ರಂಗನ ಹೆರಾತ್‌ ಶ್ರೀಲಂಕಾ ನಾಯಕ

ಕೊಲಂಬೊ: ಪ್ರವಾಸಿ ಬಾಂಗ್ಲಾದೇಶ ವಿರುದ್ಧ ನಡೆಯಲಿರುವ 2 ಪಂದ್ಯಗಳ ಕಿರು ಟೆಸ್ಟ್‌ ಸರಣಿಯ ವೇಳೆ ಶ್ರೀಲಂಕಾ ತಂಡವನ್ನು ಸ್ಪಿನ್ನರ್‌ ರಂಗನ ಹೆರಾತ್‌ ಮುನ್ನಡೆಸಲಿದ್ದಾರೆ. ನಾಯಕ ಏಂಜೆಲೊ ಮ್ಯಾಥ್ಯೂಸ್‌ ಗಾಯಾಳಾಗಿ ಹೊರಗುಳಿಯುವುದರಿಂದ ಈ ಪರಿವರ್ತನೆ ಮಾಡಲಾಗಿದೆ.

ದಿನೇಶ್‌ ಚಂಡಿಮಾಲ್‌, ಉಪುಲ್‌ ತರಂಗ ಕೂಡ ನಾಯಕತ್ವದ ರೇಸ್‌ನಲ್ಲಿದ್ದರು. ಆದರೆ ಇವರನ್ನೆಲ್ಲ ಬಿಟ್ಟು ಹೆರಾತ್‌ ಮೇಲೆ ಆಯ್ಕೆಗಾರರು ವಿಶ್ವಾಸವಿರಿಸಿದರು. ಹೆರಾತ್‌ ಕಳೆದ ವರ್ಷಾಂತ್ಯದ ಜಿಂಬಾಬ್ವೆ ಪ್ರವಾಸದ ವೇಳೆಯೂ ತಂಡವನ್ನು ಮುನ್ನಡೆಸಿದ್ದರು. ಆ ಸರಣಿಯನ್ನು ಶ್ರೀಲಂಕಾ 2-0 ಅಂತರದಿಂದ ಜಯಿಸಿತ್ತು. ಹೆರಾತ್‌ 19 ವಿಕೆಟ್‌ ಉರುಳಿಸಿ ಮಿಂಚಿದ್ದರು.

ಎಡಗೈ ಸ್ಪಿನ್ನರ್‌ ಮಲಿಂದ ಪುಷ್ಪಕುಮಾರ ಅವರನ್ನು ತಂಡಕ್ಕೆ ಸೇರಿಸಿಕೊಳ್ಳಲಾಗಿದೆ. ತಂಡದ ಆಯ್ಕೆ ಕುರಿತಂತೆ ಸದ್ಯ ಈ ಎರಡು ಸಂಗತಿಗಳನ್ನಷ್ಟೇ ಮಾಧ್ಯಮಗಳಿಗೆ ತಿಳಿಸಲಾಗಿದೆ. ಸರಣಿಯ ಮೊದಲ ಟೆಸ್ಟ್‌ ಪಂದ್ಯ ಮಾ. 7ರಿಂದ ಗಾಲೆಯಲ್ಲಿ, ದ್ವಿತೀಯ ಟೆಸ್ಟ್‌ ಮಾ. 15ರಿಂದ ಕೊಲಂಬೋದಲ್ಲಿ ಆರಂಭವಾಗಲಿದೆ.