ಟ್ರಾಫಿಕ್ ಸಮಸ್ಯೆ ನಿವಾರಣೆಗೆ ಬಂದಿದೆ ಹಾರುವ ಕಾರು: ಇದರ ಗುಣವೈಶಿಷ್ಟ್ಯಗಳೇನು ?

ನ್ಯೂಯಾರ್ಕ್:  ಇಂದು ಜಗತ್ತಿನೆಲ್ಲೆಡೆ ವಾಹನಗಳ ಸಂಖ್ಯೆ ಹೆಚ್ಚಾಗಿ ಟ್ರಾಫಿಕ್ ಸಮಸ್ಯೆ ಮಿತಿಮೀರುತ್ತಿದೆ. ಅಪಘಾತದ ಪ್ರಮಾಣಗಳು ಕೂಡ ಹೆಚ್ಚಾಗುತ್ತಿದೆ. ಇವೆಲ್ಲದಕ್ಕೂ ಬ್ರೇಕ್ ಹಾಕಲು ಅಮೆರಿಕದ ಕಾರು ತಯಾರಿಕ ಕಂಪೆನಿಯಾದ ಪಿಎಲ್-ವಿ ಲಿಬರ್ಟಿ  ಸಂಸ್ಥೆ ಹಾರುವ ಕಾರನ್ನು ಬಿಡುಗಡೆ ಮಾಡಿದೆ. ಇದು ಹಲವು ವೈಶಿಷ್ಟ್ಯಗಳನ್ನು ಹೊಂದಿದ್ದು ಕಾರುಪ್ರಿಯರ ಮನಗೆದ್ದಿದೆ.

ಈ ಕಾರನ್ನು ವಿಶ್ವದ ಮೊದಲ ‘ಡ್ರೈವ್ ಅಂಡ್ ಫ್ಲೈ’ ಕಾರು ಎಂದು ಕರೆಯಲಾಗುತ್ತಿದೆ. 102-ಲೀಟರ್ ಇಂಧನ ಟ್ಯಾಂಕ್ ಹೊಂದಿರುವ ಈ ಕಾರು ಒಂದು ಬಾರಿ ಗಾಳಿಯಲ್ಲಿ 500 ಕಿ.ಮೀ ವರೆಗೆ ಚಲಿಸಬಲ್ಲದು. ಹಾಗೆಯೇ ರಸ್ತೆಯಲ್ಲಿ ಅದು 1200 ಕಿ.ಮೀ ದೂರವನ್ನು ಕ್ರಮಿಸುತ್ತದೆ: ಇತ್ತೀಚೆಗೆ ಪ್ಯಾರಾಮೌಂಟ್ ಮಿಯಾಮಿ ವರ್ಲ್ಡ್ ಸೆಂಟರ್​ನಲ್ಲಿ ಈ ಕಾರನ್ನು ಪ್ರದರ್ಶನ ಮಾಡಲಾಗಿದೆ.

ಈ ಕಾರಿನ ಇತರ ವೈಶಿಷ್ಟ್ಯಗಳೇನು ?

ಈ ಹಾರುವ ಕಾರಿಗೆ ಪರ್ಸನಲ್ ಏರ್ ಲ್ಯಾಂಡಿಂಗ್ ವೆಹಿಕಲ್ ಅಥವಾ ಪಿಎಎಲ್-ವಿ ಎಂದು ಹೆಸರಿಡಲಾಗಿದೆ. ವಾಹನವು ಹಿಂಭಾಗದಲ್ಲಿ ಪ್ರೊಪೆಲ್ಲರ್​ಗಳನ್ನು (ಫ್ಯಾನ್) ನೀಡಲಾಗಿದೆ. ಇದರ  ಸಹಾಯದಿಂದ ಈ ಕಾರು 12,500 ಅಡಿ ಎತ್ತರದವರೆಗೆ ಹಾರಾಟ ನಡೆಸಬಹುದು. ರಸ್ತೆಯಲ್ಲಿ ಈ ಕಾರಿನ ಗರಿಷ್ಠ ವೇಗ 322 ಕಿ.ಮೀ.

ಗ್ಯಾಸೋಲಿನ್​ (ಪೆಟ್ರೋಲ್​) ನಿಂದ ಈ ಕಾರು ಚಲಿಸುತ್ತದೆ. ಹಾರಾಟದ ವೇಳೆ ಗರಿಷ್ಠ  ಗಂಟೆಗೆ 322 ಕಿ.ಮೀ.ವೇಗದ ಮಿತಿ ಅಳವಡಿಸಲಾಗಿದೆ. ಹಾರಾಟದ ವೇಳೆ ಇಬ್ಬರಿಗೆ ಮಾತ್ರ ಕೂರಲು ಅವಕಾಶವಿರಲಿದೆ.ಹೈಸ್ಪೀಡ್ ‘ಡ್ರೈವ್ ಅಂಡ್ ಫ್ಲೈ’ ಕಾರು: 0 ರಿಂದ 100 ವೇಗವನ್ನು ಪಡೆಯಲು ಕೇವಲ ಎಂಟು ಸೆಕೆಂಡುಗಳನ್ನು ತೆಗೆದುಕೊಳ್ಳುತ್ತದೆ. ಕೇವಲ ಒಂದು ಗುಂಡಿಯನ್ನು ಒತ್ತುವ ಮೂಲಕ ಅದರ ಬ್ಲೇಡ್‌ಗಳನ್ನು ಮಡಚಿ ಕಾರಿನ ಪಡೆದುಕೊಳ್ಳುವಂತೆ ಇದನ್ನು ವಿನ್ಯಾಸಗೊಳಿಸಲಾಗಿದೆ.

ಈ ಕಾರು ಕಾರ್ಬನ್ ಫೈಬರ್, ಟೈಟಾನಿಯಂ ಮತ್ತು ಅಲ್ಯೂಮಿನಿಯಂನಿಂದ ಮಾಡಲ್ಪಟ್ಟಿದೆ. ಈ ಕಾರಿಗೆ ಬೈಕ್​ನಂತಹ ಹ್ಯಾಂಡಲ್ ನೀಡಲಾಗಿರುವುದು ವಿಶೇಷ. ಇದರಿಂದಾಗಿ ರಸ್ತೆ ಮತ್ತು ಹಾರಾಟದ ವೇಳೆ ಸುಲಭವಾಗಿ ನಿಯಂತ್ರಿಸಬಹುದು. ಇದು ಹಾರಾಟ ನಡೆಸಲು 540 ಅಡಿ ರನ್​ವೇಯ ಅಗತ್ಯವಿದೆ. ಹಾಗೆಯೇ ಇಳಿಯಲು ಕೇವಲ 100 ಅಡಿ ರನ್​ವೇ ಅಗತ್ಯವಿದೆ.

ಈ ನೂತನ ಕಾರು ತಯಾರಕರಾದ ಪಿಎಎಲ್-ವಿ ಇದುವರೆಗೆ 70 ಕಾರುಗಳನ್ನು ಮಾರಾಟ ಮಾಡಿದೆ ಎಂದು ಅಧಿಕೃತವಾಗಿ ಹೇಳಿಕೊಂಡಿದೆ. ಈ ಕಾರಿನ ಬೆಲೆ ಅಂದಾಜು 4.3 ಕೋಟಿ ರೂ.