ರಕ್ಷಣಾ ಸಚಿವಾಲಯದ ಅಂತರ್ಜಾಲ ತಾಣ ಹ್ಯಾಕ್‌

ಹೊಸದಿಲ್ಲಿ: ಚೀನದ ಹ್ಯಾಕರ್‌ ಗಳು ಶುಕ್ರವಾರ ರಕ್ಷಣಾ ಸಚಿವಾಲಯದ ವೆಬ್‌ಸೈಟ್‌ ಅನ್ನೇ ಹ್ಯಾಕ್‌ ಮಾಡಿದ ಘಟನೆ ನಡೆದಿದೆ. ವೆಬ್‌ಸೈಟ್‌ ಅನ್ನು ತೆರೆಯುತ್ತಿದ್ದಂತೆ ಅದರಲ್ಲಿ ಚೀನೀ ಭಾಷೆಯ ಅಕ್ಷರಗಳು ಕಾಣಿಸುತ್ತಿದ್ದು, ಇದು ಚೀನದ ಹ್ಯಾಕರ್‌ಗಳದ್ದೇ ಕೆಲಸ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌, ‘ಸದ್ಯದಲ್ಲೇ ವೆಬ್‌ಸೈಟ್‌ ಅನ್ನು ಮೊದಲಿನ ಸ್ಥಿತಿಗೆ ತರಲಾಗುವುದು. ಜತೆಗೆ, ಭವಿಷ್ಯದಲ್ಲಿ ಇಂತಹ ಘಟನೆ ಮರುಕಳಿಸದಂತೆ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು’ ಎಂದು ಹೇಳಿದ್ದಾರೆ.

ಎಲೆಕ್ಟ್ರಾನಿಕ್ಸ್‌ ಮತ್ತು ಮಾಹಿತಿ ತಂತ್ರಜ್ಞಾನ ಇಲಾಖೆಯ ಅಡಿ ಬರುವ ನ್ಯಾಷನಲ್‌ ಇನಾ#ರ್ಮೇಟಿಕ್ಸ್‌ ಸೆಂಟರ್‌ ಎಂಬ ಸಂಸ್ಥೆ ಈ ವೆಬ್‌ಸೈಟ್‌ನ ನಿರ್ವಹಣೆ ನೋಡಿಕೊಳ್ಳುತ್ತಿದೆ. ಇದರ ಬೆನ್ನಲ್ಲೇ ಕೇಂದ್ರ ಗೃಹ ಇಲಾಖೆ ಹಾಗೂ ಕಾನೂನು ಸಚಿವಾಲಯದ ವೆಬ್‌ಸೈಟ್‌ಗಳೂ ಡೌನ್‌ ಆಗಿವೆ. ಆದರೆ, ಈ ಕುರಿತು ಪ್ರತಿಕ್ರಿಯಿಸಿರುವ ರಾಷ್ಟ್ರೀಯ ಸೈಬರ್‌ ಭದ್ರತಾ ಮುಖ್ಯಸ್ಥ ಗುಲ್ಶನ್‌ ರೈ, ‘ಯಾವುದೇ ಇಲಾಖೆಯ ವೆಬ್‌ಸೈಟ್‌ ಹ್ಯಾಕ್‌ ಆಗಿಲ್ಲ. ಇದು ಹಾರ್ಡ್‌ವೇರ್‌ ಸಂಬಂಧಿತ ಸಮಸ್ಯೆ’ ಎಂದಿದ್ದಾರೆ.