ಮನೆಯೇ ಸೌಂದರ್ಯಾಲಯ

ಇನ್ನು ಸ್ವಲ್ಪ ದಿನಗಳಲ್ಲಿ ಎಲ್ಲ ಹೆಣ್ಣು ಮಕ್ಕಳ ನಿಜ ಬಣ್ಣ ಬಯಲಾಗುತ್ತದೆ. ಯಾಕಂದ್ರೆ, ಎಲ್ಲ ಬ್ಯೂಟಿ ಪಾರ್ಲರ್‌ಗಳು ಕ್ಲೋಸ್‌ ಆಗಿವೆಯಲ್ಲ- ಹೀಗೊಂದು ಜೋಕ್‌ ಎಲ್ಲ ಕಡೆ ಹರಿದಾಡುತ್ತಿದೆ. ಅದನ್ನು ಓದಿ, ನಕ್ಕು ಸುಮ್ಮನಾಗಿಬಿಡಿ.  ಮನೆಯಲ್ಲಿಯೇ ಸಿಗುವ ಸಾಮಗ್ರಿಗಳಿಂದ, ಸೌಂದರ್ಯ ಕಾಪಾಡಿಕೊಳ್ಳಲು ಸಾಧ್ಯವಿದೆ. ಪಾರ್ಲರ್‌ನ ಫೇಶಿಯಲ್, ಮೆನಿಕ್ಯೂರ್‌, ಪೆಡಿಕ್ಯೂರ್‌ ಸೌಲಭ್ಯಗಳನ್ನು ಮನೆಯಲ್ಲಿಯೇ ಪಡೆಯುವುದು ಹೇಗೆ ಎಂಬುದರ ಮಾಹಿತಿ ಇಲ್ಲಿದೆ.

∙ ಲಿಂಬೆ ರಸಕ್ಕೆ ಸಕ್ಕರೆ/ ಜೇನುತುಪ್ಪ ಹಾಕಿ, ಅಂಟಾದ ಆ ಮಿಶ್ರಣದಿಂದ ಮಸಾಜ್‌ ಮಾಡಿದರೆ ಮುಖದ ಮೇಲಿನ ರೋಮ ಉದುರುತ್ತದೆ.

∙ ಚಿಟಿಕೆ ಅರಿಶಿಣಕ್ಕೆ ಸ್ವಲ್ಪ ಕಡಲೆ ಹಿಟ್ಟು ಬೆರೆಸಿ ಹಚ್ಚಿದರೆ, ತುಟಿಯ ಮೇಲಿನ ಕೂದಲ ಬೆಳವಣಿಗೆ ಕಡಿಮೆಯಾಗುತ್ತದೆ.

∙ ತಾಜಾ ಅಲೋವೆರಾ (ಲೋಳೆಸರ) ಜೊತೆಗೆ ಲಿಂಬೆರಸ, ರೋಸ್‌ ವಾಟರ್‌ ಬೆರೆಸಿ ಮುಖಕ್ಕೆ ಮಸಾಜ್‌ ಮಾಡಿ.

∙ ಹುಬ್ಬಿನ ಕೂದಲು ದಟ್ಟವಾಗಿ ಬೆಳೆದಿದ್ದರೆ, ಐ ಬ್ರೋ ಟ್ರಿಮ್ಮರ್‌/ ಪ್ಲಕರ್‌ ಬಳಸಿ ಹೆಚ್ಚಿನ ಕೂದಲನ್ನು ಮಾತ್ರ ತೆಗೆಯಿರಿ. ಹುಬ್ಬಿನ ಮೇಲೆ ಹಾಲಿನ ಕೆನೆ ಹಚ್ಚಿಕೊಂಡರೆ ಅಥವಾ ಕಾಡಿಗೆಯಿಂದ ಗೆರೆ ಎಳೆದುಕೊಂಡರೆ ಎಕ್ಸ್ ಟ್ರಾ ಕೂದಲನ್ನು ಗುರುತಿಸಲು ಸುಲಭವಾಗುತ್ತದೆ.

∙ ಹಾಲಿನ ಕೆನೆ ಹಚ್ಚಿ, ಪ್ರತಿನಿತ್ಯ ಮುಖಕ್ಕೆ ಮಸಾಜ್‌ ಮಾಡಿಕೊಳ್ಳಿ.

∙ ಪಪಾಯ ಹಣ್ಣಿನ ರಸದಿಂದ ಫೇಶಿಯಲ್‌ ಮಾಡಿಕೊಳ್ಳಬಹುದು.

∙ ಸೋಪ್‌/ ಫೇಸ್‌ ವಾಶ್‌ ಬದಲು, ಕಡಲೆಹಿಟ್ಟು ಬಳಸಿ ಮುಖ ತೊಳೆದುಕೊಳ್ಳಿ.

∙ ಕಡಲೆ ಹಿಟ್ಟು, ಮೊಸರು, ಅರಿಶಿನ, ಜೇನುತುಪ್ಪ, ರೋಸ್‌ ವಾಟರ್‌ ಮತ್ತು ಗಂಧದ ಪುಡಿಯನ್ನು ಬೆರೆಸಿ, ಮುಖಕ್ಕೆ ಮಸಾಜ್‌ ಮಾಡಿದರೆ ತ್ವಚೆಯ ಕಾಂತಿ ಹೆಚ್ಚುತ್ತದೆ.

∙ ಬೆಚ್ಚಗಿನ ನೀರಿಗೆ ಕಲ್ಲುಪ್ಪು ಹಾಕಿ, ಅದರಲ್ಲಿ ಅಂಗಾಲನ್ನು ಮುಳುಗಿಸಿ ಕುಳಿತುಕೊಳ್ಳಿ. ಹೀಗೆ ಮಾಡಿದರೆ ಕಾಲಿನ ಸತ್ತ ಚರ್ಮಗಳು ದೂರಾಗಿ, ತ್ವಚೆ ಕೋಮಲವಾಗುತ್ತದೆ.

ಕಿವಿಮಾತು
∙ ಸ್ಕಿನ್‌ ಫಾಸ್ಟಿಂಗ್‌ ಮಾಡಲು ಇದು ಒಳ್ಳೆಯ ಸಮಯ. ಸ್ಕಿನ್‌ ಫಾಸ್ಟಿಂಗ್‌ ಅಂದರೆ, ವಾರಗಳ ಕಾಲ ರಾಸಾಯನಿಕ ಸೌಂದರ್ಯ ಉತ್ಪನ್ನಗಳನ್ನು ಬಳಸದೇ ಇರುವುದು. ಹಾಗೆ ಮಾಡುವುದರಿಂದ, ಚರ್ಮದ ಉಸಿರಾಟ ಸರಾಗವಾಗಿ ತ್ವಚೆಯ ಕಾಂತಿ ಹೆಚ್ಚುತ್ತದೆ.

∙ ಹೇರ್‌ ಡ್ರೈಯರ್‌ , ಹೇರ್‌ ಕಂಡಿಷನರ್‌ ಬಳಸಬೇಡಿ.
∙ ಪ್ರತಿನಿತ್ಯ ಕೂದಲಿಗೆ ಎಣ್ಣೆ ಹಚ್ಚಿದರೆ ಒಳ್ಳೆಯದು.
∙ ಮನೆಯಲ್ಲೇ ಇರುವುದರಿಂದ, ಬಾಯಾರಿಕೆ ಆಗದಿದ್ದರೂ ಹೆಚ್ಚೆಚ್ಚು ನೀರು ಕುಡಿಯಿರಿ.