ಕಲಬುರಗಿ: ಕಲ್ಯಾಣ ಕರ್ನಾಟಕ ಭಾಗಕ್ಕೆ ಮಂಜೂರಾತಿ ಆಗಬೇಕಿರುವ ಯೋಜನೆಗಳನ್ನು ಕಾರ್ಯಾನುಷ್ಠಾನಗೊಳಿಸುವಂತೆ ಹಾಗೂ ಇತರ ಅಭಿವೃದ್ಧಿ ಕಾರ್ಯಗಳನ್ನು ಸಹ ಆರಂಭಿಸುವಂತೆ ಆಗ್ರಹಿಸಿ ಇಲ್ಲಿನ ಹೈದರಾಬಾದ್‌ ಕರ್ನಾಟಕ ವಾಣಿಜ್ಯ ಮತ್ತು ಕೈಗಾರಿಕಾ ಸಂಸ್ಥೆ ನವದೆಹಲಿಯಲ್ಲಿ ಸಂಬಂಧಪಟ್ಟ ಕೇಂದ್ರ ಸಚಿವರನ್ನು ಭೇಟಿಯಾಗಿ ಮನವಿ ಸಲ್ಲಿಸಿತು.
ಎಚ್‌ಕೆಸಿಸಿಐ ನಿಯೋಗವು ನವದೆಹಲಿಯಲ್ಲಿ ನಾಲ್ಕು ದಿನಗಳ ಮುಕ್ಕಾಂ ಹೂಡಿ ಕೇಂದ್ರ ಸಚಿವರನ್ನು ಭೇಟಿಯಾಗಿ ಕ.ಕ ಭಾಗದಲ್ಲಿ ಕೇಂದ್ರ ಸರ್ಕಾರ ಕಾರ್ಯಗತಗೊಳಿಸಬೇಕಿರುವ ಯೋಜನೆಗಳ ಮಾಹಿತಿಯನ್ನು ಗಮನಕ್ಕೆ ತರಲಾಯಿತು.
ನಿಯೋಗವು ಕೇಂದ್ರ ಸಚಿವ ಭಗವಂತ ಖೂಬಾರ ಅವರ ನೇತೃತ್ವದಲ್ಲಿ ಹಾಗೂ ಸಂಸದ ಡಾ| ಉಮೇಶ ಜಾಧವ್‌, ವಿಧಾನ ಪರಿಷತ್‌ ಸದಸ್ಯ ಬಿ.ಜಿ. ಪಾಟೀಲ್‌ ಉಪಸ್ಥಿತಿಯೊಂದಿಗೆ ನಿಯೋಗವು ಕೇಂದ್ರದ ವಾಣಿಜ್ಯ ಮತ್ತು ಕೈಗಾರಿಕೆ ಸಚಿವ ಪಿಯೂಷ್‌ ಗೊಯಲ್‌ ಅವರಿಗೆ ಮನವಿ ಸಲ್ಲಿಸಿ ಕಲಬುರಗಿ ಜಿಲ್ಲೆಯಲ್ಲಿ ಫಿರೋಜಾಬಾದ್‌, ಹೊನ್ನಕಿರಣಗಿ ಮತ್ತು ನದಿಸಿನ್ನೂರ್‌ ಭೂಸ್ವಾಧೀಪಡಿಸಿಕೊಂಡ ಜಾಗದಲ್ಲಿ ವಿದ್ಯುತ್ಛಕ್ತಿ, ನೀರಿನ ಸರಬರಾಜು ಲಭ್ಯವಿರುವುದರಿಂದ ಮೀನಾ ಮೇಷ ಏಣಿಸದೇ ಮೆಗಾ ಜವಳಿ ಪಾರ್ಕ್‌ ವನ್ನು ಸ್ಥಾಪಿಸುವ ನಿಟ್ಟಿನಲ್ಲಿ ಕ್ರಮ ಕೈಗೊಳ್ಳವಂತೆ ವಿನಂತಿಸಲಾಯಿತು.
ಅದೇ ರೀತಿ ಪ್ರಮುಖವಾಗಿ ಪ್ರಸ್ತಾಪಿತ ಸುರತ್‌ -ಚೆನೈ ಕೈಗಾರಿಕಾ ಕಾರಿಡಾರ್‌ವನ್ನು ಕಲಬುರಗಿ ಮತ್ತು ರಾಯಚೂರ ಜಿಲ್ಲೆಗಳಲ್ಲಿ ಕೈಗಾರಿಕಾ ಟೌನ್‌ ಶಿಪ್‌ಗ್ಳ ಮೂಲಕ ವಿಸ್ತರಿಸಬೇಕೆಂದು ಕೇಂದ್ರದ ಸಣ್ಣ ಮತ್ತು ಮಧ್ಯಮ ಕೈಗಾರಿಕಾ ಸಚಿವ ಸಚಿವ ನಾರಾಯಣ ತಾತು ರಾಣೆ ಅವರಲ್ಲಿ ಮನವಿ ಸಲ್ಲಿಸಿ ಕೋರಲಾಯಿತು.
