ನಿಲ್ಲದ ಜಿಟಿಜಿಟಿ ಮಳೆ

ಗದಗ: ಗದಗ-ಬೆಟಗೇರಿ ಅವಳಿ ನಗರ ಸೇರಿದಂತೆ ಜಿಲ್ಲೆಯ ವಿವಿಧೆಡೆ ಕಳೆದ ಮೂರು ದಿನಗಳಿಂದ ಆಶ್ಲೇಷ ಮಳೆ ಬಿಟ್ಟು ಬಿಡದಂತೆ ಸುರಿಯುತ್ತಿದೆ. ಮಂಗಳವಾರ ಸಂಜೆಯಿಂದಲೇ ನಿರಂತರವಾಗಿ ಜಿಟಿಜಿಟಿಯಾಗಿ ಸುರಿಯುತ್ತಿರುವ ಮಳೆ ಬುಧವಾರ ಸಂಜೆವರೆಗೂ ಮುಂದುವರಿಯಿತು.

ಅವಳಿ ನಗರದಲ್ಲಿ ಸುರಿಯುತ್ತಿರುವ ಜಿಟಿಜಿಟಿ ಮಳೆಯಿಂದಾಗಿ ಸಾರ್ವಜನಿಕರು ಹಾಗೂ ಶಾಲಾ- ಕಾಲೇಜುಗಳ ವಿದ್ಯಾರ್ಥಿಗಳು ಕೊಡೆ, ರೇನ್‌ಕೋಟ್‌ಗಳನ್ನು ಧರಿಸಿಯೇ ಮನೆಯಿಂದ ಹೊರ ಬರುವಂತಾಯಿತು. ಮಳೆಯಿಂದಾಗಿ ಮಾರುಕಟ್ಟೆ ಪ್ರದೇಶ ಬಹುತೇಕ ಗ್ರಾಹಕರಿಲ್ಲದೇ ಬಣಗುಡುತ್ತಿತ್ತು. ಸತತ ಮಳೆಯಿಂದ ಅವಳಿ ನಗರದಲ್ಲಿ ಹದಗೆಟ್ಟಿರುವ ರಸ್ತೆಗಳಲ್ಲಿ ಮಳೆ ನೀರು ನಿಂತು, ಚರಂಡಿ ಹಾಗೂ ರಸ್ತೆಗಳ ನಡುವಿನ ವ್ಯತ್ಯಾಸ ತಿಳಿಯದಂತಾಯಿತು. ಯುಜಿಡಿ ಹಾಗೂ 24×7 ಕುಡಿಯುವ ನೀರಿನ ಕಾಮಗಾರಿಗಳಿಂದಾಗಿ ರಸ್ತೆಗಳೆಲ್ಲ ಹದಗೆಟ್ಟಿವೆ. ಇದರಿಂದಾಗಿ ತೆಗ್ಗುದಿನ್ನೆಗಳನ್ನು ಗುರುತಿಸಲಾಗದೇ ಸೈಕಲ್ ಹಾಗೂ ದ್ವಿಚಕ್ರ ವಾಹನಗಳ ಸವಾರರು ಪರದಾಡುವಂತಾಯಿತು.

ಜಿಟಿಜಿಟಿ ನಡುವೆಯೇ ಆಗಾಗ ಮಳೆ ಬಿರುಸುಗೊಳ್ಳುತ್ತಿತ್ತು. ಕಚೇರಿ ಹಾಗೂ ನಾನಾ ಕೆಲಸ ಕಾರ್ಯಗಳಿಂದಾಗಿ ಮಾರುಕಟ್ಟೆಗೆ ಆಗಮಿಸಿದ್ದ ಜನರು, ಮಳೆಯಿಂದ ರಕ್ಷಿಸಿಕೊಳ್ಳಲು ವಾಣಿಜ್ಯ ಮಳಿಗಳ ಮುಂಭಾಗದಲ್ಲಿ ಆಶ್ರಯ ಪಡೆದು ಮಳೆ ನಿಲ್ಲುವುದನ್ನೇ ಕಾಯುವಂತಾಯಿತು.

ಕಳೆದ 24 ಗಂಟೆಗಳಲ್ಲಿ ಗದಗಿನಲ್ಲಿ 10.7 ಮಿ.ಮೀ., ಮುಂಡರಗಿಯಲ್ಲಿ 3 ಮಿ.ಮೀ., ನರಗುಂದ 12.2 ಮಿ.ಮೀ., ರೋಣದಲ್ಲಿ 8.0 ಮಿ.ಮೀ., ಶಿರಹಟ್ಟಿಯಲ್ಲಿ 16.5 ಮಿ.ಮೀ. ಸೇರಿದಂತೆ ಜಿಲ್ಲೆಯಲ್ಲಿ ಒಟ್ಟು 50.4 ಮಿ.ಮೀ. ನಷ್ಟು ಮಳೆ ದಾಖಲಾಗಿದೆ.