ಗ್ರೀನ್‌ ಕಾರ್ಡ್‌ ಹೆಚ್ಚಳ ವಿಧೇಯಕ ಮಂಡನೆ

ವಾಷಿಂಗ್ಟನ್‌: ಕೆಲ ದಿನಗಳ ಹಿಂದಷ್ಟೇ ಎಚ್‌1-ಬಿ ವೀಸಾ ಬಗ್ಗೆ ಆತಂಕಕ್ಕೆ ಒಳಗಾಗಿದ್ದ ಭಾರತದ ಐಟಿ ಉದ್ಯಮಿಗಳಿಗೆ ಅಮೆರಿಕ ಸಂಸತ್‌ನಿಂದ ನೆಮ್ಮದಿ ಸುದ್ದಿ ಹೊರಬಿದ್ದಿದೆ. ಮೆರಿಟ್‌ ಆಧಾರದಲ್ಲಿ ವಲಸೆ ಮತ್ತು ಗ್ರೀನ್‌ ಕಾರ್ಡ್‌ ನೀಡುವ ವಾರ್ಷಿಕ ಪ್ರಮಾಣವನ್ನು ಶೇ.45ರಷ್ಟು ಹೆಚ್ಚಿಸುವ ಬಗೆಗಿನ ಮಸೂದೆಯನ್ನು ಅಮೆರಿಕದ ಹೌಸ್‌ ಆಫ್ ರೆಪ್ರಸೆಂಟೇಟಿವ್ಸ್‌ನಲ್ಲಿ ಮಂಡಿಸಲಾಗಿದೆ. “ಸೆಕ್ಯೂರಿಂಗ್‌ ಅಮೆರಿಕಸ್‌ ಫ್ಯೂಚರ್‌’ ಹೆಸರಿನ ಈ ಕಾಯ್ದೆಗೆ ಸಂಸತ್ತಿನ ಮನ್ನಣೆ ಸಿಕ್ಕು, ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಸಹಿ ಬಿದ್ದರೆ, ಲಕ್ಷಾಂತರ ಭಾರತೀಯ ಟೆಕ್ಕಿಗಳಿಗೆ ಲಾಭವಾಗಲಿದೆ. 

ಯೋಗ್ಯತೆ ಆಧಾರದಲ್ಲಿ ವಲಸೆ ಅಂಶದಡಿ ಹತ್ತು ಹಲವಾರು ಮಾದರಿ ವೀಸಾ ನೀಡುವ ಬದಲು ಕೆಲವೇ ಮಾದರಿ ವೀಸಾ ಪದ್ಧತಿ ಅಳವಡಿಸಿಕೊಳ್ಳಲು ಕಾಯ್ದೆಯಲ್ಲಿ ಸೂಚಿಸಲಾಗಿದೆ. ಇದು ಜಾರಿಗೊಂಡರೆ, ಅಮೆರಿಕಕ್ಕೆ ವಾರ್ಷಿಕ ವಲಸಿಗರ ಸಂಖ್ಯೆ ಈಗಿರುವ ಹತ್ತೂವರೆ ಲಕ್ಷದಿಂದ 2 ಲಕ್ಷದ 60 ಸಾವಿರಕ್ಕೆ ಇಳಿಯಲಿದೆ. ಇನ್ನು, ಪೌರತ್ವ ನೀಡಿಕೆ ಶೇ. 45ರಷ್ಟು ಹೆಚ್ಚಾದರೆ, ಸದ್ಯಕ್ಕಿರುವ 1,20,000 ಪೌರತ್ವದ ಬದಲು 1,75,000 ಜನರಿಗೆ ಪೌರತ್ವ ಸಿಗಲಿದೆ.