ಪ್ರೀತಿ ಪ್ರೇಮ ಪುಸ್ತಕದ ಬದನೇಕಾಯಿ ಅಂತ ಹೇಳಿದವರೇ ಲವ್‌ ಮ್ಯಾರೇಜಾದರು. ಹೀಗಂದಮೇಲೆ ಲವ್‌ ಬಗ್ಗೆ ಯಾರೇನೇ ಹೇಳಿದರೂ, ಕಿವಿ ಹಿಂಡಿದರೂ ಹುಡುಗ ಹುಡುಗಿಯರು ಕೇಳಬೇಕೆ? ಒಮ್ಮೆಯಾದರೂ ಪ್ರೀತಿಯ ಸಮುದ್ರದಲ್ಲಿ ಈಜಲೆಂದು ಇಳಿದು ಬ್ರೇಕಪ್‌ ಆದಾಗ ಮುಳುಗಿ ನೀರು ಕುಡಿದು ಹೇಗೋ ಮೇಲೆದ್ದು ಬರುತ್ತಾರೆ.
ಬ್ರೇಕಪ್‌ ಆದಾಗ ಕೆಲವರು ಉಗ್ರಮಾರ್ಗವನ್ನು ಹಿಡಿದರೆ ಇನ್ನು ಕೆಲವರು ತಮ್ಮನ್ನು ತಾವು ಶಿಕ್ಷಿಸಿಕೊಳ್ಳುವ ಸಲುವಾಗಿ ಅನಾಹುತಕ್ಕೂ ಇಳಿಯುತ್ತಾರೆ.
ಇವೆಲ್ಲಾ ಸಂಕಷ್ಟಗಳನ್ನು ನೋಡಿಯೇ ಇಂಗ್ಲೆಂಡಿನ ಒಂದು ಮೃಗಾಲಯ ಭಗ್ನಪ್ರೇಮಿಗಳಿಗೆ ನೆರವಾಗಲು ಒಂದೊಳ್ಳೆ ಉಪಾಯ ಮಾಡಿದೆ. ತಮ್ಮ ಪ್ರೀತಿಯನ್ನು ಮಾನ್ಯ ಮಾಡದ ಮಾಜಿ ಪ್ರಿಯತಮ ಅಥವಾ ಪ್ರಿಯತಮೆಯ ಹೆಸರನ್ನು ಜಿರಳೆಗೆ ಇಟ್ಟು ಸಮಾಧಾನ ಪಟ್ಟುಕೊಳ್ಳುವ ವಿನೂತನ ಉಪಾಯ ಇದು. ಭಗ್ನಪ್ರೇಮಿಗಳು ಮಾಡಬೇಕಿರುವುದಿಷ್ಟೆ. ಈ ಮೃಗಾಲಯಕ್ಕೆ ತೆರಳಿ ಎಕ್ಸ್‌(ಮಾಜಿ) ಲವರ್‌ಗಳ ಹೆಸರನ್ನು ಅಲ್ಲಿ ನೋಂದಾಯಿಸುವುದು. ಮೃಗಾಲಯದವರು ಆ ಹೆಸರನ್ನು ಜಿರಳೆಯೊಂದಕ್ಕೆ ನಾಮಕರಣ ಮಾಡಿ ಒಂದು ಸರ್ಟಿಫಿಕೆಟನ್ನು ಕೊಡುತ್ತಾರೆ. ಇದರಿಂದ ಭಗ್ನಪ್ರೇಮಿಗಳ ಮನಸ್ಸಿಗೆ ಸಮಾಧಾನ ಸಿಗುತ್ತಂತೆ.
