“ಸ್ವಾವಲಂಬನಾ ವನಿತೆ’ಯರಿಂದ ಗೌನ್‌ ತಯಾರಿ

ವಂಡ್ಸೆ: ಕೋವಿಡ್ 19 ವೈರಸ್‌ ವಿರುದ್ಧ ಹೋರಾಡುತ್ತಿರುವ ವೈದ್ಯರು, ನರ್ಸ್‌, ಆರೋಗ್ಯ ಸಹಾಯಕಿಯರು ಮತ್ತು ಸಿಬಂದಿಯ ರಕ್ಷಣೆಗಾಗಿ ರಕ್ಷಾ ಕವಚ (ಪ್ರೊಟೆಕ್ಟೀವ್‌ ಗೌನ್‌) ಅನ್ನು ವಂಡ್ಸೆ ಗ್ರಾ.ಪಂ. ಅಧೀನದ “ಮಹಿಳಾ ಸ್ವಾವಲಂಬನಾ’ ಕೇಂದ್ರದ ವನಿತೆಯರು ತಯಾರಿಸುತ್ತಿದ್ದಾರೆ.

“ಸ್ವಾವಲಂಬನಾ’ ಎನ್ನುವ ಮಹಿಳೆಯರ ಹೊಲಿಗೆ ವೃತ್ತಿ ಮತ್ತು ತರಬೇತಿ ಕೇಂದ್ರ ಹಾಗೂ ಪರಿಸರಸ್ನೇಹಿ ಬ್ಯಾಗ್‌ ತಯಾರಿಕಾ ಕೇಂದ್ರದ ಸದಸ್ಯರು ಈ ಮೊದಲು ಜಿಲ್ಲಾಡಳಿತ ಹಾಗೂ ಜಿಲ್ಲಾ ಆರೋಗ್ಯ ಇಲಾಖೆಯ ನಿರ್ದೇಶನದಂತೆ ಪರಿಸರ ಸ್ನೇಹಿ ಮಾಸ್ಕ್ ಗಳನ್ನು ತಯಾರಿಸಿದ್ದು, ಈಗ ರಕ್ಷಾ ಕವಚ (ಗೌನ್‌) ಅನ್ನು ತಯಾರಿಸುತ್ತಿದ್ದಾರೆ.

ಇಲ್ಲಿ ಸದ್ಯ 30 ಮಂದಿ ಸದಸ್ಯರಿದ್ದು, ಆದರೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವ ನಿಟ್ಟಿನಲ್ಲಿ ಕೇಂದ್ರದಲ್ಲಿ 5-6 ಮಂದಿ ಮಾತ್ರ ಬಟ್ಟೆಯ ಮಾಸ್ಕ್ ಗಳನ್ನು ಸಿದ್ಧಪಡಿಸುತ್ತಿದ್ದು, ಬಾಕಿ ಉಳಿದ ಸದಸ್ಯರು ತಮ್ಮ ಮನೆಯಿಂದಲೇ ತಯಾರಿಸಿಕೊಡುತ್ತಿದ್ದಾರೆ.

ಈ ಸ್ವಾವಲಂಬನಾ ಕೇಂದ್ರದಲ್ಲಿ ಈ ವರೆಗೆ 14,200ಕ್ಕೂ ಅಧಿಕ ಮಾಸ್ಕ್ ಗಳನ್ನು ತಯಾರಿಸಿ ಜಿಲ್ಲಾ ಆರೋಗ್ಯ ಇಲಾಖೆಗೆ ನೀಡಲಾಗಿದೆ.