ಚರ್ಚ್‌ಗಳಲ್ಲಿ ವಿಶೇಷ ಪ್ರಾರ್ಥನೆ, ಶಿಲುಬೆಯ ಆರಾಧನೆ

ಕೊಡಿಯಾಲಬೈಲ್‌: ಯೇಸು ಕ್ರಿಸ್ತರು ಶಿಲುಬೆಯಲ್ಲಿ ಇಹಲೋಕ ತ್ಯಜಿಸಿದ ದಿನವನ್ನು ಸ್ಮರಿಸಿ ಕ್ರೈಸ್ತರು ಶುಭ ಶುಕ್ರವಾರ (ಈ ಬಾರಿ ಎ. 2ರಂದು)ವನ್ನು ಆಚರಿಸುತ್ತಾರೆ.

ಆ ಪ್ರಯುಕ್ತ ಚರ್ಚ್‌ಗಳಲ್ಲಿ ವಿಶೇಷ ಪ್ರಾರ್ಥನೆ, ಶಿಲುಬೆಯ ಹಾದಿ (ವೆ ಆಫ್‌ ದಿ ಕ್ರಾಸ್‌), ಶಿಲುಬೆಯ ಆರಾಧನೆ ಮತ್ತು ಇತರ ಕಾರ್ಯಕ್ರಮಗಳು  ನಡೆಯಲಿವೆ.   ಕೋವಿಡ್ ಸೋಂಕು ಭೀತಿ ಹಿನ್ನೆಲೆಯಲ್ಲಿ ಸರಕಾರದ  ನಿಯಮಗಳನ್ನು ಪಾಲಿಸಿ ಈ ಪವಿತ್ರ ಸಪ್ತಾಹದ ಎಲ್ಲ ದಿನಗಳ (ಗರಿಗಳ ರವಿವಾರ, ಯೇಸು ಕ್ರಿಸ್ತರ ಕೊನೆಯ ಭೋಜನದ ಸ್ಮರಣೆಯ ದಿನ- ಪವಿತ್ರ ಗುರುವಾರ), ಶುಭ ಶುಕ್ರವಾರ, ಈಸ್ಟರ್‌ ಜಾಗರಣೆಯ ಶನಿವಾರ, ಈಸ್ಟರ್‌ ಆಚರಣೆಯ ರವಿವಾರ) ಕಾರ್ಯಕ್ರಮಗಳನ್ನು ಸರಳ ರೀತಿಯಲ್ಲಿ ನಡೆಸಲಾಗುತ್ತದೆ ಎಂದು ಮಂಗಳೂರು ಬಿಷಪ್‌ ವಂ| ಡಾ| ಪೀಟರ್‌ ಪಾವ್ಲ್ ಸಲ್ಡಾನ್ಹಾ ತಿಳಿಸಿದ್ದಾರೆ.

ಘಂಟೆಗಳ ಧ್ವನಿ ಇರುವುದಿಲ್ಲ :

ಶುಭ ಶುಕ್ರವಾರದ ದಿನ ಚರ್ಚ್‌ಗಳಲ್ಲಿ ಘಂಟೆಗಳ ಧ್ವನಿ ಇರುವುದಿಲ್ಲ; ಬಲಿ ಪೂಜೆಯ ಸಂಭ್ರಮವೂ ನಡೆಯುವುದಿಲ್ಲ (ಕ್ರೈಸ್ತ ಸಭೆಯಲ್ಲಿ ಶುಭ ಶುಕ್ರವಾರ ದಿನವೊಂದನ್ನು ಹೊರತುಪಡಿಸಿ ಉಳಿದಂತೆ ವರ್ಷದ ಎಲ್ಲ ದಿನಗಳಲ್ಲಿ ಚರ್ಚ್‌ಗಳಲ್ಲಿ ಬಲಿ ಪೂಜೆ ಮತ್ತು ಘಂಟೆಗಳು ಮೊಳಗುತ್ತಿರುತ್ತವೆ). ಕ್ರೈಸ್ತರು ಉಪವಾಸವನ್ನು ಆಚರಿಸುತ್ತಾರೆ. ಮೌನ ಪ್ರಾರ್ಥನೆ ಸಲ್ಲಿಸುತ್ತಾರೆ.

