ವನಿತಾ ಹಾಕಿ: ಗ್ರೇಟ್‌ ಬ್ರಿಟನ್‌ಗೆ ಆಘಾತವಿಕ್ಕಿದ ಭಾರತ

ಮಾರ್ಲೊ (ಗ್ರೇಟ್‌ ಬ್ರಿಟನ್‌): ಭಾರತೀಯ ವನಿತಾ ಹಾಕಿ ತಂಡ ತನ್ನ ಗ್ರೇಟ್‌ ಬ್ರಿಟನ್‌ ಪ್ರವಾಸವನ್ನು ಭರ್ಜರಿಯಾಗಿ ಆರಂಭಿಸಿದೆ. ಮೊದಲ ಪಂದ್ಯವನ್ನು 2-1 ಗೋಲುಗಳಿಂದ ಗೆದ್ದು 5 ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.

0-1 ಹಿನ್ನಡೆಯಲ್ಲಿದ್ದ ಭಾರತ, ಈ ಒತ್ತಡವನ್ನೆಲ್ಲ ಮೆಟ್ಟಿ ನಿಂತು ಗೆಲುವು ಸಾಧಿಸಿ ಮೆರೆದದ್ದೊಂದು ವಿಶೇಷ. ಶರ್ಮಿಳಾದೇವಿ ಮತ್ತು ಗುರ್ಜಿತ್‌ ಸಿಂಗ್‌ ಭಾರತದ ಗೆಲುವಿನ ರೂವಾರಿಗಳಾಗಿ ಮೂಡಿಬಂದರು.

ಇನ್ನೇನು ಪಂದ್ಯ 1-1ರಿಂದ ಡ್ರಾಗೊಳ್ಳಬೇಕು ಎನ್ನುವಾಗಲೇ ಗುರ್ಜಿತ್‌ ಆತಿಥೇಯರ ಮೇಲೆರಗಿದರು. ಪೆನಾಲ್ಟಿ ಕಾರ್ನರ್‌ ಒಂದನ್ನು ಅವರು ಯಶಸ್ವಿಯಾಗಿ ಗೋಲಾಗಿಸಿದರು. ಆಗ ಪಂದ್ಯದ ಮುಕ್ತಾಯಕ್ಕೆ 48 ಸೆಕೆಂಡ್‌ಗಳಷ್ಟೇ ಬಾಕಿ ಇತ್ತು.

14 ನಿಮಿಷಗಳ‌ಲ್ಲಿ 3 ಗೋಲು
ಅಂತಿಮ ಕ್ವಾರ್ಟರ್‌ ಆಟ ವಿಭಿನ್ನವಾಗಿತ್ತು. ಪಂದ್ಯದ ಮೂರೂ ಗೋಲುಗಳು ಈ ಅವಧಿಯಲ್ಲೇ ಸಿಡಿಯಲ್ಪಟ್ಟವು. 46ನೇ ನಿಮಿಷದಲ್ಲಿ ಎಮಿಲಿ ಡಿಫ್ರಂಡ್‌ ಖಾತೆ ತೆರೆದು ಬ್ರಿಟನ್‌ಗೆ ಮುನ್ನಡೆ ತಂದಿತ್ತರು. ಆದರೆ ಕೆಲವೇ ಹೊತ್ತಿನಲ್ಲಿ ಶರ್ಮಿಳಾದೇವಿ ಪಂದ್ಯವನ್ನು ಸಮಬಲಕ್ಕೆ ತರುವಲ್ಲಿ ಯಶಸ್ವಿಯಾದರು. ಮುಂದಿನದು ಗುರ್ಜಿತ್‌ ಸಿಂಗ್‌ ಅವರ ಪರಾಕ್ರಮ. ಹೀಗೆ, ಪಂದ್ಯದ ಮೂರೂ ಗೋಲುಗಳು ಕೊನೆಯ 14 ನಿಮಿಷಗಳಲ್ಲಿ ಸಿಡಿಯಲ್ಪಟ್ಟವು.
ಸರಣಿಯ 2ನೇ ಪಂದ್ಯ ರವಿವಾರ ನಡೆಯಲಿದೆ.

ಗೋಲು ಕಾಣದ 3 ಕ್ವಾರ್ಟರ್
ಎರಡೂ ತಂಡಗಳು ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕಿಳಿದವು. ಮೊದಲ ಕ್ವಾರ್ಟರ್‌ನಲ್ಲಿ ಯಾವುದೇ ಗೋಲು ದಾಖಲಾಗಲಿಲ್ಲ. ದ್ವಿತೀಯ ಕ್ವಾರ್ಟರ್‌ನಲ್ಲಿ ಭಾರತ ಹಿಡಿತ ಸಾಧಿಸಿತು. ಆದರೆ 2 ಪೆನಾಲ್ಟಿ ಕಾರ್ನರ್‌ಗಳನ್ನು ಕೈಚೆಲ್ಲಿತು. ಎದುರಾಳಿ ಕೀಪರ್‌ ಮ್ಯಾಡ್ಡಿ ಹಿಂಚ್‌ ಇದನ್ನು ತಡೆಯುವಲ್ಲಿ ಯಶಸ್ವಿಯಾದರು. ಬಳಿಕ ಇಂಗ್ಲೆಂಡ್‌ ಅವಕಾಶವೊಂದಕ್ಕೆ ಭಾರತದ ಗೋಲ್‌ ಕೀಪರ್‌ ಸವಿತಾ ಪೂನಿಯಾ ತಡೆಯಾದರು. ಮೊದಲರ್ಧ ಗೋಲಿಲ್ಲದೆ ಮುಗಿಯಿತು. 3ನೇ ಕ್ವಾರ್ಟರ್‌ನಲ್ಲೂ ಗೋಲಿನ ಬರಗಾಲ ಮುಂದುವರಿಯಿತು.