ಗೂಗಲ್‌ ಉದ್ಯೋಗಿಗಳ ಸವಲತ್ತುಗಳಿಗೆ ಕತ್ತರಿ

ವಾಷಿಂಗ್ಟನ್‌: ಈ ವರ್ಷದ ಆರಂಭದಲ್ಲಿ 12,000 ಉದ್ಯೋಗಿಗಳನ್ನು ವಜಾ ಮಾಡುವ ಘೋಷಣೆ ಮಾಡಿದ್ದ ಗೂಗಲ್‌ ಕಂಪನಿ, ಇದೀಗ ವೆಚ್ಚ ಕಡಿತದ ಭಾಗವಾಗಿ ಉದ್ಯೋಗಿಗಳಿಗೆ ನೀಡುತ್ತಿದ್ದ ಹಲವು ಸವಲತ್ತುಗಳಿಗೆ ಕತ್ತರಿ ಹಾಕುವ ಮಾಹಿತಿ ನೀಡಿದೆ.

“ಇನ್ನು ಮುಂದೆ ಉಚಿತ ತಿಂಡಿಗಳು, ಲಾಂಡ್ರಿ ಸೇವೆ, ಮಸಾಜ್‌ ಸೇವೆ ಮತ್ತು ಕಂಪನಿ ಊಟಕ್ಕೆ ಬ್ರೇಕ್‌ ಬೀಳಲಿದೆ. ಇದೇ ವೇಳೆ ಹೊಸ ಉದ್ಯೋಗಿಗಳ ನೇಮಕವೂ ತಗ್ಗಲಿದೆ. ಲ್ಯಾಪ್‌ಟಾಪ್‌ಗ್ಳ ಖರೀದಿಯಲ್ಲೂ ಕಡಿವಾಣ ಬೀಳಲಿದೆ. ಕೆಲಸಕ್ಕೆ ಹೆಚ್ಚು ಆದ್ಯತೆ ನೀಡುವ ನಿಟ್ಟಿನಲ್ಲಿ ಉದ್ಯೋಗಿಗಳ ತಂಡಗಳನ್ನು ಮರುರಚನೆ ಮಾಡಲಾಗುವುದು.

ಹೆಚ್ಚಿನ ಆದ್ಯತೆಯ ಕೆಲಸದ ಮೇಲೆ ಕೇಂದ್ರೀಕರಿಸಲು ಕಂಪನಿಯು ಹಣವನ್ನು ಸಮರ್ಥವಾಗಿ ಬಳಸಬೇಕಾಗಿರುವುದರಿಂದ ಈ ಕ್ರಮಗಳನ್ನು ಕೈಗೊಳ್ಳಲಾಗಿದೆ,’ ಎಂದು ಗೂಗಲ್‌ ಮುಖ್ಯ ಹಣಕಾಸು ಅಧಿಕಾರಿ ರುತ್‌ ಪೊರಾಟ್‌ ತಿಳಿಸಿದ್ದಾರೆ.