12 ಕೀಟನಾಶಕಗಳ ನಿಷೇಧಿಸಿದ ಕೇಂದ್ರ

ನವದೆಹಲಿ: ದೇಶದಲ್ಲಿ ಉಪಯೋಗಿಸಲಾಗುತ್ತಿದ್ದ 12 ಕೀಟನಾಶಕಗಳನ್ನು ತಕ್ಷಣದಿಂದ ಜಾರಿಗೊಳ್ಳುವಂತೆ ನಿಷೇಧಿಸಿ ಕೇಂದ್ರ ಸರ್ಕಾರ ಆದೇಶ ಹೊರಡಿಸಿದೆ. 2020ರ ಡಿಸೆಂಬರ್‌ ವೇಳೆಗೆ ಇನ್ನೂ 6 ಕೀಟನಾಶಕಗಳನ್ನು ನಿಷೇಧಿಸಲೂ ನಿರ್ಧರಿಸಲಾಗಿದೆ. ಇವುಗಳ ಉಪಯೋದಿಂದ ಮನುಷ್ಯರು ಹಾಗೂ ಪ್ರಾಣಿಗಳ ಮೇಲೆ ದುಷ್ಪರಿಣಾಮ ಉಂಟಾಗುತ್ತಿರುವ ಹಿನ್ನೆಲೆಯಲ್ಲಿ  ಅವುಗಳ ವಿರುದ್ಧ ಕ್ರಮಕ್ಕೆ ಶಿಫಾರಸು ಮಾಡಲಾಗಿದೆ.

ದುಷ್ಪರಿಣಾಮಕಾರಿ ಕೀಟನಾಶಕಗಳನ್ನು ಪಟ್ಟಿ ಮಾಡಲು 2013ರಲ್ಲಿ ರಚನೆಗೊಂಡಿದ್ದ ತಜ್ಞರ ಸಮಿತಿ ದೇಶದಲ್ಲಿ ಬಳಕೆಯಲ್ಲಿರುವ 66 ಪ್ರಮುಖ ಕೀಟನಾಶಕಗಳನ್ನು ಅಧ್ಯಯನ ಮಾಡಿತ್ತು. 66 ಕೀಟನಾಶಕಗಳು ಜಗತ್ತಿನ ಇತರ ರಾಷ್ಟ್ರಗಳಲ್ಲಿ  ನಿಷೇಧಕ್ಕೊಳಗಾಗಿದ್ದರೂ, ಭಾರತದಲ್ಲಿ ಮಾತ್ರ ಅವುಗಳ ಬಳಕೆ ಮುಂದುವರಿದಿತ್ತು. ಹಾಗಾಗಿ, ಎರಡು ವರ್ಷಗಳ ಅಧ್ಯಯನದ ನಂತರ 66ರಲ್ಲಿ 18 ಕೀಟನಾಶಕಗಳನ್ನು ರದ್ದುಗೊಳಿಸುವಂತೆ ಕೇಂದ್ರಕ್ಕೆ ಶಿಫಾರಸು ಮಾಡಿತ್ತು.