ಹಟ್ಟಿ ಮೇಲೆ ಜರಿದು ಬಿದ್ದ ಗುಡ್ಡ: ನಾಲ್ಕು ಹಸುಗಳ ಸಾವು; ಒಂದರ ರಕ್ಷಣೆ

ಕಡಬ: ಮಳೆಯಿಂದಾಗಿ ಗುಡ್ಡ ಜರಿದು ದನದ ಹಟ್ಟಿಯ ಮೇಲೆ ಮಣ್ಣು ಬಿದ್ದ ಪರಿಣಾಮ ಮರ್ದಾಳದ 102 ನೆಕ್ಕಿಲಾಡಿ ಗ್ರಾಮದ ಕುಡಾಲ ನಿವಾಸಿ ಸುಭಾಸ್‌ ರೈ ಅವರ ಮನೆಯ ಪಕ್ಕದ ಕೊಟ್ಟಿಗೆಯಲ್ಲಿದ್ದ 5 ಜಾನುವಾರುಗಳ ಪೈಕಿ 4 ಜಾನುವಾರುಗಳು ಮಣ್ಣಿನಡಿ ಸಿಲುಕಿ ಮೃತಪಟ್ಟಿವೆ. ಘಟನೆ ಶನಿವಾರ ಸಂಜೆ ಸಂಭವಿಸಿದೆ.

ಮಣ್ಣು ಜರಿದು ಬಿದ್ದುದರಿಂದ ದನದ ಹಟ್ಟಿ ಸಂಪೂರ್ಣ ನಾಶವಾಗಿದೆ. 1 ಹಾಲು ಕರೆಯುವ ಹಸು, 1 ಗಬ್ಬದ ಹಸು,1 ದೊಡ್ಡ ಗಡಸು ಹಾಗೂ 1 ಕರು ಮೃತಪಟ್ಟರೆ, 1 ದನವನ್ನುಸ್ಥಳೀಯರು ಮಣ್ಣಿನಡಿಯಿಂದ ಹೊರತೆಗೆದು ರಕ್ಷಿಸಿದರು. ಸುದ್ದಿ ತಿಳಿದು ಸ್ಥಳಕ್ಕೆ ಧಾವಿಸಿದ ಸ್ಥಳೀಯರು ಹಾಗೂ ಮರ್ದಾಳದ ಯುವಕರು ಕಾರ್ಯಾಚರಣೆಯಲ್ಲಿ ಸಹಕರಿಸಿದರು. ಸುಮಾರು ಒಂದೂವರೆ ತಾಸು ಕಾಲ ಜೆಸಿಬಿ ಯಂತ್ರ ಬಳಸಿ ಕಾರ್ಯಾಚರಣೆ ನಡೆಸಿ ದನಗಳ ಮೃತದೇಹಗಳನ್ನು ಮಣ್ಣಿನಡಿಯಿಂದ ಹೊರತೆಗೆಯಲಾಯಿತು.ಘಟನೆಯಿಂದಾಗಿ ಸುಮಾರು 3 ಲಕ್ಷ ರೂ. ನಷ್ಟ ಸಂಭವಿಸಿದೆ ಎಂದು ಅಂದಾಜಿಸಲಾಗಿದೆ.

ಮರ್ದಾಳ ಹಾಲು ಉತ್ಪಾದಕರ ಸಹಕಾರಿ ಸಂಘದ ಅಧ್ಯಕ್ಷ ಎ.ಬಿ. ಮನೋಹರ ರೈ, ಕೆಎಂಎಫ್‌ ಪಶು ವೈದ್ಯಾಧಿ
ಕಾರಿ ಡಾ| ಕಾರ್ತಿಕ್‌, ವಿಸ್ತರಣಾಧಿಕಾರಿ ಮಂಜುನಾಥ್‌, ಮರ್ದಾಳ ಗ್ರಾ.ಪಂ. ಅಧ್ಯಕ್ಷೆ ಲಲಿತಾ ರೈ ಮೈಕಾಜೆ ಮುಂತಾದ ಪ್ರಮುಖರು ಸ್ಥಳಕ್ಕೆ ಭೇಟಿ ನೀಡಿದ್ದಾರೆ.