ಡೇರಾ ಮುಖ್ಯಸ್ಥನ ಪಲಾಯನ ಸಂಚು: ಇನ್ನೂ 4 ಪೊಲೀಸರು ಸೆರೆ

ಹೊಸದಿಲ್ಲಿ : ಕಳೆದ ಆಗಸ್ಟ್‌ 24ರಂದು ಡೇರಾ ಮುಖ್ಯಸ್ಥ ಗುರ್ಮಿತ್‌ ರಾಮ್‌ ರಹೀಮ್‌ ಸಿಂಗ್‌ಗೆ ಅತ್ಯಾಚಾರ ಅಪರಾಧಕ್ಕಾಗಿ 20 ವರ್ಷಗಳ ಜೈಲು ಶಿಕ್ಷೆಯನ್ನು ಸಿಬಿಐ ವಿಶೇಷ ನ್ಯಾಯಾಲಯ ಪ್ರಕಟಿಸಿದ್ದ ಸಂದರ್ಭದಲ್ಲಿ ಕೋರ್ಟ್‌ ಆವರಣದಿಂದಲೇ ಆತ ಪರಾರಿಯಾಗುವುದಕ್ಕೆ ಸಹಕರಿಸಿದ ಸಂಚಿನಲ್ಲಿ ಭಾಗಿಯಾಗಿದ್ದ ನಾಲ್ವರು ಪೊಲೀಸರ ಸಹಿತ ಒಟ್ಟು ಐವರನ್ನು ಹರಿಯಾಣ ಪೊಲೀಸರು ಬಂಧಿಸಿದ್ದಾರೆ.

ಡೇರಾ ಮುಖ್ಯಸ್ಥನ ಪಲಾಯನಕ್ಕೆ ಸಹಕರಿಸಿದ ಸಂಚಿನಲ್ಲಿ ಭಾಗಿಯಾಗಿದ್ದ  ಮೂವರು ಹರಿಯಾಣ ಪೊಲೀಸ್‌ ಕಮಾಂಡೋಗಳನ್ನು ಪಂಚಕುಲದಲ್ಲಿ  ನಿನ್ನೆ ಗುರುವಾರ ಬಂಧಿಸಲಾಗಿದೆಯಾದರೆ 
ರಾಜಸ್ಥಾನ ಪೊಲೀಸ್‌ ಸಿಬಂದಿ ಓಂ ಪ್ರಕಾಶ್‌ ಎಂಬಾತನನ್ನು ಹನುಮಾನ್‌ಗಢದಲ್ಲಿ ಸೆರೆ ಹಿಡಿಯಲಾಯಿತು. 

ಬಂಧಿತ ಕಮಾಂಡೋಗಳನ್ನು ಹೆಡ್‌ ಕಾನ್‌ಸ್ಟೆಬಲ್‌ (ಎಚ್‌ಸಿ) ಅಮಿತ್‌ ಕುಮಾರ್‌ ಮತ್ತು ರಾಜೇಶ್‌ ಕುಮಾರ್‌ ಹಾಗೂ ಕಾನ್‌ಸ್ಟೆಬಲ್‌ ರಾಜೇಶ್‌ ಕುಮಾರ್‌ ಎಂದು ಗುರುತಿಸಲಾಗಿದೆ. 

ಹರಿಯಾಣ ಪೊಲೀಸರು ನಡೆಸಿರುವ ತನಿಖೆಯಿಂದ ಈ ಮೂವರು ಕಮಾಂಡೋಗಳು ಮಾತ್ರವಲ್ಲದೆ ಡೇರಾ ಮುಖ್ಯಸ್ಥನ ಕೋರ್ಟ್‌ ರೂಮ್‌ ಪಲಾಯನ ಸಂಚಿನಲ್ಲಿ ಇತರ ರಾಜ್ಯಗಳ, ಸಮವಸ್ತ್ರದಲ್ಲಿದ್ದ ಆದರೆ ಅಧಿಕೃತವಾಗಿ ಕರ್ತವ್ಯದಲ್ಲಿ ಇಲ್ಲದಿದ್ದ, ಏಳು ಮಂದಿ ಪೊಲೀಸರು ಭಾಗಿಗಳಾಗಿರುವುದು ಪತ್ತೆಯಾಗಿದೆ. 

