ವಿಶ್ವಕಪ್‌ ಬಳಿಕ ಹಮೀದ್‌ ನಿವೃತ್ತಿ

ಕಾಬೂಲ್‌: ಮೂರು ವರ್ಷಗಳ ಬಳಿಕ ರಾಷ್ಟ್ರೀಯ ತಂಡಕ್ಕೆ ಕರೆ ಪಡೆದು, ಅಫ್ಘಾನಿಸ್ಥಾನದ ವಿಶ್ವಕಪ್‌ ತಂಡಕ್ಕೆ ಆಯ್ಕೆಯಾಗಿ ಅಚ್ಚರಿ ನಿರ್ಮಿಸಿದವರು 31ರ ಹರೆಯದ ಬಲಗೈ ಪೇಸ್‌ ಬೌಲರ್‌ ಹಮೀದ್‌ ಹಸನ್‌. ಆದರೆ ಈ ಕೂಟದ ಬಳಿಕ ತಾನು ಏಕದಿನ ಕ್ರಿಕೆಟಿಗೆ ವಿದಾಯ ಹೇಳುವುದಾಗಿ ಅವರು ತಿಳಿಸಿದ್ದಾರೆ.

ಎಲ್ಲ ಕ್ರಿಕೆಟಿಗರೂ ಒಂದಲ್ಲ ಒಂದು ದಿನ ನಿವೃತ್ತರಾಗಲೇ ಬೇಕು. ಆದರೆ ಉತ್ತಮ ಪ್ರದರ್ಶನ ನೀಡುವಾಗಲೇ ದೂರ ಸರಿಯುವುದು ಉತ್ತಮ ನಿರ್ಧಾರ. ಆತ ಯಾವತ್ತೂ ತಂಡಕ್ಕೆ ಹೊರೆಯಾಗಬಾರದು. ಹೀಗಾಗಿ ನಾನು ಈ ವಿಶ್ವಕಪ್‌ ಬಳಿಕ ಏಕದಿನ ಕ್ರಿಕೆಟಿಗೆ ವಿದಾಯ ಹೇಳಲು ಬಯಸಿದ್ದೇನೆ. ಆದರೆ ಟಿ20ಯಲ್ಲಿ ಮುಂದುವರಿಯಲಿದ್ದೇನೆ ಎಂದು ಹಮೀದ್‌ ಹಸನ್‌ ಹೇಳಿದ್ದಾರೆ.

ಪದೇ ಪದೇ ಗಾಯಾಳಾಗಿ ತಂಡದಿಂದ ಹೊರಬೀಳುತ್ತಲೇ ಇದ್ದ ಹಮೀದ್‌ ಹಸನ್‌, 32 ಏಕದಿನ ಪಂದ್ಯಗಳಲ್ಲಿ ಅಫ್ಘಾನಿಸ್ಥಾನವನ್ನು ಪ್ರತಿನಿಧಿಸಿ 56 ವಿಕೆಟ್‌ ಕೆಡವಿದ್ದಾರೆ. 45 ರನ್ನಿಗೆ 5 ವಿಕೆಟ್‌ ಕೆಡವಿದ್ದು ಅತ್ಯುತ್ತಮ ಸಾಧನೆ.