ಮೊದಲನೇ ಲಗೇಜ್‌ ಫ್ರೀ – ಎರಡನೇ ಲಗೇಜ್‌ಗೆ ಫೀ

ಬೆಂಗಳೂರು: ಮೆಟ್ರೋ ಪ್ರಯಾಣಕ್ಕೆ ಮಾತ್ರವಲ್ಲ; ಇನ್ಮುಂದೆ ಪ್ರಯಾಣಿಕರ ಲಗೇಜಿಗೂ ಟಿಕೆಟ್‌ ಪಡೆಯಬೇಕಾಗುತ್ತದೆ! ತುಂಬಿತುಳುಕುತ್ತಿರುವ ಮೆಟ್ರೋ ರೈಲುಗಳಲ್ಲಿ ಸಾಧ್ಯವಾದಷ್ಟು ಬ್ಯಾಗ್‌ಗಳಿಗೆ ಕಡಿವಾಣ ಹಾಕಿ, ಹೆಚ್ಚು ಪ್ರಯಾಣಿಕರಿಗೆ ಅನುಕೂಲ ಮಾಡಿಕೊಡಲು ಬೆಂಗಳೂರು ಮೆಟ್ರೋ ರೈಲು ನಿಗಮ (ಬಿಎಂಆರ್‌ಸಿ) ಮಾಡಿದ ಹೊಸ ಐಡಿಯಾ ಇದು. 

ಒಂದು ಲಗೇಜ್‌ಗೆ ಯಾವುದೇ ಟಿಕೆಟ್‌ ಇರುವುದಿಲ್ಲ. ಎರಡು ಅಥವಾ ಎರಡಕ್ಕಿಂತ ಹೆಚ್ಚು ಇರುವ ಲಗೇಜ್‌ಗಳಿಗೆಲ್ಲಾ ತಲಾ 30 ರೂ. ಟಿಕೆಟ್‌ ನಿಗದಿಪಡಿಸಲು ಬಿಎಂಆರ್‌ಸಿ ನಿರ್ಧರಿಸಿದೆ. ಇದು ಲಂಚ್‌ ಬ್ಯಾಗ್‌, ಲ್ಯಾಪ್‌ಟಾಪ್‌ ಬ್ಯಾಗ್‌, ಹ್ಯಾಂಡ್‌ಬ್ಯಾಗ್‌, ಹೆಗಲಿಗೆ ಹಾಕಿಕೊಳ್ಳುವ ಬ್ಯಾಗ್‌ಗಳಿಗೆ ಅನ್ವಯಿಸುವುದಿಲ್ಲ. ತುಂಬಿತುಳುಕುತ್ತಿರುವ ಬೋಗಿಗಳಲ್ಲಿ ಆದಷ್ಟು ಬ್ಯಾಗುಗಳ ಹಾವಳಿ ಕಡಿಮೆ ಮಾಡಿ, ಹೆಚ್ಚು ಪ್ರಯಾಣಿಕರು ಸಂಚರಿಸಲು ಈ ನಿಯಮ ಜಾರಿಗೆ ತರಲಾಗುತ್ತಿದೆ. 

25x45x65 ಸೆಂ.ಮೀ. ಗಾತ್ರದ ಒಂದು ಲಗೇಜ್‌ಗೆ ಟಿಕೆಟ್‌ ಇರವುದಿಲ್ಲ. ಇಷ್ಟೇ ಗಾತ್ರದ ಎರಡನೇ ಲಗೇಜ್‌ಗೆ ಟಿಕೆಟ್‌ ನಿಗದಿಪಡಿಸಲಾಗಿದೆ. ಟಿಕೆಟ್‌ ಪಡೆಯದಿದ್ದರೆ, 200 ರೂ. ದಂಡ ವಿಧಿಸಲಾಗುವುದು ಎಂದೂ ನಿಗಮ ಎಚ್ಚರಿಸಿದೆ. ಇದರಿಂದ ಮೆಟ್ರೋದಲ್ಲಿ ಪ್ರಯಾಣ ದರ ಮತ್ತಷ್ಟು ಹೊರೆಯಾಗಲಿದೆ.

