Advertisement
ಮೂರು ವಿಶ್ವಕಪ್ ಫುಟ್ಬಾಲ್ ಚಾಂಪಿಯನ್‌ ತಂಡದ ಸರದಾರನೆನಿಸಿದ ಪೀಲೆ ಸಾರ್ವಜನಿಕ ಕ್ಷೇತ್ರದಿಂದ ದೂರವಾಗಿದ್ದು, ಪರಿವಾರದ ಸದಸ್ಯರೊಂದಿಗೆ ಸಾವೋ ಪೌಲೋದ ಹೊರವಲಯದ ನಿವಾಸವೊಂದರಲ್ಲಿ ಉಳಿದಿದ್ದಾರೆ. ಕಳೆದ ಮಾರ್ಚ್‌ನಲ್ಲಿ ಸಹೋದರ ಜೈರ್‌ ನಿಧನದಿಂದ ಆಘಾತಕ್ಕೊಳಗಾದ ಪೀಲೆ, ಇದರಿಂದ ಇನ್ನೂ ಹೊರಬಂದಿಲ್ಲ ಎನ್ನಲಾಗಿದೆ.
1995-98ರ ಅವಧಿಯಲ್ಲಿ ಬ್ರಝಿಲ್‌ನ ಕ್ರೀಡಾ ಸಚಿವರಾಗಿ ಕರ್ತವ್ಯ ನಿಭಾಯಿಸಿದ್ದು ಪೀಲೆ ಪಾಲಿನ ಹೆಗ್ಗಳಿಕೆಯಾಗಿದೆ. ಎರಡು ವರ್ಷಗಳ ಬಳಿಕ ಅವರು “ಫಿಫಾ ಶತಮಾನದ ಫ‌ುಟ್ಬಾಲಿಗ’ ಗೌರವಕ್ಕೆ ಪಾತ್ರರಾದರು. ಪೀಲೆ ತಂಡ 1958, 1962 ಮತ್ತು 1970ರಲ್ಲಿ ಫಿಫಾ ವಿಶ್ವ ಚಾಂಪಿಯನ್‌ ಆಗಿ ಹೊರಹೊಮ್ಮಿತ್ತು. ಚಾಂಪಿಯನ್‌ ಆಟಗಾರನ ತಂಡ ಕೊನೆಯ ಸಲ ವಿಶ್ವಕಪ್ ಜಯಿಸಿ ಭರ್ತಿ 50 ವರ್ಷಗಳು ಉರುಳಿವೆ. ಇದರ ಸುವರ್ಣ ಮಹೋತ್ಸವ ಹಾಗೂ ಅವರ 80ನೇ ವರ್ಷದ ಸವಿನೆನಪಿಗಾಗಿ ರಿಯೋ ಡಿ ಜನೈರೋದ “ಮರಕಾನ ಸ್ಟೇಡಿಯಂ’ನಲ್ಲಿ ಈ ಫ‌ುಟ್ಬಾಲಿಗನ ಆಳೆತ್ತರದ ಪ್ರತಿಮೆಯೊಂದನ್ನು ಸ್ಥಾಪಿಸಲಾಗಿದೆ. ಆದರೆ ಇದರ ಉದ್ಘಾಟನಾ ಸಮಾರಂಭಕ್ಕೆ ಹಾಜರಾಗಲು ಪೀಲೆ ಅವರಿಗೆ ಸಾಧ್ಯವಾಗಿರಲಿಲ್ಲ.