ಗ್ರೇಟರ್‌ ನೋಯ್ಡಾ:ಉದ್ಯಮಿಯನ್ನು ಅಡ್ಡಗಟ್ಟಿ ಹಲ್ಲೆ; ಕಾರು, ನಗದು ಲೂಟಿ

ಗ್ರೇಟರ್‌ ನೋಯ್ಡಾ : ಇಬ್ಬರು ಅಪರಿಚಿತ ದುಷ್ಕರ್ಮಿಗಳು ನಿನ್ನೆ ತಡರಾತ್ರಿ ಇಲ್ಲಿ ಉದ್ಯಮಿಯೊಬ್ಬರ ಕಾರನ್ನು ಅಡ್ಡಗಟ್ಟಿ, ಬಂದೂಕು ತೋರಿಸಿ, ಕಾರಿನ ಒಳಹೊಕ್ಕು, ಉದ್ಯಮಿಯನ್ನು ಹಿಂದಿನ ಸೀಟಿಗೆ ತಳ್ಳಿ, ಆತನ ಮೇಲೆ ಹಲ್ಲೆ ಗೈದು, ಕಾರು ಮತ್ತು ನಗದು ಸಹಿತ ಪರಾರಿಯಾಗಿರುವ ಘಟನೆ ವರದಿಯಾಗಿದೆ.

ಉದ್ಯಮಿ ಸನ್ನಿ ಎಂಬವರು ತನ್ನ ಸ್ನೇಹಿತನನ್ನು ಕಾಣಲು ನಿನ್ನೆ ತಡರಾತ್ರಿ ತನ್ನ ಸೇಡಾನ್‌ ಕಾರಿನಲ್ಲಿ ಸಮೀಪದ ಆಮ್ರಪಾಲಿ ಪ್ರದೇಶಕ್ಕೆ ಹೋಗಿದ್ದಾಗ ಈ ಘಟನೆ ನಡೆದಿದೆ. ಅಪರಿಚಿತ ದುಷ್ಕರ್ಮಿಗಳು ಸನ್ನಿ ಅವರ ಕಾರನ್ನು ಹಿಂದಿಕ್ಕಿ ಬಲವಂತವಾಗಿ ನಿಲ್ಲಿಸಿ, ಬಂದೂಕು ತೋರಿಸಿ ಬೆದರಿಸಿ, ಸನ್ನಿ ಅವರ ಕಾರನ್ನು ಪ್ರವೇಶಿಸಿದರು. ಸನ್ನಿ ಮೇಲೆ ಹಲ್ಲೆಗೈದ ಅವರು ಅನಂತರ ಕಾರು  ಮತ್ತು ನಗದು ಸಹಿತ ಪರಾರಿಯಾದರು.

ಘಟನೆಯ ಬಳಿಕ ಹೇಗೋ ತಾನು ಕಷ್ಟಪಟ್ಟು ಆನಂದ ವಿಹಾರ್‌ ಬಸ್‌ ನಿಲ್ದಾಣ ತಲುಪಿ ಬಳಿಕ ಮನೆ ತಲುಪಿದೆ ಎಂದು ಸನ್ನಿ ಪೊಲೀಸರಿಗೆ ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ.

ಸೂರಜ್‌ಪುರ ಪೊಲೀಸ್‌ ಠಾಣೆಯಲ್ಲಿ ಕೇಸು ದಾಖಲಾಗಿದ್ದು ತನಿಖೆ ನಡೆಯುತ್ತಿದೆ.