“ನಮ್ಮ ಮೆಟ್ರೋ’ ಮೆಜೆಸ್ಟಿಕ್‌ನಲ್ಲಿರುವ ಕೆಂಪೇಗೌಡ ಬಸ್‌ ನಿಲ್ದಾಣ, ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ರೈಲು ನಿಲ್ದಾಣ, ಯಶವಂತಪುರ ಹಾಗೂ ಬೈಯಪ್ಪನಹಳ್ಳಿ ಬಳಿ ಇರುವ ಕೆ.ಆರ್‌. ಪುರ ರೈಲು ನಿಲ್ದಾಣಗಳು ಬರುತ್ತವೆ. ಇಲ್ಲಿ ನಿತ್ಯ ಲಕ್ಷಾಂತರ ಜನ ಓಡಾಡುತ್ತಾರೆ.

ಈ ಪೈಕಿ ಯಶವಂತಪುರ ಮತ್ತು ಸಿಟಿ ರೈಲು ನಿಲ್ದಾಣ ಹಾಗೂ ಬಸ್‌ ನಿಲ್ದಾಣದಿಂದ ಅತಿ ಹೆಚ್ಚು ಜನ ಮೆಟ್ರೋದಲ್ಲಿ ಸಂಚರಿಸುತ್ತಾರೆ. ಅವರಲ್ಲಿ ಬಹುತೇಕರು ಲಗೇಜ್‌ ಸಹಿತ ಪ್ರಯಾಣ ಮಾಡುವವರಾಗಿದ್ದಾರೆ. ಈಗ ಆ ಲಗೇಜ್‌ಗೆ ಟಿಕೆಟ್‌ “ಹೊರೆ’ ಬೀಳಲಿದೆ. 

ಈಗಾಗಲೇ ಈ ಸಂಬಂಧ ಮೆಟ್ರೋ ನಿಲ್ದಾಣದಲ್ಲಿ ಸೂಚನಾ ಪತ್ರ ಕೂಡ ಅಂಟಿಸಲಾಗಿದ್ದು, ಅದರಲ್ಲಿ ಲಗೇಜ್‌ ಟಿಕೆಟ್‌ ದರ 30 ರೂ. ಹಾಗೂ ಟಿಕೆಟ್‌ರಹಿತ ಲಗೇಜ್‌ ತೆಗೆದುಕೊಂಡು ಹೋದರೆ, 200 ರೂ. ಎಂದು ಸೂಚಿಸಲಾಗಿದೆ. ಆದರೆ, ಅದರಲ್ಲಿ ಯಾವುದೇ ಅಧಿಕಾರಿಗಳ ಸಹಿ ಇಲ್ಲ. ಬಿಎಂಆರ್‌ಸಿಯ ಈ ಹೊಸ ನಿಯಮಕ್ಕೆ ಪ್ರಯಾಣಿಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಲಗೇಜಿಗೆ ಟಿಕೆಟ್‌ ವಿಧಿಸಿದ್ದರ ಅರ್ಥ ಮೆಜೆಸ್ಟಿಕ್‌ನ ಬಸ್‌ ಅಥವಾ ರೈಲು ನಿಲ್ದಾಣದಿಂದ ಮೆಟ್ರೋದಲ್ಲಿ ಓಡಾಡಬೇಡಿ. ಆಟೋ ಅಥವಾ ಖಾಸಗಿ ವಾಹನ ಬಳಸಿ ಎಂದು ಸೂಚಿಸಿದಂತಿದೆ. ಇಷ್ಟೇ ಹಣದಲ್ಲಿ ಕ್ಯಾಬ್‌ನಲ್ಲೇ ಹೋಗಬಹುದಲ್ಲಾ? ಹಾಗಿದ್ದರೆ, ಮೆಟ್ರೋ ಸೇವೆ ಉದ್ದೇಶ ಏನು?’ ಎಂದು ಪ್ರಯಾಣಿಕರು ಕೇಳುತ್ತಾರೆ. 

