುರ್ಮೀತ್ ರಾಮ್ ರಹೀಂ ಸಿಂಗ್ ದತ್ತುಪುತ್ರಿ ಹನಿಪ್ರೀತ್ ಇನ್ಸಾನ್ ಳನ್ನು ಪಂಚಕುಲದಲ್ಲಿರುವ ಸಿಬಿಐ ವಿಶೇಷ ಕೋರ್ಟ್ ಬುಧವಾರ 6 ದಿನಗಳ ಕಾಲ ಪೊಲೀಸ್ ಕಸ್ಟಡಿಗೆ ಒಪ್ಪಿಸಿದೆ.

ಪ್ರತಿಭಟನೆ, ಹಿಂಸಾಚಾರಕ್ಕೆ ಕುಮ್ಮಕ್ಕು ನೀಡಿರುವ ಆರೋಪದಲ್ಲಿ ಬಂಧಿಯಾಗಿರುವ ಹನಿಪ್ರೀತ್ ಳನ್ನು 14 ದಿನ ಕಸ್ಟಡಿಗೆ ಒಪ್ಪಿಸಬೇಕೆಂದು ಹರ್ಯಾಣ ಪೊಲೀಸ್ ಕೋರ್ಟ್ ಗೆ ಮನವಿ ಮಾಡಿದ್ದರು. ಆದರೆ ಸಿಬಿಐ ಕೋರ್ಟ್ ಆರು ದಿನಗಳ ಕಾಲ ಕಸ್ಟಡಿಗೆ ನೀಡಿದೆ.

ಮಂಗಳವಾರ ಮಧ್ಯಾಹ್ನ ಹರ್ಯಾಣ ಪೊಲೀಸರು ಪಂಜಾಬ್ ನ ಝಿರಕ್ ಪುರ್-ಪಟಿಯಾಲಾ ರಸ್ತೆ ಸಮೀಪ ಹನಿಪ್ರೀತ್ ಹಾಗೂ ಮತ್ತೊಬ್ಬ ಮಹಿಳೆಯನ್ನು ಬಂಧಿಸಿದ್ದರು. ಬಳಿಕ ತಡರಾತ್ರಿ ಹನಿಪ್ರೀತ್ ಳನ್ನು ವೈದ್ಯಕೀಯ ತಪಾಸಣೆಗಾಗಿ ಆಸ್ಪತ್ರೆಗೆ ಕರೆದೊಯ್ದುದ್ದರು.

ಇಂದು ಕೋರ್ಟ್ ಗೆ ಹಾಜರುಪಡಿಸಿದ ವೇಳೆ ಹೈಡ್ರಾಮಾ ಮಾಡಿದ ಹನಿಪ್ರೀತ್, ಕೋರ್ಟ್ ಕಟಕಟೆಯಲ್ಲಿ ಎರಡೂ ಕೈಯನ್ನು ಮುಗಿದು ಕಣ್ಣೀರು ಸುರಿಸುತ್ತಾ,,ನಾನು ನಿರಪರಾಧಿ ಎಂದು ಬೇಡಿಕೊಂಡಿದ್ದಳು. ತದನಂತರ ಕೋರ್ಟ್ ಕಟಕಟೆಯೊಳಗೆ ಕುಸಿದು ಬಿದ್ದ ಘಟನೆ ನಡೆದಿರುವುದಾಗಿ ಮಾಧ್ಯಮದ ವರದಿ ತಿಳಿಸಿದೆ.