ವರ್ಕ್‌ ಫ್ರಂ ಹೋಂ ನೌಕರರ ವೇತನಕ್ಕೆ ಗೂಗಲ್‌ ಕತ್ತರಿ?

ವಾಷಿಂಗ್ಟನ್‌: “ವರ್ಕ್‌ ಫ್ರಂ ಹೋಂ’ ಸೌಲಭ್ಯದಡಿ ಮನೆಯಿಂದಲೇ ಕೆಲಸ ಮಾಡುತ್ತಿರುವ ತನ್ನ ಉದ್ಯೋಗಿಗಳ ಮಾಸಿಕ ವೇತನವನ್ನು ಕಡಿತಗೊಳಿಸಲು ಇಂಟರ್‌ನೆಟ್‌ ಸರ್ಚ್‌ ದೈತ್ಯ ಗೂಗಲ್‌  ಚಿಂತನೆ ನಡೆಸಿದೆ.

ಅಂದರೆ, ಶಾಶ್ವತವಾಗಿ ಮನೆಯಿಂದಲೇ ಕೆಲಸ ಮಾಡುವ ಆಯ್ಕೆಯನ್ನು ಮಾಡಿಕೊಳ್ಳುವ ಉದ್ಯೋಗಿಗಳಿಗೆ ಈ ನಿರ್ಧಾರವನ್ನು ಅನ್ವಯಿಸುವ ಬಗ್ಗೆ ಕಂಪನಿಯ ಅಧಿಕಾರಿಗಳು ಆಲೋಚಿಸಿದ್ದಾರೆ. ಇದಕ್ಕೆ ಒಪ್ಪಿಗೆ ದೊರೆತರೆ, ಅಮೆರಿಕದ ಸಿಲಿಕಾನ್‌ ವ್ಯಾಲಿಯ ಉದ್ಯೋಗಿಗಳಿಗೆ ಮೊದಲು ಅನ್ವಯವಾಗಲಿದೆ.

ಈಗಾಗಲೇ, ಟ್ವಿಟರ್‌ ಮತ್ತು ಫೇಸ್‌ಬುಕ್‌ ಕಂಪನಿಗಳು, ಕಂಪನಿಯ ಕಚೇರಿಗಳು ತಮ್ಮಲ್ಲಿ ಈ ನಿಯಮವನ್ನು ಜಾರಿಗೊಳಿಸಿವೆ. ಕಡಿಮೆ ಖರ್ಚಿನ ಊರುಗಳಿಂದಲೇ ಕೆಲಸ ಮಾಡುತ್ತಿರುವ ಉದ್ಯೋಗಿಗಳನ್ನು ಪಟ್ಟಿ ಮಾಡಿ, ಅವರಿಗೆ ನೀಡುವ ವೇತನವನ್ನು ಕಡಿತಗೊಳಿಸಿವೆ.

ಸಣ್ಣ ಐಟಿ ಕಂಪನಿಗಳಾದ, ರೆಡ್ಡಿಟ್‌ ಹಾಗೂ ಝಿಲ್ಲೊ ಕಂಪನಿಗಳೂ ಕೂಡ ಇದೇ ಮಾರ್ಗವನ್ನು ಅಳವಡಿಸಿಕೊಂಡಿವೆ.  ಹಾಗಾಗಿ, ಗೂಗಲ್‌ ಕೂಡ ಈ ಬಗ್ಗೆ ಆಲೋಚಿಸಲು ಆರಂಭಿಸಿದೆ. ಸಿಯಾಟಲ್‌ನಲ್ಲಿ ಕೆಲಸ ಮಾಡುವ ಗೂಗಲ್‌ನ ಉದ್ಯೋಗಿಯೊಬ್ಬರಿಗೆ ಅವರ ವೇತನದಲ್ಲಿ ಶೇ.10 ಕಡಿತವಾಗಲಿದೆಯಂತೆ.