ಕರಕುಶಲ ಮಂಡಳಿ- ಕರಕುಶಲಕರ್ಮಿಗಳು ಮುಖಾಮುಖೀಯಾದಾಗ

ಉಡುಪಿ: ಮಣಿಪಾಲ ಹೆರಿಟೇಜ್‌ ವಿಲೇಜ್‌ನಲ್ಲಿ ಸೋಮವಾರ ಕರಕುಶಲ ಕಲೆಗೆ ಸಂಬಂಧಿಸಿ ಎರಡು ವಿಭಿನ್ನ ಸನ್ನಿವೇಶಗಳು ಕಂಡುಬಂದವು. ಭಾರತೀಯ ಕರಕುಶಲ ಮಂಡಳಿ (ಕ್ರಾಫ್ಟ್ ಕೌನ್ಸಿಲ್‌ ಆಫ್ ಇಂಡಿಯ- ಸಿಸಿಐ) ರಾಷ್ಟ್ರೀಯ ಅಧಿವೇಶನಕ್ಕಾಗಿ ದೇಶದ ವಿವಿಧೆಡೆಗಳಿಂದ ಆಗಮಿಸಿದ ಹೈಫೈ, ಹೈಟೆಕ್‌ ಜನರು ಒಂದೆಡೆಯಾದರೆ, ಬುಟ್ಟಿ ನೇಯುವ ಕೊರಗ ಸಮುದಾಯದ ಕುಶಲಕರ್ಮಿಗಳು, ಮಡಕೆ ತಯಾರಿಸುವ ಕುಂಭ ಕಲಾವಿದರು, ಉಡುಪಿ ಸೀರೆಯ ಮಳಿಗೆಯವರು ಇನ್ನೊಂದೆಡೆ ಕಂಡುಬಂದರು.

ಅಧಿವೇಶನಕ್ಕೆ ಆಗಮಿಸಿದವರಲ್ಲಿ ಬಹು ಮಂದಿ ಮಲ್ಲಿಗೆ ಹಾರಗಳಿಂದ ಶೋಭಿತರಾಗಿ ಇಂಗ್ಲಿಷ್‌ನಲ್ಲಿ ಮಾತನಾಡುತ್ತಾ ಪ್ರಫ‌ುಲ್ಲವದನರಾಗಿದ್ದರು. ಇನ್ನೊಂದೆಡೆ ಸಭಾಂಗಣದ ಹೊರಗೆ ಬುಟ್ಟಿ ನೇಯುತ್ತಿದ್ದ ಕೊರಗ ಸಮುದಾಯದ ಕುಶಲಕರ್ಮಿ, ಕುಂಭಾಸಿಯ ರಾಜಶ್ರೀ ಆಗಂತುಕರ ಗಮನ ಸೆಳೆಯದೆ ಇರಲಾರರು. ಇವರು ತನ್ನ ಪಾಡಿಗೆ ಬೀಳುಗಳನ್ನು ಸರಿಪಡಿಸುತ್ತ ಬುಟ್ಟಿ ನೇಯುವ ಕಾಯಕದಲ್ಲಿ ನಿರತರಾಗಿದ್ದರು. ಇವರ ಸುತ್ತಮುತ್ತ ಗೆರಸಿ, ನಾನಾ ಬಗೆಯ ಹೂ ಬುಟ್ಟಿಗಳು, ಹೆಡಗೆ ಮತ್ತು ಕಚ್ಚಾಸಾಮಗ್ರಿಗಳಾದ ಬೀಳು, ಬಿದಿರು (ತೆಮೆ) ಇತ್ಯಾದಿ ನೈಸಗಿಕ ಸಾಮಾಗ್ರಿಗಳು ಇದ್ದವು.

ಇನ್ನೊಂದೆಡೆಗೆ ಕಾರ್ಕಳ ಮಾಳ ಕಡಾರಿಯ ಅಣ್ಣು ಮೂಲ್ಯ ತರಹೇವಾರಿಯ ಮಣ್ಣಿನಿಂದ ತಯಾರಿಸಿದ ಮಡಕೆ, ಹೂಜಿ, ಬೋಗುಣಿಗಳನ್ನು ಪ್ರದರ್ಶನಕ್ಕಾಗಿ ತಂದಿದ್ದರು. ಆಗಮಿಸಿ ದವರು ರಾಜಶ್ರೀ ಮತ್ತು ಅಣ್ಣು ಮೂಲ್ಯರಿಂದ ಸಾಮಗ್ರಿಗಳನ್ನು ಖರೀದಿಸುತ್ತಿದ್ದರು. ಇಲ್ಲೇ ಪಕ್ಕದಲ್ಲಿ ದೈವಗಳ ಮುಖವಾಡಗಳು, ಮರದ ಉರುಗಳೂ ಅಧಿವೇಶನದ ಪ್ರತಿನಿಧಿಗಳಲ್ಲಿ ಕುತೂಹಲ ಮೂಡಿಸಿದವು. ಉಡುಪಿ ಸೀರೆಗಳನ್ನು ಪ್ರಚುರಪಡಿಸುತ್ತಿರುವ ಕದಿಕೆ ಟ್ರಸ್ಟ್‌ನವರ ಮಳಿಗೆಯಲ್ಲಿ ಉಡುಪಿಯ ಕೈಮಗ್ಗದ ಸೀರೆ, ಹತ್ತಿ ಬಟ್ಟೆಯ ಧೋತಿ, ಅಂಗಿಗಳು ಇದ್ದವು.

ಅಧಿವೇಶನದಲ್ಲಿ ಭಾಷಣಕಾರರು ಕರಕುಶಲ ಕ್ಷೇತ್ರ ಎದುರಿಸುತ್ತಿರುವ ಸಮಸ್ಯೆಗಳನ್ನು ಅಂಕಿಅಂಶ ಸಹಿತವಾಗಿ ಬಿಚ್ಚಿಟ್ಟರೆ, ಹೊರಗಿರುವ ಕುಶಲಕರ್ಮಿಗಳಿಗೆ ಇದೇನೆಂದೇ ತಿಳಿದಿರದೆ ತಮ್ಮ ಕೆಲಸದಲ್ಲಿ ಮಗ್ನರಾಗಿದ್ದರು.