ಸತತ ಮಳೆಗೆ ಮರ-ಮನೆ ಗೋಡೆ ಧರೆಗೆ

ಹುಬ್ಬಳ್ಳಿ: ಶನಿವಾರ ರಾತ್ರಿಯಿಂದ ರವಿವಾರ ಮಧ್ಯಾಹ್ನದವರೆಗೆ ಸುರಿದ ಮಳೆಯಿಂದಾಗಿ ನಗರದ ವಿವಿಧೆಡೆ ಮರಗಳು ನೆಲಕ್ಕುರುಳಿದ್ದರೆ, ಕೆಲ ಮನೆಗಳ ಗೋಡೆಗಳು ಕುಸಿದಿವೆ. ಹಲವಡೆ ಮನೆಗಳಿಗೆ ನೀರು ನುಗ್ಗಿದ ಘಟನೆ ಕೂಡ ನಡೆದಿವೆ.

ಕಳೆದ 24 ಗಂಟೆಗಳಿಂದ ನಗರ ಸೇರಿದಂತೆ ತಾಲೂಕಿನಾದ್ಯಂತ ಉತ್ತಮ ಮಳೆಯಾಗುತ್ತಿದ್ದು, ಜಿಟಿ-ಜಿಟಿ ಮಳೆ ನಿರಂತರವಾಗಿ ಸುರಿಯುತ್ತಿದೆ. ಹುಬ್ಬಳ್ಳಿಯಲ್ಲಿ 41.9 ಮಿಮೀ, ಛಬ್ಬಿ 25.4 ಮಿಮೀ ಹಾಗೂ ಶಿರಗುಪ್ಪಿ 27.6 ಮಿಮೀ ಹಾಗೂ ಬ್ಯಾಹಟ್ಟಿ ಹೋಬಳಿಯಲ್ಲಿ 34.0 ಮಿಮೀ ಮಳೆಯಾಗಿದೆ. ಕೃಷಿ ಚಟುವಟಿಕೆಗೆ ಅಗತ್ಯವಾಗಿರುವ ಮಳೆ ನಿರೀಕ್ಷಿಸಲಾಗಿದ್ದು, ಭೂಮಿ ತಂಪಾಗಿದೆ.

ನಿರಂತರವಾಗಿ ಸುರಿಯುತ್ತಿರುವ ಮಳೆಯಿಂದ ನಗರದ ದೇಸಾಯಿ ಓಣಿ, ಬೈರಿದೇವರಕೊಪ್ಪ ಸೇರಿದಂತೆ ಇತರೆಡೆ ನಾಲ್ಕು ಮನೆಗಳ ಗೋಡೆಗಳು ಭಾಗಶಃ ಬಿದ್ದಿವೆ. ಜೆಸಿ ನಗರ, ಸೆಂಟ್ರಲ್ ಎಕ್ಸೈಜ್‌ ಕಾಲೋನಿ, ವಿದ್ಯಾನಗರದ ಹಳೇಯ ಆದಾಯ ತೆರಿಗೆ ಕಚೇರಿ ರಸ್ತೆ, ನವನಗರ, ವಿಜಯನಗರದಲ್ಲಿ ಮರಗಳು ಬಿದ್ದಿವೆ. ಇದರಿಂದ ಕೆಲವಡೆ ರಸ್ತೆ ಸಂಚಾರ ಸ್ಥಗಿತಗೊಂಡಿದ್ದು, ಪಾಲಿಕೆಯ ಸಿಬ್ಬಂದಿ ಮರ ತೆರವುಗೊಳಿಸಿದ್ದಾರೆ. ಜೆಸಿ ನಗರ ಹಾಗೂ ವಿಜಯ ನಗರದಲ್ಲಿ ಮರ ಬಿದ್ದ ಪರಿಣಾಮ ಎರಡು ಆಟೋ ರಿಕ್ಷಾಗಳು ಜಖಂಗೊಂಡಿವೆ.

