ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ಭರದ ಸಿದ್ಧತೆ: ಬೆಟ್ಟದೂರು

ಗೊರೇಬಾಳ: ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್‌ ಆಶ್ರಯದಲ್ಲಿ ಸಿಂಧನೂರಿನಲ್ಲಿ ಅ.22, 23ರಂದು ರಾಯಚೂರು ಜಿಲ್ಲಾ 10ನೇ ಕನ್ನಡ ಸಾಹಿತ್ಯ ಸಮ್ಮೇಳನ ಆಯೋಜಿಸಿದ್ದು, ಸಿದ್ಧತಾ ಕಾರ್ಯ ಭರದಿಂಸ ಆಗಿವೆ ಎಂದು ಕಸಾಪ ಜಿಲ್ಲಾಧ್ಯಕ್ಷ ಡಾ| ಬಸವಪ್ರಭು ಪಾಟೀಲ ಬೆಟ್ಟದೂರು ತಿಳಿಸಿದರು.

ಸಿಂಧನೂರು ನಗರದಲ್ಲಿ ಸುದ್ಧಿಗಾರರೊಂದಿಗೆ ಮಾತನಾಡಿದ ಅವರು, ಈಗಾಗಲೇ ಆಹ್ವಾನ ಪತ್ರಿಕೆಗಳನ್ನು ಮುದ್ರಿಸಿ ಆಜೀವ ಸದಸ್ಯರು, ಕನ್ನಡ ಪರ ಸಂಘಟನೆಗಳು, ಸಾಹಿತಿಗಳಿಗೆ ಹಂಚಲಾಗುತ್ತಿದೆ. ಸಮ್ಮೇಳನ ಯಶಸ್ಸಿಗೆ ಸ್ವಾಗತ, ಮೆರವಣಿಗೆ, ವೇದಿಕೆ, ಆಹಾರ, ಕಿಟ್‌ ವಿತರಣೆ, ಸಾಂಸ್ಕೃತಿಕ, ಆಮಂತ್ರಣ, ಸಮನ್ವಯ, ಆಹಾರ, ಆರೋಗ್ಯ, ನೈರ್ಮಲ್ಯ, ಸಾರಿಗೆ, ಮಹಿಳೆ, ಸಾಮಾಜಿಕ ಜಾಲತಾಣ, ಸಂಪರ್ಕ, ಶಿಸ್ತು ಪಾಲನೆ, ವಸತಿ, ಚಿತ್ರಕಲಾ ಪ್ರದರ್ಶನ, ಪ್ರಚಾರ ಹಾಗೂ ಯುವಕರ ಸಮಿತಿಗಳನ್ನು ರಚಿಸಲಾಗಿದೆ ಎಂದು ಹೇಳಿದರು.

ತಾಲೂಕು ಅಧ್ಯಕ್ಷೆ ಸರಸ್ವತಿ ಪಾಟೀಲ ಹಾಗೂ ಕಾರ್ಯದರ್ಶಿಗಳಾದ ಶಂಕರ ಗುರಿಕಾರ, ಬಸವರಾಜ ಗಸ್ತಿ ನೇತೃತ್ವದಲ್ಲಿ ರಾಜೇಂದ್ರಕುಮಾರ ಶಾಲೆಯಲ್ಲಿ ಉಪಸಮಿತಿಗಳ ಅಧ್ಯಕ್ಷರು, ಕಾರ್ಯದರ್ಶಿಗಳ ಸಭೆ ನಡೆಸಿ ಆಯಾ ಸಮಿತಿಗಳ ಜವಾಬ್ದಾರಿಗಳ ಬಗ್ಗೆ ಮಾಹಿತಿ ನೀಡಲಾಗಿದೆ ಎಂದು ವಿವರಿಸಿದರು.

