ವಿಜಯಲಕ್ಷ್ಮಿ ಶಿಬರೂರುಗೆ ಹರ್ಮನ್‌ ಮೊಗ್ಲಿಂಗ್‌ ಪ್ರಶಸ್ತಿ

ಕಾರವಾರ: ಇಲ್ಲಿನ ಜರ್ನಲಿಸ್ಟ್‌ ಅಸೋಸಿಯೇಶನ್‌ ಜಿಲ್ಲಾ ಘಟಕ ಕೊಡಮಾಡುವ ಪ್ರತಿಷ್ಠಿತ ಹರ್ಮನ್‌ ಮೊಗ್ಲಿಂಗ್‌ ಪ್ರಶಸ್ತಿಗೆ ಸುವರ್ಣ ನ್ಯೂಸ್‌ ತನಿಖಾ ವರದಿ ವಿಭಾಗದ ಸಂಪಾದಕಿ ವಿಜಯಲಕ್ಷ್ಮಿ ಶಿಬರೂರು ಆಯ್ಕೆಯಾಗಿದ್ದಾರೆ.

ಪತ್ರಕರ್ತ ದೀಪಕ್‌ಕುಮಾರ್‌ ಶೇಣಿ, ಕಸಾಪ ತಾಲೂಕಾಧ್ಯಕ್ಷ ನಾಗರಾಜ್‌ ಹರಪನಹಳ್ಳಿ ಹಾಗೂ ಸಾಮಾಜಿಕ ಕಾರ್ಯಕರ್ತೆ ಅನು ಕಳಸ ಅವರಿದ್ದ ಸಮಿತಿ ಪತ್ರಕರ್ತೆ ವಿಜಯಲಕ್ಷ್ಮಿ ಶಿಬರೂರು ಅವರನ್ನು ಆಯ್ಕೆ ಮಾಡಿದೆ ಎಂದು ಜರ್ನಲಿಸ್ಟ್‌ ಅಸೋಸಿಯೇಶನ್‌ ಜಿಲ್ಲಾ ಘಟಕದ ಅಧ್ಯಕ್ಷ ಮಂಜು ಕಡತೋಕ ತಿಳಿಸಿದ್ದಾರೆ.

ಕಳೆದ ವರ್ಷದಿಂದ ಕನ್ನಡ ಪತ್ರಿಕೋದ್ಯಮದ ಹರಿಕಾರ ಜರ್ಮನ್‌ ಮೂಲದ ಹರ್ಮನ್‌ ಮೊಗ್ಲಿಂಗ್‌ ಹೆಸರಲ್ಲಿ ಈ ಪ್ರಶಸ್ತಿ ನೀಡಲಾಗುತ್ತಿದೆ. ಜು.1ರಂದು ಕಾರವಾರದಲ್ಲಿ ನಡೆವ ಪತ್ರಿಕಾ ದಿನಾಚರಣೆಯಲ್ಲಿ 5000 ರೂ. ನಗದು, ಪ್ರಶಸ್ತಿಪತ್ರ ಹಾಗೂ ಫ‌ಲಕ ಒಳಗೊಂಡಿರುವ ಮೊಗ್ಲಿಂಗ್‌ ಪ್ರಶಸ್ತಿ ಪ್ರದಾನ ಮಾಡಲಾಗುವುದು.

ಮಂಗಳೂರಿನ ಮಂಗಳ ಗಂಗೋತ್ರಿಯಿಂದ ಪತ್ರಿಕೋದ್ಯಮದಲ್ಲಿ ಸ್ನಾತಕೋತ್ತರ ಪದವಿ ಪಡೆದ ವಿಜಯಲಕ್ಷ್ಮಿ ಕಟೀಲು ಸಮೀಪದ ಶಿಬರೂರಿನವರು. 1998ರಿಂದ ಜನವಾಹಿನಿ ಪತ್ರಿಕೆ ಮೂಲಕ ವೃತ್ತಿ ಆರಂಭಿಸಿದರು. ಬಳಿಕ ಮಂಗಳೂರು ಆಕಾಶವಾಣಿ, ಸಂಯುಕ್ತ ಕರ್ನಾಟಕ, ಈ ಟಿವಿ ಕನ್ನಡ, ಟಿವಿ9ನಲ್ಲೂ ಕೆಲಸ ಮಾಡಿದ್ದಾರೆ.