ಇಲ್ಲೇ ತಯಾರಾಗುತ್ತಿವೆ ಗಣೇಶ ವಿಗ್ರಹಗಳು

ನಗರ: ಪುತ್ತೂರು, ಸುಳ್ಯ, ಕಾಸರಗೋಡು ಹಾಗೂ ಆಸುಪಾಸಿನ ತಾಲೂಕುಗಳಲ್ಲಿ ಆಚರಿಸಲಾಗುವ ಸಾರ್ವಜನಿಕ ಗಣೇಶೋತ್ಸವದ ಗಣಪತಿ ವಿಗ್ರಹಗಳು ಪುತ್ತೂರು ನಗರ ವ್ಯಾಪ್ತಿಯಲ್ಲಿಯೇ ಕಲಾವಿದರಿಂದ ಅಂತಿಮ ರೂಪ ಪಡೆಯುತ್ತಿವೆ.

ಪುತ್ತೂರು, ಸುಳ್ಯ, ಕಡಬ ವ್ಯಾಪ್ತಿಯ ತಾಲೂಕುಗಳು ಹಾಗೂ ನೆರೆಯ ಕಾಸರಗೋಡು, ಅಡ್ಯನಡ್ಕ ಸಹಿತ ಗಡಿಭಾಗಗಳಲ್ಲಿ 90ಕ್ಕೂ ಮಿಕ್ಕಿ ಕಡೆಗಳಲ್ಲಿ ಸಾರ್ವಜನಿಕ ಗಣೇಶೋತ್ಸವ ನಡೆಯುತ್ತವೆ. 60ಕ್ಕೂ ಮಿಕ್ಕಿ ಗಣೇಶೋತ್ಸವದ ಗಣಪತಿ ವಿಗ್ರಹಗಳು ಪುತ್ತೂರು ನಗರ ವ್ಯಾಪ್ತಿಯಲ್ಲಿ ಪ್ರಮುಖ ಕಲಾಕಾರರಿಂದ ಹಲವು ವರ್ಷಗಳಿಂದ ನಿರ್ಮಾಣವಾಗಿ ಪೂರೈಕೆ ಆಗುತ್ತಿವೆ.

ಪುತ್ತೂರು ನಗರದ ಪರ್ಲಡ್ಕದ ಮನೋಜ್ಞ ಆರ್ಟ್ಸ್ನ ಎನ್‌. ತಾರಾನಾಥ ಆಚಾರ್ಯ ಹಲವು ವಿಗ್ರಹಗಳನ್ನು ಮಾಡಿಕೊಡುತ್ತಿದ್ದರೆ, ಬೊಳುವಾರಿನಲ್ಲಿ ಶ್ರೀನಿವಾಸ ಪ್ರಭು, ಕೂರ್ನಡ್ಕದಲ್ಲಿ ಕರುಣಾಕರ ಪೈ ಅವರೂ ವಿಗ್ರಹಗಳನ್ನು ಮಾಡಿಕೊಡುತ್ತಿದ್ದಾರೆ. ಮನೆಗಳಲ್ಲಿ ಆಚರಿಸುವ ಗಣೇಶ ಹಬ್ಬಗಳಲ್ಲಿ ಪೂಜೆಗೊಳ್ಳುವ ಚಿಕ್ಕ ಗಾತ್ರದ ಗಣಪತಿ ವಿಗ್ರಹಗಳನ್ನೂ ಇವರೇ ಬೇಡಿಕೆಯ ಮೇರೆಗೆ ತಯಾರಿಸಿಕೊಡುತ್ತಿದ್ದಾರೆ.

