ಹೋರಾಟಕ್ಕೆ ಜಾನಪದ ಪದವೀಧರರ ತೀರ್ಮಾನ

ಶಿಗ್ಗಾವಿ: ಜಾನಪದದ ಪದವೀಧರರಿಗೆ ಸರ್ಕಾರದ ವ್ಯವಸ್ಥೆಯಲ್ಲಿ ಮಾನ್ಯತೆ ಪಡೆದುಕೊಳ್ಳಬೇಕಾಗಿದ್ದು, ಇದಕ್ಕಾಗಿ ರಾಜ್ಯವ್ಯಾಪಿ ಹೋರಾಟ ಮಾಡಲು ಕರ್ನಾಟಕ ಜಾನಪದ ಪದವೀಧರರ ಸಂಘ ತೀರ್ಮಾನಿಸಿದೆ.

ಪಟ್ಟಣದ ಪ್ರವಾಸಿಗೃಹದಲ್ಲಿ ನಡೆಸಿದ ಸಂಘದ ಸಭೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಯಿತು. ಜಾನಪದವನ್ನು ಗ್ರಾಮೀಣ ಅಬಿವೃದ್ಧಿ ಇಲಾಖೆ, ಪಾರಂಪರಿಕ ಕೌಶಲ್ಯ ಅಭಿವೃದ್ಧಿ ಇಲಾಖೆ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಲ್ಲಿ ಜಾನಪದ ಪದವೀಧರರಿಗೆ ಅವಕಾಶ ಕಲ್ಪಿಸಬೇಕು ಎಂದು ಸಂಬಂಧಿಸಿದ ಇಲಾಖಾ ಸಚಿವರಲ್ಲಿ ಬೇಡಿಕೆ ಸಲ್ಲಿಸಬೇಕು ಎಂದು ನಿರ್ಧರಿಸಲಾಯಿತು. ಕರ್ನಾಟಕದಲ್ಲಿ ಹಲವು ದಶಕಗಳಿಂದ ಜಾನಪದ ಪದವೀಧರರಿಗೆ ಅನ್ಯಾಯ ಆಗುತ್ತಲೇ ಇದೆ. ಈ ಪದವಿ ಮುಗಿಸಿದವರಿಗೆ ಸರಕಾರದಲ್ಲಿ ವೃತ್ತಿ ಅವಕಾಶಗಳು ಅತಿ ಕಡಿಮೆಯಾಗಿದ್ದು,ಇರುವ ಕೆಲವೇ   ಕೆಲವು ಅವಕಾಶಗಳನ್ನು ವಿವಿಧ ಪದವೀಧರರು ಕಿತ್ತುಕೊಳ್ಳುತ್ತಿದ್ದಾರೆ. ಇದನ್ನು ತಡೆಯಬೇಕು. ಜಾನಪದ ಪದವೀಧರರಿಗೆ ಹೊಸ ಹುದ್ದೆಗಳನ್ನು ಸೃಷ್ಟಿಸಲು ಸರ್ಕಾರದ ಮೇಲೆ ಒತ್ತಡ ಹೇರಬೇಕು ಎಂದು ಸಭೆಯಲ್ಲಿ ಚರ್ಚಿಸಲಾಯಿತು.

ಜಾನಪದ ಪದವೀಧರರಿಗೆ ಉದ್ಯೋಗ ಸೃಷ್ಟಿಸುವ ಬಗ್ಗೆ ಸರ್ಕಾರದ ಮೇಲೆ ಒತ್ತಡ ಹೇರುವ ಮುಂದಾಳತ್ವವನ್ನು ಗೊಟಗೋಡಿಯ ಕರ್ನಾಟಕ ಜಾನಪದ ವಿಶ್ವವಿದ್ಯಾಲಯ ವಹಿಸಿಕೊಳ್ಳಲು ಮನವಿ ಮಾಡಬೇಕು. ಈ ಬಗ್ಗೆ ವಿವಿ ಕುಲಪತಿಯವರೊಂದಿಗೆ ಚರ್ಚಿಸಬೇಕು ಎಂಬ ಅಭಿಪ್ರಾಯ ಸಭೆಯಲ್ಲಿ ವ್ಯಕ್ತವಾಯಿತು. ಜಾನಪದವನ್ನು ಪಿಯುಸಿ ಹಾಗೂ ಪದವಿ ಅಧ್ಯಯನದಲ್ಲಿ ಸೇರಿಸುವುದಕ್ಕೆ ಸರ್ಕಾರದ ಗಮನ ಸೆಳೆಯಬೇಕು. ಇದಕ್ಕಾಗಿ ಹಲವು ಹೋರಾಟ ಮಾಡಬೇಕು. ಈ ಹೋರಾಟಕ್ಕೆ ಜಾನಪದ ಅಕಾಡೆಮಿ, ಕರ್ನಾಟಕ ಬಯಲಾಟ ಅಕಾಡೆಮಿ, ಯಕ್ಷಗಾನ ಅಕಾಡೆಮಿ, ಜಾನಪದ ಪರಿಷತ್ತು, ಜಾನಪದ ಲೋಕ, ಕನ್ನಡ ಜಾನಪದ ಪರಿಷತ್‌ನಂತಹ ಸಂಘಟನೆಗಳ ಸಹಯೋಗ, ಬೆಂಬಲ ಪಡೆದುಕೊಳ್ಳಬೇಕು. ಹೋರಾಟಕ್ಕಾಗಿ ಸಮಿತಿ ಯೋಜನೆ ಹಾಕಿಕೊಳ್ಳಬೇಕು ಎಂದು ನಿರ್ಧರಿಸಲಾಯಿತು.

ಸಭೆಯಲ್ಲಿ ಕರ್ನಾಟಕ ಜಾನಪದ ಪದವೀಧರರ ಸಂಘದ ಅಧ್ಯಕ್ಷ ಬಸವರಾಜ ಜವಳಗಟ್ಟಿ, ಉಪಾಧ್ಯಕ್ಷ ಗುಡ್ಡಪ್ಪ ನಿಂಬಣ್ಣನವರ, ಕಾರ್ಯದರ್ಶಿ ಜಿ.ಎಸ್‌.ಸಣ್ಣಯ್ಯ, ಖಜಾಂಚಿ ಷರೀಫ್‌ ಮಾಕಪ್ಪನವರ, ಸಂಘಟನಾ ಕಾರ್ಯದರ್ಶಿಗಳಾದ ಹನುಮಂತಪ್ಪ ಬೆಂಗೇರಿ ಹಾಗೂ ಡಾ| ರಜೀಯಾಬೇಗಂ ನಧಾಪ್‌, ಮಾಧ್ಯಮ ಕಾರ್ಯದರ್ಶಿಗಳಾದ ಡಾ. ರಾಜಶೇಖರ ಡೊಂಬರಮತ್ತೂರು ಮತ್ತು ಪ್ರವೀಣ ಕರಿಯಪ್ಪನವರ ಇನ್ನಿತರರು ಸಭೆಯಲ್ಲಿದ್ದರು.