H.1B ವೀಸಾ ಮರು ನವೀಕರಣ ಸುಲಭ: ಭಾರತೀಯರಿಗೆ ಅನುಕೂಲ

ವಾಷಿಂಗ್ಟನ್‌: ಅಮೆರಿಕದಲ್ಲಿ ತಾಂತ್ರಿಕ ಕ್ಷೇತ್ರದ ಪರಿಣಿತರಿಗೆ ಅನುಕೂಲವಾಗುವಂತೆ ಇರುವ ಎಚ್‌-1ಬಿ ವೀಸಾ ನವೀಕರಣಕ್ಕೆ ಹೊಸ ವ್ಯವಸ್ಥೆ ಜಾರಿಗೊಳಿಸಲಾಗಿದೆ. ಅಂಥ ವೀಸಾ ಹೊಂದಿದವರು ಅಮೆರಿಕದಿಂದ ತಮ್ಮ ದೇಶಕ್ಕೆ ತೆರಳದೆ ವೀಸಾ ನವೀಕರಿಸುವುದಕ್ಕೆ ಅವಕಾಶ ಕಲ್ಪಿಸಿಕೊಡಲಾಗಿದೆ. ಪ್ರಾಯೋಗಿಕವಾಗಿ 20 ಸಾವಿರ ವೀಸಾಗಳಿಗೆ ಅದನ್ನು ಅನ್ವಯಗೊಳಿಸಲು ಶ್ವೇತಭವನದ ಪರಿಶೀಲನಾ ಸಮಿತಿ ನಿರ್ಧರಿಸಿದೆ.

ಭಾರತದ ಪ್ರಧಾನಿ ನರೇಂದ್ರ ಮೋದಿಯವರು ಜೂನ್‌ನಲ್ಲಿ ಅಮೆರಿಕ ಪ್ರವಾಸ ಕೈಗೊಂಡಿದ್ದ ವೇಳೆ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್‌ ಜತೆಗಿನ ದ್ವಿಪಕ್ಷೀಯ ಮಾತುಕತೆ ವೇಳೆ ಈ ಅಂಶ ಪ್ರಸ್ತಾವವಾಗಿತ್ತು. ಇದರ ಅನ್ವಯ ಮಾಹಿತಿ ಮತ್ತು ನಿಯಂತ್ರಣ ವ್ಯವಹಾರಗಳ ಕಚೇರಿ (ಒಐಆರ್‌ಎ) ಡಿ.15ರಿಂದಲೇ ಯಾರಿಗೆ ಸ್ವದೇಶಕ್ಕೆ ತೆರಳದೆ ವೀಸಾ ಪುನರ್‌ ನವೀಕರಣಕ್ಕೆ ಅವಕಾಶ ಕೊಡಬಹುದು ಎಂಬ ಬಗ್ಗೆ ಪರಿಶೀಲನೆ ಆರಂಭಿಸಿತ್ತು.