ಬೀದರದಲ್ಲಿ ಡಿಜಿಟಲ್‌ ಲೈಬ್ರರಿಯನ್ನು ಸ್ಥಾಪಿಸುವಂತೆ ಕೇಂದ್ರದ ಸರಕಾರದ ಎಲೆಕ್ಟ್ರಾನಿಕ್ಸ್‌ ಮತ್ತು ಮಾಹಿತಿ ತಂತ್ರಜ್ಞಾನ ಕೌಶಲ್ಯಾಭಿವೃದ್ಧಿ ಮತ್ತು ಉದ್ಯಮಶೀಲತೆಯ ರಾಜ್ಯ ಸಚಿವ ರಾಜೀವ್‌ ಚಂದ್ರಶೇಖರ ಅವರಲ್ಲಿ ಹಾಗೂ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ, ಜಲ ಸಂಪನ್ಮೂಲ ಸಚಿವ ನಿತಿನ್‌ ಗಡ್ಕರಿ ಅವರಲ್ಲಿ ಕಲಬುರಗಿ ನಗರದ ಹೊರವಲಯದಲ್ಲಿ ರಾಷ್ಟ್ರೀಯ ಹೆದ್ದಾರಿಗೆ ಸಂಪರ್ಕಿಸುವಂತೆ ನೂತನ ಬೈ-ಪಾಸ್‌ ರಸ್ತೆಯನ್ನು ನಿರ್ಮಿಸುವುದು, ಹೈದರಾಬಾದ್‌ -ಗುರಮಿಟಕಲ್‌-ಯಾದಗೀರ-ವಿಜಯಪುರ ಮಾರ್ಗವನ್ನು ಮೇಲ್ದಜೇìಗೇರಿಸುವ ಮೂಲಕ ಅಭಿವೃದ್ಧಿ ಪಡಿಸುವಂತೆ ಮತ್ತು ತೆಲಂಗಾಣದಲ್ಲಿರುವ ರಿಬ್ಬನ್‌ಪಲ್ಲಿ-ಮಹಾರಾಷ್ಟ್ರದಲ್ಲಿ ಇರುವ ವಾಗ್ಧರಿ ಮಾರ್ಗಗಳನ್ನು ರಾಷ್ಟ್ರೀಯ ಹೆದ್ದಾರಿ ಮಾದರಿಯಲ್ಲಿ ಅಭಿವೃದ್ಧಿಗೊಳಿಸಬೇಕೆಂದು ಮನವಿ ಸಲ್ಲಿಸಲಾಯಿತು.
ಹೈದರಾಬಾದ್‌ ಕರ್ನಾಟಕ ವಾಣಿಜ್ಯ ಮತ್ತು ಕೈಗಾರಿಕಾ ಸಂಸ್ಥೆ ಅಧ್ಯಕ್ಷ ಪ್ರಶಾಂತ ಎಸ್‌. ಮಾನಕರ, ಉಪಾಧ್ಯಕ್ಷ ರಾಜಶೇಖರ ಪಾಟೀಲ ಬೆಡಸೂರ, ಗೌರವ ಕಾರ್ಯದರ್ಶಿ ಶರಣಬಸಪ್ಪ ಎಂ. ಪಪ್ಪ, ಸಂಸ್ಥೆಯ ಆಡಳಿತ ಮಂಡಳಿಯ ಸದಸ್ಯರಾದ ಡಾ| ಕೈಲಾಸ ಬಿ. ಪಾಟೀಲ, ಕೇದಾರ ರಘೋಜಿ, ವೀರೇಂದ್ರ ಎಲ್‌. ಬಾಸರೆಡ್ಡಿ, ರಾಮಕೃಷ್ಣ ಬೋರಾಳಕರ್‌, ಮಹಾದೇವ ಖೇಣಿ, ಮಹಾದೇವ ತಾವರಗೇರಿ ಮತ್ತು ಗುಲಬರ್ಗಾ ಬಟ್ಟೆ ವ್ಯಾಪಾರಸ್ಥರ ಸಂಘದ ಅಧ್ಯಕ್ಷ ಆನಂದ ದಂಡೋತಿ ಅವರನ್ನೊಳಗೊಂಡ ನಿಯೋಗವು ಕೇಂದ್ರ ಸಚಿವರನ್ನು ಭೇಟಿಯಾಯಿತು.
ಕಲಬುರಗಿಯಲ್ಲಿ ಮೆಗಾ ಟೆಕ್ಸ್ ಟೈಲ್‌ ಪಾರ್ಕ್‌ ಸ್ಥಾಪನೆಯಾದರೆ 25 ಸಾವಿರಕ್ಕೂ ಹೆಚ್ಚು ಉದ್ಯೋಗ ಸೃಷ್ಟಿಯಾಗುತ್ತದೆ. ಕಲಬುರಗಿಯಲ್ಲಿ ಟೆಕ್ಸ್ ಟೈಲ್‌ ಪಾರ್ಕ್‌ ಸ್ಥಾಪನೆಗೆ ಲಭ್ಯತೆ ಹಾಗೂ ಮೂಲಸೌಕರ್ಯಗಳ ಕುರಿತಾಗಿ ಕೇಂದ್ರದ ಗಮನಕ್ಕೆ ತರಲಾಗಿದೆ. ರಾಜಕೀಯ ಇಚ್ಚಾಶಕ್ತಿ ಬಲಗೊಂಡಲ್ಲಿ ಪಾರ್ಕ್‌ ಸ್ಥಾಪನೆಯಾಗುತ್ತದೆ.
-ಆನಂದ ದಂಡೋತಿ, ಅಧ್ಯಕ್ಷ, ಬಟ್ಟೆ ಮಾರಾಟ ವ್ಯಾಪಾರ ಸಂಘ, ಕಲಬುರಗಿ
