ತೀವ್ರ ವಿರೋಧದ ನಡುವೆಯೇ ನೂತನ ಪಿಂಚಣಿಗೆ France ಅಸ್ತು

ಪ್ಯಾರಿಸ್‌: ನಾಗರಿಕರ ವ್ಯಾಪಕ ವಿರೋಧದ ನಡುವೆಯೂ ಫ್ರಾನ್ಸ್‌ ಅಧ್ಯಕ್ಷ ಎಮಾನ್ಯುಯೆಲ್‌ ಮ್ಯಾಕ್ರನ್‌ ರೂಪುಗೊಳಿಸಿದ್ದ ನೂತನ ಪಿಂಚಣಿ ಯೋಜನೆಗೆ ದೇಶದ ಸಾಂವಿಧಾನಿಕ ನ್ಯಾಯಾಲಯವು ಶುಕ್ರವಾರ ಅನುಮೋದನೆ ನೀಡಿದೆ. ಒಂಬತ್ತು ಸದಸ್ಯರನ್ನೊಳಗೊಂಡ ಸಾಂವಿಧಾನಿಕ ನ್ಯಾಯಾಲಯವು, ಮ್ಯಾಕ್ರನ್‌ ಸರ್ಕಾರ ಶಿಫಾರಸು ಮಾಡಿರುವ ಪಿಂಚಣಿ ಸುಧಾರಣೆಯ ಪ್ರಮುಖ ಅಂಶಗಳನ್ನು ಅನುಮೋದಿಸಿತು.

ನೌಕರರ ನಿವೃತ್ತಿ ವಯಸ್ಸನ್ನು 62ರಿಂದ 64ಕ್ಕೆ ಏರಿಸುವುದು ಸೇರಿದಂತೆ ಅನೇಕ ಶಿಫಾರಸುಗಳ ಜಾರಿಗೆ ಇದು ಅವಕಾಶ ಮಾಡಿಕೊಡಲಿದೆ. ನೂತನ ಪಿಂಚಣಿ ಯೋಜನೆ ವಿರೋಧಿಸಿ ದೇಶದಾದ್ಯಂತ ಅನೇಕ ತಿಂಗಳಿನಿಂದ ಪ್ರತಿಭಟನೆಗಳು ನಡೆಯುತ್ತಿವೆ. ಶುಕ್ರವಾರವು ಕೂಡ ಪ್ಯಾರಿಸ್‌ ಸಿಟಿ ಹಾಲ್‌ ಎದುರು ನಾಗರಿಕರು, ಯೋಜನೆ ವಿರೋಧಿಸಿ ಪೋಸ್ಟರ್‌ಗಳನ್ನು ಪ್ರದರ್ಶಿಸುವ ಮೂಲಕ ಪ್ರತಿಭಟನೆ ನಡೆಸಿದರು. ಮುಖ್ಯವಾಗಿ ಪಿಂಚಣಿ ಪಡೆಯಲು 64 ವರ್ಷವಾಗಿರಬೇಕೆಂಬ ನೀತಿಗೆ ಎಲ್ಲರೂ ಸಿಟ್ಟಾಗಿದ್ದಾರೆ.