ಹರಿಪ್ರಿಯಾ ಅಭಿನಯದ “ಸೂಜಿದಾರ’ಸೆಪ್ಟೆಂಬರ್‌ 3ರಿಂದ

ದಿನಕರ್‌ ತೂಗುದೀಪ ನಿರ್ದೇಶನದ ಹೊಸ ಚಿತ್ರವನ್ನು ಹರಿಪ್ರಿಯಾ ಇತ್ತೀಚೆಗಷ್ಟೇ ಒಪ್ಪಿಕೊಂಡಿದ್ದಾಗಿದೆ. ಈ ಮಧ್ಯೆ ಅವರು “ಸೂಜಿದಾರ’ ಎನ್ನುವ ಇನ್ನೊಂದು ಹೊಸ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಈಗಾಗಲೇ ಚಿತ್ರದ ಫೋಟೋಶೂಟ್‌ ಆಗಿದ್ದು, ಸೆಪ್ಟೆಂಬರ್‌ 3ರಿಂದ ಚಿತ್ರೀಕರಣ ಪ್ರಾರಂಭವಾಗಲಿದೆ.

ಈ ಚಿತ್ರವನ್ನು ನಿರ್ದೇಶಿಸುತ್ತಿರುವವರು ಖ್ಯಾತ ರಂಗಕರ್ಮಿ ಮೌನೇಶ್‌ ಬಡಿಗೇರ್‌. ರಂಗಭೂಮಿಯಲ್ಲಿ ಹಲವು ವರ್ಷಗಳ ಕಾಲ ನಿರ್ದೇಶಕರಾಗಿ ಗುರುತಿಸಿಕೊಂಡ ಅವರು, ಕೆಲವು ಚಿತ್ರಗಳಿಗೆ ಹಿನ್ನೆಲೆಯಲ್ಲಿ ಕೆಲಸ ಮಾಡಿದ್ದರು. ಇದೀಗ ಮೊದಲ ಬಾರಿಗೆ ನಿರ್ದೇಶನಕ್ಕಿಳಿದಿದ್ದಾರೆ. ಕಥೆಗಾರ ಇಂದ್ರಕುಮಾರ್‌ ಅವರ ಸಣ್ಣಕಥೆಯು ಈ ಚಿತ್ರಕ್ಕೆ ಸ್ಫೂರ್ತಿ ಪಡೆದು, ಈ ಚಿತ್ರವನ್ನು ನಿರ್ದೇಶಿಸುವುದಕ್ಕೆ ಹೊರಟಿದ್ದಾರೆ.

ಚಿತ್ರವನ್ನು ನಿರ್ಮಿಸುತ್ತಿರುವವರು ಸಚೇಂದ್ರನಾಥ್‌ ನಾಯಕ್‌ ಮತ್ತು ಅಭಿಜಿತ್‌ ಕೋಟೆಗಾರ್‌. ಈ ಚಿತ್ರದಲ್ಲಿ ಹರಿಪ್ರಿಯಾ ಜೊತೆಗೆ ಯಶವಂತ್‌ ಶೆಟ್ಟಿ, ಅಚ್ಯುತ್‌ ಕುಮಾರ್‌, ಸುಚೇಂದ್ರ ಪ್ರಸಾದ್‌, ಚೈತ್ರ, ಹರೀಶ್‌ ಸಮಷ್ಠಿ, ನಾಗರಾಜ್‌ ಪತ್ತಾರ್‌ ಮುಂತಾದವರು ನಟಿಸುತ್ತಿದ್ದು, ಚಿತ್ರಕ್ಕೆ ಅಶೋಕ್‌ ವಿ. ರಾಮನ್‌ ಅವರ ಛಾಯಾಗ್ರಹಣ ಮತ್ತು ಭಿನ್ನಷಡ್ಜ ಅವರ ಸಂಗೀತವಿದೆ.