ಫಸ್ಟ್‌ ಬೆಲ್‌ ಆನ್‌ಲೈನ್‌ ತರಗತಿ: ಕನ್ನಡ ಮಾಧ್ಯಮದಲ್ಲೂ ಲಭ್ಯ

ಕಾಸರಗೋಡು: ಕೇರಳ ಸಾರ್ವಜನಿಕ ಶಿಕ್ಷಣ ಇಲಾಖೆಯ ಫಸ್ಟ್‌ ಬೆಲ್‌ ಆನ್‌ಲೈನ್‌ ತರಗತಿಗಳು ಜೂ.17 ರಿಂದ ಕನ್ನಡ ಮಾಧ್ಯಮದಲ್ಲೂ ಲಭ್ಯವಾಗಲಿವೆ. ಈ ಸಂಬಂಧ ಜಿಲ್ಲೆಯಲ್ಲಿ ಸಿದ್ಧತೆ ಪುರ್ಣಗೊಂಡಿದೆ ಕೈಟ್‌ ಕಾಸರಗೋಡು ಆರಂಭಿಸಿರುವ ಯೂಟ್ಯೂಬ್‌ ಚಾನೆಲ್‌ ನಲ್ಲಿ ವಿಡಿಯೋ ತರಗತಿಗಳು ಲಭಿಸಲಿವೆ. ವಿಳಾಸ ww.youtube/c/kitekasaragod. ಈ ಚಾನೆಲ್‌ನ ಔಪಚಾರಿಕ ಉದ್ಘಾಟನೆ ಜೂ.17ರಂದು ನಡೆಯಲಿದ್ದು, ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ಚಾಲನೆ ನೀಡುವರು. ತದನಂತರ ಪ್ರಸಾರ ಆರಂಭಗೊಳ್ಳಲಿದೆ.

ಪ್ರೌಢಶಾಲಾ ವಿಭಾಗದಲ್ಲಿ ಪ್ರತಿ ತರಗತಿ ತಲಾ ಎರಡು ವಿಷಯಗಳಲ್ಲಿ ಪ್ರಸಾರಗೊಳ್ಳಲಿದೆ. ಪ್ರಾಥಮಿಕ ವಿಭಾಗದಲ್ಲಿ ದಿನ ಬಿಟ್ಟು ದಿನ ಹಿರಿಯ ಪ್ರಾಥಮಿಕ, ಕಿರಿಯ ಪ್ರಾಥಮಿಕ ತರಗತಿಗಳ ವಿಷಯಗಳು ಪರ್ಯಾಯ ವ್ಯವಸ್ಥೆಯಲ್ಲಿ ಪ್ರಸಾರವಾಗಲಿವೆ. ಈ ಸಂಬಂಧ ಅಗತ್ಯವಿರುವ ವೀಡಿಯೋ ತರಗತಿಗಳ ನಿರ್ಮಾಣ (ಚಿತ್ರೀಕರಣ) ಕೈಟ್‌ನ ಕಾಸರಗೋಡು ಜಿಲ್ಲಾ ಕಚೇರಿಯಲ್ಲಿ ನಡೆಯುತ್ತಿದೆ.