ವಿಶ್ವ ಮಹಿಳಾ ಚೆಸ್‌ ಹರಿಕಾ ದ್ರೋಣವಲ್ಲಿಗೆ ಕಂಚು

ಹೊಸದಿಲ್ಲಿ: ಭಾರತೀಯ ಗ್ರ್ಯಾನ್‌ ಮಾಸ್ಟರ್‌ ಹರಿಕಾ ದ್ರೋಣವಲ್ಲಿ ವಿಶ್ವ ಮಹಿಳಾ ಚೆಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಸೋಲಿನ ಆಘಾತದಿಂದ ಕಂಚಿನ ಪದಕಕ್ಕೆ ತೃಪ್ತರಾಗಿದ್ದಾರೆ. ಈ ಮೂಲಕ ವಿಶ್ವ ಮಹಿಳಾ ಚೆಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಹರಿಕಾ ಮೂರನೇ ಬಾರಿ ಕಂಚಿನ ಪದಕ ಪಡೆದರು. ಇದಕ್ಕೂ ಮುನ್ನ ಅವರು 2012 ಮತ್ತು 2015ರಲ್ಲಿ ಕಂಚಿನ ಪದಕ ಜಯಿಸಿದ್ದರು.

ಸೆಮಿಫೈನಲ್‌ ಕದನದಲ್ಲಿ ಹರಿಕಾ 4-5ರಿಂದ ಚೀನದ ತಾನ್‌ ಜಾಂಗ್ಯಿ ವಿರುದ್ಧ ಸೋಲುಂಡರು. ಮೊದಲ ಪಂದ್ಯದಲ್ಲಿ ಭಾರತೀಯ ಆಟಗಾರ್ತಿ ಸೋಲುಂಡರೂ ಎರಡನೇ ಗೇಮ್‌ನಲ್ಲಿ ಗೆದ್ದು ತಿರುಗೇಟು ನೀಡಿದ್ದರು. ಹೀಗಾಗಿ ಪಂದ್ಯ 1-1ರಲ್ಲಿ ಸಮಬಲ ಸಾಧಿಸಿತ್ತು. ಆದರೆ ಅಂತಿಮ ಪಂದ್ಯದಲ್ಲಿ ತೀವ್ರ ಸ್ಪರ್ಧೆ ನಿರೀಕ್ಷಿಸಲಾಗಿತ್ತು. ಆಂಧ್ರದ ಆಟಗಾರ್ತಿ ಗೆಲುವಿಗೆ ಸಿಕ್ಕ ಅನೇಕ ಅವಕಾಶಗಳನ್ನು ಕೈಚೆಲ್ಲಿದರು. ಪರಿಣಾಮ ಪಂದ್ಯ ಟೈಬ್ರೇಕರ್‌ ಹಂತ ತಲುಪಿ ಹರಿಕಾ ಸೋತು ಹೋದರು. ಈ ಮೂಲಕ ಹರಿಕಾ ಮತ್ತೂಮ್ಮೆ ವಿಶ್ವ ಮಹಿಳಾ ಚೆಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನ ಅಥವಾ ಬೆಳ್ಳಿ ಗೆಲ್ಲುವ ಅವಕಾಶವನ್ನು ಕಳೆದುಕೊಂಡರು. ಹರಿಕಾ 2010ರಲ್ಲಿ ಏಶ್ಯನ್‌ ಗೇಮ್ಸ್‌ನಲ್ಲಿ ಕಂಚಿನ ಪದಕ ಜಯಿಸಿದ್ದರು.