ಶಿಲುಬೆಯ ಹಾದಿ :

ಯೇಸು ಕ್ರಿಸ್ತರಿಗೆ ಶಿಲುಬೆಯ ಮರಣ ಶಿಕ್ಷೆ ವಿಧಿಸಿದಲ್ಲಿಂದ ಮೊದಲ್ಗೊಂಡು ಅವರು ಶಿಲುಬೆಯಲ್ಲಿ ಕೊನೆಯುಸಿರೆಳೆದು, ಅವರ ಶರೀರವನ್ನು ಸಮಾಧಿ ಮಾಡುವಲ್ಲಿ ವರೆಗಿನ 14 ಪ್ರಮುಖ ಘಟನಾವಳಿಗೆ ಸಂಬಂಧಿಸಿದ “ಶಿಲುಬೆಯ ಹಾದಿ’ (ವೇ ಆಫ್‌ ದಿ ಕ್ರಾಸ್‌) ಈ ದಿನದ ವೈಶಿಷ್ಟÂಗಳಲ್ಲೊಂದು. ಚರ್ಚ್‌ ಅಥವಾ ಚರ್ಚ್‌ ಆವರಣದಲ್ಲಿ ಇದನ್ನು ನಡೆಸುವ ಮೂಲಕ ಯೇಸು ಕ್ರಿಸ್ತರು ಅನುಭವಿಸಿದ ಯಾತನೆಯನ್ನು ಕ್ರೈಸ್ತರು ಸ್ಮರಿಸಿ ಧ್ಯಾನಿಸುತ್ತಾರೆ. ಈ ಸಂದರ್ಭ ವಿವಿಧ ಕಷ್ಟ ಸಂಕಷ್ಟಗಳಲ್ಲಿರುವ ಜನರಿಗಾಗಿ ಮತ್ತು ಸಮಗ್ರ ಲೋಕ ಕಲ್ಯಾಣಕ್ಕಾಗಿ ವಿಶೇಷವಾಗಿ ಪ್ರಾರ್ಥನೆ ಸಲ್ಲಿಸಲಾಗುತ್ತದೆ.

ಚರ್ಚ್‌ಗಳಲ್ಲಿ ಬೆಳಗ್ಗೆ ಅಥವಾ ಮಧ್ಯಾಹ್ನ ಶಿಲುಬೆಯ ಹಾದಿ ಹಾಗೂ ಸಂಜೆ ವೇಳೆ ಶುಭ ಶುಕ್ರವಾರದ ಕಾರ್ಯಕ್ರಮಗಳು ನಡೆಯುತ್ತವೆ. ಈ ಸಂದರ್ಭ ಪವಿತ್ರ ಗ್ರಂಥ ಬೈಬಲ್‌ನ ವಾಚನ ಮತ್ತು ಮನನ, ಪ್ರವಚನ, ಲೋಕ ಕಲ್ಯಾಣಕ್ಕಾಗಿ ಪ್ರಾರ್ಥನೆ, ಶಿಲುಬೆಯ ಆರಾಧನೆ ಇತ್ಯಾದಿಗಳನ್ನು ನಡೆಸಲಾಗುತ್ತದೆ.

ಜನರು ಕೋವಿಡ್ ದಿಂದ ತತ್ತರಿಸು ತ್ತಿರುವ ಈ ದಿನಗಳಲ್ಲಿ ಶುಭ ಶುಕ್ರವಾರ ದಿನ ನಾವು ಯೇಸು ಕ್ರಿಸ್ತರ ಶಿಲುಬೆಯ ಮರಣವನ್ನು ಸಾರುತ್ತೇವೆ. ಮರಣವನ್ನು ಜಯಿಸಿದ ಯೇಸು ಕ್ರಿಸ್ತರು ನಮ್ಮೆಲ್ಲರಿಗೆ ಹೊಸ ಚೈತನ್ಯವನ್ನು ತುಂಬಲಿ. -ವಂ| ಡಾ| ಪೀಟರ್‌ ಪಾವ್ಲ್ ಸಲ್ಡಾನ್ಹಾ ,,  ಬಿಷಪ್‌ ಮಂಗಳೂರು