ಹುಬ್ಬಳ್ಳಿ: ಎರಡನೇ ದಿನ ಬಸ್‌ ಸಂಚಾರಕ್ಕೆ ಪ್ರಯಾಣಿಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಹುಬ್ಬಳ್ಳಿ ನಗರ ಹಾಗೂ ಗ್ರಾಮೀಣ ಸಾರಿಗೆ ವಿಭಾಗಗಳಿಂದ ಬುಧವಾರ 156 ಬಸ್‌ಗಳನ್ನು ಕಾರ್ಯಾಚರಣೆ ಮಾಡಲಾಗಿದೆ.
ರಾಜ್ಯ ಸರಕಾರ ಬಸ್‌ ಸಂಚಾರಕ್ಕೆ ಅನುಮತಿ ನೀಡಿದ ಮೊದಲ ದಿನ ಎರಡು ವಿಭಾಗಗಳಿಂದ 125 ಬಸ್‌ ಗಳನ್ನು ಕಾರ್ಯಾಚರಣೆ ಮಾಡಲಾಗಿತ್ತು. ಎರಡನೇ ದಿನ 156 ಬಸ್‌ಗಳು ಸಂಚಾರ ಮಾಡಿದ್ದು, ಪ್ರಯಾಣಿಕರ ಸಂಖ್ಯೆ ಕೂಡ ಹೆಚ್ಚಾಗಿದೆ. ದೂರುದ ಊರುಗಳಿಗೆ ಬೆಳಗಿನ ಸಮಯದಲ್ಲೇ ಬಸ್‌ಗಳು ಹೊರಡುವ ಕಾರಣದಿಂದ ಪ್ರಯಾಣಿಕರು ಕೂಡ ಬೆಳಗ್ಗೆ ಬಂದು ಬೆಂಗಳೂರು, ಮೈಸೂರು, ಶಿವಮೊಗ್ಗ ಸೇರಿದಂತೆ ದೂರದ ಊರುಗಳಿಗೆ ಪ್ರಯಾಣ ಬೆಳೆಸಿದರು. ಇನ್ನೂ ಮಹಾನಗರ ವ್ಯಾಪ್ತಿಯಲ್ಲೂ ಕೂಡ ಪ್ರಯಾಣಿಕರ ಸಂಖ್ಯೆಯಲ್ಲಿ ಹೆಚ್ಚಾಗಿದ್ದು, ದಿನ ಕಳೆದಂತೆ ಪ್ರಯಾಣಿಕರ ಸಂಖ್ಯೆ ಹೆಚ್ಚಾಗಬಹುದು ಎಂದು ಅಧಿಕಾರಿಗಳಲ್ಲಿ ನಿರೀಕ್ಷೆ ಮೂಡಿಸಿದೆ.
ಬೆಂಗಳೂರಿಗೆ ಹೆಚ್ಚಿನ ಪ್ರಯಾಣಿಕರು ಸಂಚರಿಸಬಹುದು ಎನ್ನುವ ಹಿನ್ನೆಲೆಯಲ್ಲಿ ಮುಂಗಡ ಟಿಕೆಟ್‌ ಕಾಯ್ದಿರಿಸುವ ವ್ಯವಸ್ಥೆ ಕಲ್ಪಿಸಲಾಗಿತ್ತು. ಹೀಗಾಗಿ ನಗರದಿಂದ ಒಟ್ಟು 18 ಬಸ್‌ಗಳು ಬೆಂಗಳೂರಿಗೆ ಸಂಚರಿಸಿವೆ. ಉಳಿದಂತೆ ಬೆಳಗಾವಿ-7, ಹಾವೇರಿ-9, ಬೆಳಗಾವಿ-7 ವಿಜಯಪುರ-6, ಬಾಗಲಕೋಟೆ-2 ಹಾಗೂ ಗದಗ-17 ಸೇರಿದಂತೆ ಅಂತರ ಜಿಲ್ಲೆಗಳಿಗೆ ಪ್ರಯಾಣಿಕರು ತೆರಳಿದ್ದಾರೆ. ಇನ್ನೂ ಹೊರ ವಿಭಾಗದಿಂದ ಆಗಮಿಸಿದ ಬಸ್‌ಗಳ ಮೂಲಕವು ಪ್ರಯಾಣಿಕರು ತೆರಳಿದ್ದಾರೆ. ಇನ್ನೂ ರಾತ್ರಿಯೂ ಕೂಡ ಒಂದು ನಾನ್‌ ಎಸಿ ಸ್ಲೀಪರ್‌ ಬಸ್ಸನ್ನು ಬೆಂಗಳೂರಿಗೆ ಕಳುಹಿಸಲಾಯಿತು.