ಸಮ್ಮೇಳನದ ಮುಖ್ಯ ವೇದಿಕೆಗೆ ಪ್ರಭಾನಂದ ಪಂಡಿತರು ರೌಡಕುಂದ ಅವರ ಹೆಸರನ್ನಿಡಲಾಗಿದೆ. ಆದಯ್ಯಸ್ವಾಮಿ ತಿಮ್ಮಾಪುರ ಅವರ ಹೆಸರನ್ನು ಮಂಟಪಕ್ಕೆ, ಚಿಕ್ಕಯ್ಯಪಂಡಿತ ದೇವರಗುಡಿ ಅವರ ಹೆಸರನ್ನು ಮಹಾದ್ವಾರಕ್ಕೆ ಇಡಲಾಗಿದೆ.

ಕುರ್ಡಿ ಶ್ಯಾಮಸುಂದರದಾಸ, ಮೃಢದೇವ ಗವಾಯಿಗಳು, ಗದ್ರಟಗಿ ಅಮರೇಗೌಡ, ಬಸವಂತರಾಯಗೌಡ, ಎಂ.ಮಲ್ಲಪ್ಪ, ಡೇವಿಡ್‌ ದೀನಸಮುದ್ರ, ಬಳಗಾನೂರು ಮರಿಸ್ವಾಮಿಗಳು, ಎಂ. ಮರಿಬಸವನಗೌಡ, ಕೆ.ನಾಗಪ್ಪ, ಡಾ| ಪ್ರಶಾಂತಿನಿ, ಅಪರಾಳ ತಮ್ಮಣ್ಣ, ತಿಡಿಗೋಳ ಮಹಾಂತಗೌಡ, ಅಯ್ಯಪ್ಪ ತುಕ್ಕಾಯಿ, ನಾರಾಯಣಪ್ಪ ರಾಗಲಪರ್ವಿ, ಜಿ.ವಿ. ಶರ್ಮಾ, ಹುಸೇನಪ್ಪ, ಸೈಯ್ಯದ್‌ ಹಮೀದ್‌ ಹುಸೇನ್‌, ಅಬ್ದುಲ್‌ ಗನಿಸಾಬ್‌, ಪಂಪಾಪತಿ ಗುಡದೂರು ಹಾಗೂ ರಾಗಲಪರ್ವಿ ಶರಣೇಗೌಡ ಅವರ ಹೆಸರುಗಳನ್ನು ವಿವಿಧ ದ್ವಾರಗಳಿಗೆ ಇಡಲಾಗಿದೆ ಎಂದು ವಿವರಿಸಿದರು.

