ಅಹ್ಮದಾಬಾದ್‌: ಪ್ರೊ ಕಬಡ್ಡಿ ಲೀಗ್‌ ಐದರಲ್ಲಿ ಆತಿಥೇಯ ಗುಜರಾತ್‌ ತಂಡ ಅಮೋಘ ಪ್ರದರ್ಶನ ನೀಡುತ್ತಿದೆ. ತವರಿನಲ್ಲಿ ನಡೆದ ಮೂರನೇ ಪಂದ್ಯದಲ್ಲಿ ಗುಜರಾತ್‌ ಜೈಪುರ ಪಿಂಕ್‌ ಪ್ಯಾಂಥರ್ ತಂಡವನ್ನು 27-20 ಅಂಕಗಳಿಂದ ಮಣಿಸಿದೆ.
ಯು ಮುಂಬಾ ಮತ್ತು ದಬಾಂಗ್‌ ಡೆಲ್ಲಿ ತಂಡವನ್ನು ಕೆಡಹಿದ್ದ ಗುಜರಾತ್‌ ರವಿವಾರದ ಪಂದ್ಯದಲ್ಲಿಯೂ ಜೈಪುರವನ್ನು ಮಣಿಸಿ ತವರಿನಲ್ಲಿ ಸತತ ಮೂರನೇ ಗೆಲುವು ದಾಖಲಿಸಿದೆ. ಈ ಗೆಲುವಿನಿಂದ ಗುಜರಾತ್‌ ಇಷ್ಟರವರೆಗೆ ಆಡಿದ ಆರು ಪಂದ್ಯಗಳಲ್ಲಿ ನಾಲ್ಕು ಗೆಲುವಿನೊಂದಿಗೆ ಒಟ್ಟು 23 ಅಂಕ ಪಡೆದು “ಎ’ ವಲಯದಲ್ಲಿ ಅಗ್ರಸ್ಥಾನದಲ್ಲಿದೆ.
ದಿನದ ಇನ್ನೊಂದು ಪಂದ್ಯದಲ್ಲಿ ಹಾಲಿ ಚಾಂಪಿಯನ್‌ ಪಾಟ್ನಾ ಪೈರೇಟ್ಸ್‌ ತಂಡವು ಆಕ್ರಮಣಕಾರಿ ಆಟವಾಡಿದ ಯುಪಿ ಯೋಧಾ ತಂಡದೆದುರು ಸೋಲು ತಪ್ಪಿಸಿಕೊಂಡಿದೆ. ಪಂದ್ಯದ ಬಹುತೇಕ ಸಮಯ ಮುನ್ನಡೆಯಲ್ಲಿದ್ದ ಯುಪಿ ತಂಡ ಕೊನೆ ಹಂತದಲ್ಲಿ ಎಡವಿತು. ಅಂತಿಮ ಹಂತದಲ್ಲಿ ಹಲವು ಅಂಕ ಬಾಚಿದ ಪಾಟ್ನಾ ಪಂದ್ಯವನ್ನು ಟೈಗೊಳಿಸಲು ಯಶಸ್ವಿಯಾಯಿತು.
ಪ್ರೊ ಕಬಡ್ಡಿಗೆ ಸೋಮವಾರ ವಿಶ್ರಾಂತಿ ದಿನವಾಗಿದೆ. ಮಂಗಳವಾರದ ಪಂದ್ಯದಲ್ಲಿ ಬೆಂಗಾಲ್‌ ತಂಡವು ಪುನೇರಿ ತಂಡವನ್ನು ಹಾಗೂ ಎರಡನೇ ಪಂದ್ಯದಲ್ಲಿ ಗುಜರಾತ್‌ ತಂಡವು ಬೆಂಗಳೂರು ಬುಲ್ಸ್‌ ತಂಡವನ್ನು ಎದುರಿಸಲಿದೆ.
ಇಂದು ಪ್ರೊ ಕಬಡ್ಡಿಗೆ ವಿಶ್ರಾಂತಿ; ಮಂಗಳವಾರ ನಡೆಯುವ ಪಂದ್ಯಗಳು
ಪುನೇರಿ -ಬೆಂಗಾಲ್‌
ಆರಂಭ: ರಾತ್ರಿ 8.00
ಗುಜರಾತ್‌-ಬೆಂಗಳೂರು
ಆರಂಭ: ರಾತ್ರಿ 9.00
