ಅಜೆಕಾರು, ಹೆಬ್ರಿ: ಗಾಳಿ ಮಳೆಗೆ ಅಪಾರ ನಷ್ಟ

ಅಜೆಕಾರು : ಅಜೆಕಾರು ಹಾಗೂ ಸುತ್ತಲ ಪರಿಸರದಲ್ಲಿ ಎ.26ರ ರಾತ್ರಿ ಹಾಗೂ ಎ.27ರ ಮಧ್ಯಾಹ್ನ ಬೀಸಿದ ಗಾಳಿ ಮಳೆಗೆ ಅಪಾರ ನಷ್ಟ ಉಂಟಾಗಿದೆ. ಅಜೆಕಾರು ಕುರ್ಸುಕಟ್ಟೆ ಪರಿಸರದಲ್ಲಿ ಬಿರುಗಾಳಿಗೆ ವಿದ್ಯುತ್‌ ತಂತಿಗಳ ಮೇಲೆ ಬೃಹತ್‌ ಮರಗಳು ಉರುಳಿ ಹಲವು ವಿದ್ಯುತ್‌ ಕಂಬಗಳು ಹಾನಿಗೊಂಡಿವೆ.

ಇದೇ ಪರಿಸರದ ಹಲವರ ಅಡಿಕೆ ಮರಕ್ಕೆ ಹಾನಿಯಾಗಿದೆ. ಕುರ್ಸುಕಟ್ಟೆ ಪರಿಸರದಲ್ಲಿ 10 ವಿದ್ಯುತ್‌ ಕಂಬಗಳು, ಶಿರ್ಲಾಲು ಮುಂಡ್ಲಿ ರಸ್ತೆಯಲ್ಲಿ 4 ವಿದ್ಯುತ್‌ ಕಂಬಗಳು, ಹೆರ್ಮುಂಡೆ ರೆಂಜ ಪರಿಸರದಲ್ಲಿ 2 ವಿದ್ಯುತ್‌ ಕಂಬಗಳಿಗೆ ಹಾನಿಯಾಗಿ ಮೆಸ್ಕಾಂಗೆ ಸುಮಾರು 2 ಲಕ್ಷದ 60 ಸಾವಿರ ರೂ. ನಷ್ಟ ಉಂಟಾಗಿದೆ.

ಕೆರ್ವಾಶೆ ಗ್ರಾಮದಲ್ಲಿ ಬೀಸಿದ ಗಾಳಿಗೆ ಭಾರೀ ಗಾತ್ರದ ಮರಗಳು ರಸ್ತೆಗಳಿಗೆ ಉರುಳಿ ಬಿದ್ದು ಸಂಚಾರ ವ್ಯತ್ಯಯವಾಗಿತ್ತು. ವಿದ್ಯುತ್‌ ತಂತಿಗಳಿಗೆ ಹಾನಿಯಾಗಿ ವಿದ್ಯುತ್‌ ವ್ಯತ್ಯಯವಾಗಿತ್ತು

ಹೆಬ್ರಿ: ಹೆಬ್ರಿ ಸುತ್ತಮುತ್ತ ಮಂಗಳವಾರ ಬೀಸಿದ ಭಾರೀ ಗಾಳಿ-ಮಳೆಗೆ ಹಲವು ಮರಗಳು ಧರೆಗುರುಳಿ ಅಪಾರ ನಷ್ಟ ಸಂಭವಿಸಿದೆ .
ಹೆಬ್ರಿ ಸಮೀಪ ಪಾಡಿಗಾರದಲ್ಲಿ ಬೃಹತ್‌ ಮರವೊಂದು ರಸ್ತೆಗೆ ಉರುಳಿದುದರಿಂದ ಸುಮಾರು 1 ಗಂಟೆಗಳ ಕಾಲ ವಾಹನ ಸಂಚಾರಕ್ಕೆ ಅಡಚಣೆ ಉಂಟಾಯಿತು. ಸ್ಥಳೀಯರ ನೆರವಿನಿಂದ ಮರ ತೆರವು ಮಾಡಲಾಯಿತು. ವಾಹನ ಸವಾರರು ಸಂತೆಕಟ್ಟೆ ಮಾರ್ಗವಾಗಿ ಹೆಬ್ರಿಗೆ ಸಂಚರಿಸಿದರು.

ಹೆಬ್ರಿ ಶ್ಯಾಮ ಪ್ರಭು ನಿವಾಸದ ಬಳಿಯ ಮರವೊಂದು ಅವರ ಕಾರಿನ ಮೇಲೆ ಬಿದ್ದ ಪರಿಣಾಮ ಕಾರು ಜಖಂಗೊಂಡಿದೆ. ಹೆಬ್ರಿ, ಕುಚ್ಚಾರು, ಪಾಡಿಗಾರ, ಶಿವಪುರ, ಮುದ್ರಾಡಿ, ಶಿವಪುರ, ಸೀತಾನದಿ ಸುತ್ತ ಮುತ್ತ ಭಾರೀ ಮಳೆಯಾಗಿದೆ.