ಸುಳ್ಯ, ಬೆಟ್ಟಂಪಾಡಿ, ಅಡೂರು, ಕಾವು, ಸಂಪ್ಯ, ಕಾವೇರಿಕಟ್ಟೆ, ರಾಘವೇಂದ್ರ ಮಠ, ಪುರುಷರಕಟ್ಟೆ, ಬೆಳಿಯೂರುಕಟ್ಟೆ, ನರಿಮೊಗರು, ತಿಂಗಳಡಿ, ಪುಣcಪ್ಪಾಡಿ, ಕೌಡಿಚ್ಚಾರ್‌, ಕುಂಜೂರುಪಂಜ, ಪ್ರಗತಿ ಸ್ಟಡಿ ಸೆಂಟರ್‌, ಪಟ್ನೂರು, ವಿವೇಕಾನಂದ ಕಾಲೇಜು, ಸಂತ ಫಿಲೋಮಿನಾ ಕಾಲೇಜು, ಸಂಟ್ಯಾರ್‌, ಜಾಲೂÕರು, ಪಡುಮಲೆ, ದೇಲಂಪಾಡಿ, ಹಿರೆಬಂಡಾಡಿ, ಪಾಲ್ತಾಡಿ, ಸವಣೂರು, ಕುಂಬ್ರ, ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಾಲಯದ ವಠಾರ, ಉಪ್ಪಿನಂಗಡಿ, ಅಡ್ಯನಡ್ಕ ಮೊದಲಾದ ಕಡೆಗಳ ಗಣೇಶನ ವಿಗ್ರಹಗಳು ಪುತ್ತೂರಿನಲ್ಲಿ ತಯಾರಾಗುತ್ತವೆ.

ಕರಗುವ ವಿಗ್ರಹ
ಪರಿಸರಕ್ಕೆ ಹಾನಿಯಾಗದ ವಿಗ್ರಹಗಳ ಜಾಗೃತಿ ಉಂಟಾಗುತ್ತಿರುವುದರಿಂದ ಒಳಭಾಗದಲ್ಲಿ ಟೊಳ್ಳಾಗಿರುವ, ಆವೆಮಣ್ಣಿನ, ವಾಟರ್‌ ಪೇಂಟ್‌ ಬಳಸಿದ ಗಣೇಶನ ವಿಗ್ರಹಗಳನ್ನು ರಚಿಸ ಲಾಗುತ್ತಿದೆ. ಪ್ರಾರ್ಥನೆಯ ಸಂದರ್ಭದಲ್ಲಿ ಇಡಲಾಗುವ ತೆಂಗಿನ ಕಾಯಿ ಹೊರತುಪಡಿಸಿ ರಾಸಾಯನಿಕಗಳನ್ನು, ಪ್ಲಾಸ್ಟಿಕ್‌, ಕಸ ಬಳಸದೆ ನೀರನಲ್ಲಿ ಕರಗುವ ವಿಗ್ರಹಗಳ ರಚನೆಯಾಗುತ್ತಿವೆ.

ಮನೆಗಳಲ್ಲಿ ಪೂಜೆಗೊಳ್ಳುವ ಗಣೇಶನ ವಿಗ್ರಹಕ್ಕೆ 3ರಿಂದ 5 ಸಾವಿರ ರೂ., ಸಾರ್ವಜನಿಕವಾಗಿ ಆಚರಿಸಲಾಗುವ ಗಣೇಶ ವಿಗ್ರಹಗಳಿಗೆ 10ರಿಂದ 15 ಸಾವಿರ ರೂ. ದರವಿದೆ. ಗಣೇಶನ ವಿಗ್ರಹದ ಜತೆಗೆ ಮೂಷಿಕ, ನಾಗರ ಹಾವು, ಪಾಶ, ಕಿರೀಟ, ಅಂಕುಶಗಳನ್ನು ಒದಗಿಸಲಾಗುತ್ತದೆ.

ಸೇವೆಯ ಯುವಕರು
ಗಣಪತಿ ವಿಗ್ರಹ ರಚಿಸುವ ಸಂದರ್ಭದಲ್ಲಿ ಸೇವೆಯ ಸಂಕಲ್ಪ ಮಾಡಿಕೊಂಡ ಯುವಕರೂ ಬಣ್ಣ ಸಹಿತ ವಿವಿಧ ರೀತಿಯ ಸಹಕಾರ ನೀಡಲು ಸ್ವಯಂಪ್ರೇರಣೆಯಿಂದ ಬರುತ್ತಾರೆ. ಕಲ್ಲಡ್ಕ ಹಂಚಿನ ಕಾರ್ಖಾನೆಯಿಂದ ಜೇಡಿಮಣ್ಣು ಪೂರೈಕೆಯಾಗುತ್ತದೆ.

ಚಿತ್ರ: ಕೃಷ್ಣಾ ಪುತ್ತೂರು