“ಈ ಹಿಂದೆ ಕೂಡ ಲಗೇಜ್‌ಗೆ ಟಿಕೆಟ್‌ ಇತ್ತು. 15 ಕೆಜಿಗಿಂತ ದೊಡ್ಡ ಬ್ಯಾಗ್‌ಗಳಿಗೆ ಅಲ್ಲಿನ ಸೆಕ್ಯುರಿಟಿ ಸಿಬ್ಬಂದಿಯೇ 10 ರೂ. ನಿಗದಿಪಡಿಸಿದ್ದರು. ಅದನ್ನು ಈಗ 30 ರೂ.ಗೆ ಹೆಚ್ಚಿಸಲಾಗಿದೆ. ಜತೆಗೆ ತೂಕ ನಿಗದಿಗೆ ಪ್ರತಿ ನಿಲ್ದಾಣದಲ್ಲಿ ತೂಕದ ಯಂತ್ರ ಇಡಬೇಕು. ಇದರಿಂದ ಪ್ರಯಾಣಿಕರಿಗೂ ಕಿರಿಕಿರಿ ಆಗುತ್ತದೆ.

ಆದ್ದರಿಂದ ಒಂದು ಲಗೇಜ್‌ ಉಚಿತ ಹಾಗೂ ಎರಡ ಅಥವಾ ಅದಕ್ಕಿಂತ ಹೆಚ್ಚು ಬ್ಯಾಗ್‌ಗಳಿಗೆ ತಲಾ 30 ರೂ. ನಿಗದಿಪಡಿಸಲು ಉದ್ದೇಶಿಸಲಾಗಿದೆ. ಸೀಘ್ರದಲ್ಲೇ ಇದು ಜಾರಿಗೆ ಬರಲಿದೆ’ ಎಂದು ಹೆಸರು ಹೇಳಲಿಚ್ಛಿಸದ ನಿಗಮದ ಅಧಿಕಾರಿಯೊಬ್ಬರು “ಉದಯವಾಣಿ’ಗೆ ಸ್ಪಷ್ಟಪಡಿಸಿದ್ದಾರೆ. 

ತಾತ್ಕಾಲಿಕ ವ್ಯವಸ್ಥೆ?: ವರ್ಷಾಂತ್ಯಕ್ಕೆ “ನಮ್ಮ ಮೆಟ್ರೋ’ದ ಈಗಿರುವ ಮೂರು ಬೋಗಿಗಳಿಗೆ ಇನ್ನೂ ಮೂರು ಬೋಗಿಗಳು ಸೇರ್ಪಡೆಗೊಳ್ಳಲಿವೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ, ಇದು ಸಾಧ್ಯವಾಗದ ಹಿನ್ನೆಲೆಯಲ್ಲಿ ಬಿಎಂಆರ್‌ಸಿ ಹಲವು ತಾತ್ಕಾಲಿಕ ಪರಿಹಾರಗಳನ್ನು ಕಂಡುಕೊಳ್ಳುತ್ತಿದೆ. ಆ ಪೈಕಿ ಲಗೇಜಿಗೆ ಟಿಕೆಟ್‌ ಕೂಡ ಒಂದಾಗಿದೆ. 

ಈಗಾಗಲೇ ಮೆಟ್ರೋ ರೈಲುಗಳು ತುಂಬಿತುಳುಕುತ್ತಿವೆ. ಇದರಲ್ಲಿ ನಿಲ್ಲಲಿಕ್ಕೂ ಜಾಗವಿಲ್ಲ. ಅಂತಹದ್ದರಲ್ಲಿ ಲಗೇಜುಗಳು ಕೂಡ ಹೆಚ್ಚು ಜಾಗ ಆಕ್ರಮಿಸಿಕೊಳ್ಳುತ್ತಿವೆ. ಟಿಕೆಟ್‌ ವಿಧಿಸುವ ಮೂಲಕ ಅವುಗಳನ್ನು ಕಡಿಮೆ ಮಾಡಿ, ಪ್ರಯಾಣಿಕರಿಗೆ ಅನುಕೂಲ ಮಾಡಿಕೊಡುವುದು ಇದರ ಹಿಂದಿನ ಉದ್ದೇಶ. ಆರು ಬೋಗಿಗಳಿಗೆ ವಿಸ್ತರಣೆ ಆಗುತ್ತಿದ್ದಂತೆ, ಈ ಟಿಕೆಟ್‌ ವ್ಯವಸ್ಥೆ ತೆರವಾಗಲಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.