ಪ್ರಯಾಣಿಕರಲ್ಲಿ ಗೊಂದಲ: ಮೊದಲ ದಿನ ಬಸ್‌ಗಳ ವೇಳಾಪಟ್ಟಿಯ ಕುರಿತು ಪ್ರಯಾಣಿಕರಿಗೆ ಮಾಹಿತಿ ಇಲ್ಲದ ಪರಿಣಾಮ ದೂರದ ಊರುಗಳಿಗೆ ತೆರಳುವವರು ಮಧ್ಯಾಹ್ನ ಬಂದು ಬಸ್‌ ಇಲ್ಲದೆ ವಾಪಸ್‌ ತೆರಳಿದ್ದು, ಆದರೆ ಎರಡನೇ ದಿನ ದೂರುದ ಊರುಗಳಿಗೆ ಪ್ರಯಾಣಿಸುವವರರು ಬೆಳಿಗ್ಗೆಯೇ ನಿಲ್ದಾಣಕ್ಕೆ ಬಂದಿದ್ದರು. ಇನ್ನೂ ಬೇರೆ ಬೇರೆ ನಗರಗಳಿಂದ ಸಂಜೆ ವೇಳೆ ನಗರಕ್ಕೆ ಆಗಮಿಸಿದ ಕೆಲ ಪ್ರಯಾಣಿಕರು ತಾಲೂಕು ಕೇಂದ್ರಗಳಿಗೆ ತೆರಳಲು ಬಸ್‌ಗಳಿಲ್ಲದೆ ಇಡೀ ರಾತ್ರಿ ನಿಲ್ದಾಣದಲ್ಲಿ ಕಳೆಯುವಂತಾಗಿತ್ತು.
ಹುಬ್ಬಳ್ಳಿ ಗ್ರಾಮಾಂತರ ಸಾರಿಗೆ ವಿಭಾಗ : ಗೋಕುಲ ರಸ್ತೆ ಹೊಸ ಬಸ್‌ ನಿಲ್ದಾಣ, ಹಳೇ ಬಸ್‌ ನಿಲ್ದಾಣ, ಹೊಸೂರು ಟರ್ಮಿನಲ್‌ ನಿಲ್ದಾಣಗಳ ಮೂಲಕ ಹುಬ್ಬಳ್ಳಿ ಗ್ರಾಮಾಂತರ ವಿಭಾಗದಿಂದ 91 ಬಸ್‌ಗಳನ್ನುಕಾರ್ಯಾಚರಣೆಗೊಳಿಸಲಾಗಿದೆ. ಮೊದಲ ದಿನ 1.46 ಲಕ್ಷ ಆದಾಯವಿದ್ದರೆ ಎರಡನೇ ದಿನ 4.08 ಲಕ್ಷ ರೂ. ಆದಾಯ ಬಂದಿದೆ. ಇನ್ನೂ ಮೊದಲ ದಿನ 2932 ಪ್ರಯಾಣಿಕರು ಸಂಚಾರ ಮಾಡಿದರೆ ಎರಡನೇ ದಿನ 3915 ಪ್ರಯಾಣಿಕರು ಸಂಚಾರ ಮಾಡಿದ್ದಾರೆ. ಮೂರನೇ ದಿನಪ್ರಯಾಣಿಕ ಸಂಖ್ಯೆ ಇನ್ನಷ್ಟು ಹೆಚ್ಚಾಗಬಹುದು ಎನ್ನುವ ನಿರೀಕ್ಷೆ ಅಧಿಕಾರಿಗಳಲ್ಲಿದೆ.
ಹುಬ್ಬಳ್ಳಿ ನಗರ ಸಾರಿಗೆ ವಿಭಾಗ : ಮಹಾನಗರ ಸಾರಿಗೆ ವ್ಯಾಪ್ತಿಯಲ್ಲೂ ಎರಡನೇ ದಿನ ಪ್ರಯಾಣಿಕರ ಸಂಖ್ಯೆ ಹಚ್ಚಾಗಿದೆ. ಮೊದಲ ದಿನ 63 ಬಸ್‌ಗಳನ್ನು ಸಂಚರಿಸಲಾಗಿತ್ತು. ಎರಡನೇ ದಿನ 65 ಬಸ್‌ಗಳು ರಸ್ತೆಗಿಳಿದವು. ಉನಗರ ಸಾರಿಗೆಗೆ ಅಷ್ಟೊಂದು ಬೇಡಿಕೆಯಿಲ್ಲದ ಪರಿಣಾಮ ಬಸ್‌ಗಳ ಸಂಖ್ಯೆ ಕಡಿಮೆ ಮಾಡಿದ ಹುಬ್ಬಳ್ಳಿ-ಧಾರವಾಡ ನಡುವಿನ ಸಂಚಾರಕ್ಕೆ ಹೆಚ್ಚು ಒತ್ತು ನೀಡಲಾಗಿತ್ತು. ನಗರ 18, ಉಪನಗರ-11 ಹಾಗೂ ಹು-ಧಾ ಅವಳಿ ನಗರ ನಡುವೆ-36 ಬಸ್‌ಗಳು ಸಂಚಾರ ಮಾಡಿವೆ.
