ಈ ಬಾರಿ ಮನೆಯಲ್ಲೇ ಹಬ್ಬ ಆಚರಿಸಿ! ಕೇಂದ್ರ ಆರೋಗ್ಯ ಸಚಿವರ ಸಲಹೆ

ಹೊಸದಿಲ್ಲಿ: ಜೀವಗಳನ್ನು ಅಪಾಯಕ್ಕೆ ಒಡ್ಡಿ ಹಬ್ಬ ಆಚರಿಸಬೇಕು ಎಂದು ಯಾವ ಧರ್ಮವೂ ಹೇಳುವುದಿಲ್ಲ. ನಿಮ್ಮ ನಿಮ್ಮ ಮನೆಯಲ್ಲೇ ಇದ್ದು ದೇವರನ್ನು ಪ್ರಾರ್ಥಿಸಬಹುದು.

ಮುಂಬರುವ ಹಬ್ಬಗಳ ಋತುವನ್ನು ಗಮನದಲ್ಲಿ ಇರಿಸಿಕೊಂಡು ಕೇಂದ್ರ ಆರೋಗ್ಯ ಸಚಿವ ಡಾ| ಹರ್ಷವರ್ಧನ್‌ ಈ ಸಲಹೆ ನೀಡಿದ್ದಾರೆ. ದೇಶಾದ್ಯಂತ ಕೊರೊನಾ ವ್ಯಾಪಿಸುವಿಕೆ ಮುಂದುವರಿದಿರುವ ಕಾರಣ ದೇಶವಾಸಿಗಳು ತಮ್ಮ ಸುರಕ್ಷೆಯೊಂದಿಗೆ ರಾಜಿ ಮಾಡಿಕೊಳ್ಳಬಾರದು ಎಂಬ ಸದುದ್ದೇಶದಿಂದ ಅವರು ಈ ಹಿತವಚನ ಹೇಳಿದ್ದಾರೆ.

ಹಬ್ಬ-ಹರಿದಿನಗಳ ನೆಪದಲ್ಲಿ ಜನರು ಗುಂಪುಗೂಡಿ ಒಂದೆಡೆ ಸೇರಿ ಕೊರೊನಾ ಸೋಂಕನ್ನು ಆಹ್ವಾನಿಸದಂತೆ ತಡೆಯುವ ನಿಟ್ಟಿನಲ್ಲಿ ರವಿವಾರ ಅವರು ಸಲಹೆ ನೀಡಿದ್ದಾರೆ.

ಸೋಂಕು ನಾಶವೇ ಧರ್ಮ
ಮನೆಯ ಹೊರಗೆ ಬೆಂಕಿ ಇದೆ ಎಂಬುದು ಗೊತ್ತಿದ್ದರೂ ಧರ್ಮ ಹೇಳುತ್ತದೆ ಎಂದು ನಾವು ಹೊರಗೆ ಹೋಗುವುದಿಲ್ಲ. ಜೀವಗಳನ್ನು ಅಪಾಯಕ್ಕೆ ತಳ್ಳಿ ಹಬ್ಬಗಳನ್ನು ಆಚರಿಸಬೇಕು ಎಂದು ಯಾವ ಧರ್ಮವೂ ಹೇಳುವುದಿಲ್ಲ. ಪ್ರಸ್ತುತ ನಮ್ಮೆಲ್ಲರ ಗುರಿ ಒಂದೇ – ಕೊರೊನಾ ಸೋಂಕನ್ನು ನಾಶ ಮಾಡುವುದು. ಅದನ್ನೇ ನಮ್ಮ ಧರ್ಮವೆಂದು ಭಾವಿಸೋಣ. ಮನೆಗಳಲ್ಲೇ ಇದ್ದು ಕುಟುಂಬ ಸದಸ್ಯರ ಜತೆಗೂಡಿ ಹಬ್ಬದ ಸಂಭ್ರಮವನ್ನು ಸವಿಯೋಣ ಎಂದು ಹರ್ಷವರ್ಧನ್‌ ಕರೆ ನೀಡಿದ್ದಾರೆ.