ಅ.22ರಂದು ಶಾಸಕ ವೆಂಕಟರಾವ್‌ ನಾಡಗೌಡ ಧ್ವಜಾರೋಹಣ ನೆರವೇರಿಸುವರು. ಬಸವ ವೃತ್ತದಿಂದ ಪ್ರವಾಸಿ ಮಂದಿರದವರೆಗೆ ಸಮ್ಮೇಳನ ಅಧ್ಯಕ್ಷ ಪ್ರೊ| ಶಾಶ್ವತಸ್ವಾಮಿ ಮುಕ್ಕುಂದಿಮಠ ಹಾಗೂ ತಾಯಿ ಭುವನೇಶ್ವರಿ ಭಾವಚಿತ್ರ ಮೆರವಣಿಗೆ ನಡೆಸಲಾಗುವುದು. ಪ್ರವಾಸಿ ಮಂದಿರದಿಂದ ಸಮ್ಮೇಳನ ನಡೆಯುವ ಕಮ್ಮವಾರಿ ಕಲ್ಯಾಣ ಮಂಟಪದವರೆಗೆ ಬಸ್‌ ವ್ಯವಸ್ಥೆ ಕಲ್ಪಿಸಲಾಗಿದೆ. ನಂತರ ನಡೆಯುವ ಸಮ್ಮೇಳನವನ್ನು ಕಸಾಪ ರಾಜ್ಯಾಧ್ಯಕ್ಷ ಡಾ| ಮನು ಬಳಿಗಾರ ಉದ್ಘಾಟಿಸುವರು. ಜಿಲ್ಲಾ ಉಸ್ತುವಾರಿ ಸಚಿವ ಶ್ರೀರಾಮುಲು, ಸ್ವಾಗತ ಸಮಿತಿ ಅಧ್ಯಕ್ಷ ವೆಂಕಟರಾವ್‌ ನಾಡಗೌಡ, 9ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನ ಅಧ್ಯಕ್ಷ ಡಾ| ರಾಜಶೇಖರ ನೀರಮಾನ್ವಿ, ಕೊಪ್ಪಳ ಸಂಸದ ಕರಡಿ ಸಂಗಣ್ಣ, ರಾಯಚೂರು ಸಂಸದ ರಾಜಾ ಅಮರೇಶ್ವರ ನಾಯಕ, ಕೃಷಿ ಬೆಲೆ ಆಯೋಗ ಅಧ್ಯಕ್ಷ ಹನುಮನಗೌಡ ಬೆಳಗುರ್ಕಿ, ಜಿಪಂ ಅಧ್ಯಕ್ಷೆ ಆದಿಮನಿ ವೀರಲಕ್ಷ್ಮೀ ಸೇರಿದಂತೆ ಜಿಲ್ಲೆಯ ಎಲ್ಲ ತಾಲೂಕುಗಳ ಶಾಸಕರು, ಮಾಜಿ ಸಂಸದರು, ಅಧಿಕಾರಿಗಳು ಪಾಲ್ಗೊಳ್ಳುವರು ಎಂದು ಹೇಳಿದರು.

ಉದ್ಘಾಟನೆ ಸಮಾರಂಭದ ನಂತರ ನಂತರ ಒಕ್ಕಲುತನ, ಜಿಲ್ಲೆಯ ಆಧುನಿಕೋತ್ತರ ಸಾಹಿತ್ಯ, ಸಮ್ಮೇಳನಾಧ್ಯಕ್ಷ ಪ್ರೊ| ಶಾಶ್ವತಸ್ವಾಮಿ ಮುಕ್ಕುಂದಿಮಠರ ಬದುಕು ಬರಹ, ಕಾನೂನು ಅರಿವು-ನೆರವು ಗೋಷ್ಠಿಗಳು ನಡೆಯಲಿವೆ ಎಂದು ಹೇಳಿದರು.

ಅ.23ರಂದು ಸಂಕಿರಣ, ಮಹಿಳಾ ಸಂವೇದನೆ, ಜಿಲ್ಲೆಯ ಇತಿಹಾಸ ಗೋಷ್ಠಿಗಳು ನಡೆಯಲಿವೆ. ಮಧ್ಯಾಹ್ನ ಕವಿಗೋಷ್ಠಿ, ವಿವಿಧ ಕ್ಷೇತ್ರಗಳಲ್ಲಿ ಸೇವೆ ಸಲ್ಲಿಸಿದ ಮಹನಿಯರಿಗೆ ಸನ್ಮಾನ, ಬಹಿರಂಗ ಅ ಧಿವೇಶನ ನಂತರ ಸಮಾರೋಪ ನಡೆಯಲಿದೆ.

ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಡಾ| ರಹಿಮತ ತರಿಕೇರಿ ಮಾತನಾಡುವರು. ಎರಡು ದಿನಗಳ ಕಾಲ ನಡೆಯುವ ಸಮ್ಮೇಳನದಲ್ಲಿ ಎಲ್ಲ ಸಮಿತಿಗಳ ಸದಸ್ಯರು, ಕನ್ನಡ ಪರ ಸಂಘಟನೆಗಳ ಮುಖಂಡರು, ಸಾಹಿತಿಗಳು ಪಾಲ್ಗೊಂಡು ಯಶಸ್ವಿಗೊಳಿಸಬೇಕು ಎಂದು ಮನವಿ ಮಾಡಿದರು.