ತೀರ್ಪಿನ ಬಳಿಕ ಡೇರಾ ಮುಖ್ಯಸ್ಥನ ಲಗೇಜ್‌ ಹೊತ್ತು ನಡೆದ ಎಡಿಜಿ ವಜಾ

ಚಂಡೀಗಢ : ಅತ್ಯಾಚಾರ ಪ್ರಕರಣದ ಅಪರಾಧಿ ಎಂದು ಡೇರಾ ಸಚ್ಚಾ ಸೌದಾ ಮುಖ್ಯಸ್ಥ ಗುರುಮೀತ್‌ ರಾಮ್‌ ರಹೀಮ್‌ ವಿರುದ್ಧ ನ್ಯಾಯಾಲಯ ತೀರ್ಪು ನೀಡಿದ ಬಳಿಕ ಆತನ ಲಗ್ಗೇಜ್‌ಗಳನ್ನು ಎತ್ತಿಕೊಂಡು ಆತನೊಂದಿಗೆ ನಡೆದ ಹರಿಯಾಣದ ಡೆಪ್ಯುಟಿ ಅಡ್ವೋಕೇಟ್‌ ಜನರಲ್‌ ಗುರುದಾಸ್‌ ಸಿಂಗ್‌ ಸಾಲ್ವಾರಾ ಅವರನ್ನು ಹುದ್ದೆಯಿಂದ ವಜಾಗೊಳಿಸಲಾಗಿದೆ. 

ಹರಿಯಾಣ ಅಡ್ವೋಕೇಟ್‌ ಜನರಲ್‌ ಬಲದೇವ್‌ ರಾಜ್‌ ಮಹಾಜನ್‌ ಅವರ ಶಿಫಾರಸಿನ ಮೇರೆಗೆ ಡಿಎಜಿ ಗುರುದಾಸ್‌ ಸಾಲ್ವಾರಾ ಅವರನ್ನು ಹರಿಯಾಣ ರಾಜ್ಯ ಸರಕಾರ ಸೇವೆಯಿಂದ ಕಿತ್ತು ಹಾಕಿದೆ ಎಂದು ವರದಿಗಳು ತಿಳಿಸಿವೆ.

ಇದೇ ವೇಳೆ ಡೇರಾ ಮುಖ್ಯಸ್ಥನಿಗೆ ನೀಡಲಾಗಿದ್ದ ಝಡ್‌ ಪ್ಲಸ್‌ ವರ್ಗದ ಭದ್ರತೆಯನ್ನು ಕೂಡ ಸರಕಾರ ಕಿತ್ತು ಹಾಕಿರುವುದಾಗಿ ವರದಿಯಾಗಿದೆ.