ರಾಮ್‌ ರಹೀಮ್‌ ಅಪರಾಧಿ ಎಂದು ಘೋಷಿಸಲ್ಪಟ್ಟು 20 ವರ್ಷಗಳ ಜೈಲು ಶಿಕ್ಷೆಗೆ ಗುರಿಯಾದ ಕೋರ್ಟ್‌ ತೀರ್ಪಿನ ದಿನದಂದು ಇವರೆಲ್ಲ ರಾಮ್‌ ರಹೀಮ್‌ ಜತೆಗೆ ಕೋರ್ಟಿಗೆ ಬಂದವರಾಗಿದ್ದಾರೆ. 

ಪಂಚಕುಲ ಪೊಲೀಸ್‌ ಕಮಿಶನರ್‌ ಎ ಎಸ್‌ ಚಾವ್ಲಾ ಅವರು, “ಪಂಜಾಬ್‌, ಚಂಡೀಗಢ ಮತುತ ರಾಜಸ್ಥಾನದ ಪೊಲೀಸ್‌ ಸಿಬಂಧಿಗಳು ಮಾತ್ರವಲ್ಲದೆ ಹರಿಯಾಣ ಪೊಲೀಸ್‌ನ ಮೂವರು ಕಮಾಂಡೋಗಳು ಆಗಸ್ಟ್‌ 25ರಂದು ಸಿಬಿಐ ವಿಶೇಷ ನ್ಯಾಯಾಲಯದಲ್ಲಿ ಉಪಸ್ಥಿತರಿದ್ದರು’ ಎಂದು ತಿಳಿಸಿದ್ದಾರೆ. 

ಮೂವರು ಹರಿಯಾಣ ಪೊಲೀಸ್‌ ಕಮಾಂಡೋಗಳಿಗೆ ಡೇರಾ ಮುಖ್ಯಸ್ಥನ ಕೋರ್ಟ್‌ ರೂಮ್‌ ಪಲಾಯನ ಸಂಚಿಗೆ ಸಂಬಂಧಿಸಿದ ತನಿಖೆಗೆ ಸಮನ್ಸ್‌ ನೀಡಿ ಕರೆಸಿಕೊಂಡ ಸಂದರ್ಭದಲ್ಲಿ “ತಾವು ತೀರ್ಪು ಪ್ರಕಟನೆಯ ದಿನದಂದು ಪಂಚಕುಲಕ್ಕೆ ಯಾಕೆ ಬಂದಿದ್ದರು ಎಂಬ ಪ್ರಶ್ನೆಗೆ ಸಮರ್ಪಕ ಉತ್ತರ ಕೊಟ್ಟಿಲ್ಲ’ ಎಂದು ಚಾವ್ಲಾ ಹೇಳಿದರು. 

ಈ ಬಂಧನಗಳಿಗೆ ಹೊರತಾಗಿ ಮತ್ತು ಪ್ರತ್ಯೇಕವಾಗಿ ಡೇರಾ ಮುಖ್ಯಸ್ಥನ ನಿಕಟವರ್ತಿ, ವಕ್ತಾರ, ಹಿಂಸೆಗೆ ಪ್ರಚೋದನೆ ನೀಡಿದಾತ, ದಿಲಾವರ್‌ ಸಿಂಗ್‌ ಇನ್ಸಾನ್‌ನನ್ನು ಹರಿಯಾಣ ಪೊಲೀಸರು ನಿನ್ನೆ ಗುರುವಾರ ಸೋನೇಪತ್‌ನಲ್ಲಿ ಸೆರೆ ಹಿಡಿದಿದ್ದಾರೆ.