ವಾಯು ಪುತ್ರ ಬಡಾವಣೆ, ತೋಳನಕೆರೆ ರಸ್ತೆ, ಬಿಡ್ನಾಳ, ಗದಗ ರಸ್ತೆಯ ವಿನೂತನ ಕಾಲೋನಿ, ಶಿವಪುತ್ರ ನಗರ, ಟೀಚರ್ ಕಾಲೋನಿ, ಚನ್ನಪೇಟೆಯ ಕೆಎಚ್ಬಿ ಕಾಲೋನಿ ಸೇರಿದಂತೆ ಹಲವೆಡೆ ಗಟಾರು ನೀರು ಮನೆಗಳಿಗೆ ನುಗ್ಗಿದ ಘಟನೆ ನಡೆದಿದೆ. ಸಕಾಲದಲ್ಲಿ ಗಟಾರುಗಳನ್ನು ಸ್ವಚ್ಛಗೊಳಿಸದ ಪರಿಣಾಮ ಈ ಸಮಸ್ಯೆ ಉಂಟಾಗಿದೆ ಎಂದು ಹೇಳಲಾಗಿದೆ. ಕೆಲ ಅಪಾರ್ಟ್‌ಮೆಂಟ್‌ಗಳಿಗೆ ಮಳೆ ನೀರು ಮಿಶ್ರಿತ ಚರಂಡಿ ನೀರು ನುಗ್ಗಿದೆ. ಇದರಿಂದ ಜನರು ಸಂಕಷ್ಟ ಅನುಭವಿಸುವಂತಾಗಿದ್ದು, ಮಳೆ ನೀರನ್ನು ಹೊರ ಹಾಕಲು ಹರಸಾಹಸ ಪಡುವಂತಾಯಿತು.

ಎಚ್ಚೆತ್ತುಕೊಳ್ಳದ ಪಾಲಿಕೆ: ಕಳೆದ ನಾಲ್ಕೈದು ದಿನಗಳ ಹಿಂದೆ ಮಂಟೂರು ರಸ್ತೆ ಅರಳಕಟ್ಟಿ ಓಣಿ, ಎಸ್‌.ಎಂ. ಕೃಷ್ಣ ನಗರದಲ್ಲಿ ಸುಮಾರು 250ಕ್ಕೂ ಹೆಚ್ಚು ಮನೆಗಳಿಗೆ ನೀರು ನುಗ್ಗಿ ಸಾಕಷ್ಟು ಸಮಸ್ಯೆಯಾಗಿತ್ತು. ಸಂಕಷ್ಟ ಅನುಭವಿಸಿದ ಜನರು ಪಾಲಿಕೆ ಅಧಿಕಾರಿಗಳ ವಿರುದ್ಧ ಹಿಡಿ ಶಾಪ ಹಾಕಿದ್ದರು. ನಂತರ ಜನಪ್ರತಿನಿಧಿಗಳು ಸ್ಥಳಗಳಿಗೆ ಭೇಟಿ ನೀಡಿ, ಪಾಲಿಕೆ ಅಧಿಕಾರಿಗಳ ಸಭೆ ಕರೆದು ಚರಂಡಿ, ನಾಲಾ, ಗಟಾರುಗಳ ಸ್ವಚ್ಛತೆಗೊಳಿಸುವಂತೆ ಸೂಚಿಸಿದ್ದರು. ಆದರೆ ಪಾಲಿಕೆ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಜನ ದೂರುತ್ತಿದ್ದಾರೆ.

ರಸ್ತೆಗಳಲ್ಲಿ ನೀರು: ಬಿಟ್ಟು ಬಿಡದೆ ಮಳೆ ಸುರಿಯುತ್ತಿರುವುದರಿಂದ ರಸ್ತೆಗಳ ಮೇಲೆ ನೀರು ನಿಂತಿದ್ದು, ವಾಹನ ಸವಾರರು ಸಮಸ್ಯೆ ಅನುಭವಿಸುವಂತಾಗಿದೆ. ಇತ್ತೀಚೆಗೆ ನಿರ್ಮಾಣವಾದ ಸಿಆರ್‌ಎಫ್‌ ರಸ್ತೆಗಳ ಮೇಲಿನ ನೀರು ಸರಾಗವಾಗಿ ಚರಂಡಿ ಹರಿಯುವ ವ್ಯವಸ್ಥೆ ಇಲ್ಲದ ಪರಿಣಾಮ ಸಮಸ್ಯೆಯುಂಟಾಗಿದೆ. ಇನ್ನೂ ಕೆಲವಡೆ ಗಟಾರು ಕಾಮಗಾರಿ ಪೂರ್ಣಗೊಳಿಸದಿರುವುದು ರಸ್ತೆ ಮೇಲೆ ನೀರು ಹರಿಯಲು ಕಾರಣವಾಗಿದೆ.