ಗೋಡೌನ್ ಗೆ ಬೆಂಕಿ; ಸುಟ್ಟು ಹೋಯ್ತು ಆರು ಕಾರು, ಏಳು ಬೈಕ್: ಅವಘಡಕ್ಕೆ ಪಟಾಕಿ ಕಾರಣ?

ಮುಂಬೈ: ಗೋಡೌನ್‌ ನಲ್ಲಿ ಭಾರಿ ಬೆಂಕಿ ಕಾಣಿಸಿಕೊಂಡು ಸಮೀಪದ ನಿಲ್ಲಿಸಿದ್ದ ಆರು ಕಾರುಗಳು ಮತ್ತು ಏಳು ಬೈಕ್‌ ಗಳು ಸೇರಿದಂತೆ ಕನಿಷ್ಠ 14 ವಾಹನಗಳು ಸುಟ್ಟು ಭಸ್ಮವಾದ ಘಟನೆ ಅ.26 ರಂದು ಮುಂಬೈನ ಗಿರ್ಗಾಂವ್‌ ನಲ್ಲಿ ನಡೆದಿದೆ.

ವಾಹನಗಳು ಗೋಡೌನ್ ಹೊರಗೆ ನಿಂತಿದ್ದವು. ಜನರು ಬೆಂಕಿ ನಂದಿಸುವ ಮುನ್ನವೇ ವಾಹನಗಳಿಗೆ ಬೆಂಕಿ ಹೊತ್ತಿಕೊಂಡಿದೆ. ಆರು ಕಾರುಗಳು, ಏಳು ಬೈಕ್‌ ಗಳು ಮತ್ತು ಸ್ಕೂಟರ್‌ ಮತ್ತು ಒಂದು ಆಟೋರಿಕ್ಷಾಗೆ ಬೆಂಕಿ ತಾಗಿದೆ.

ಮಾರ್ಗ ಕಿರಿದಾದ ಕಾರಣ ಅಗ್ನಿಶಾಮಕ ದಳದ ವಾಹನಗಳು ಸ್ಥಳಕ್ಕೆ ಬರಲು ತಡವಾಯಿತು ಎಂದು ಸ್ಥಳೀಯರು ತಿಳಿಸಿದ್ದಾರೆ. ಆದರೂ ಐದು ಅಗ್ನಿಶಾಮಕ ಟ್ಯಾಂಕರ್‌ ಗಳ ಸಹಾಯದಿಂದ ಬೆಂಕಿಯನ್ನು ಹತೋಟಿಗೆ ತರಲಾಯಿತು.

ಇದನ್ನೂ ಓದಿ:ಧೂಳಖೇಡ ಬಳಿ ಭೀಕರ ಅಪಘಾತ: ಯಾತ್ರೆಗೆ ತೆರಳುತ್ತಿದ್ದ ದಂಪತಿ ಸಾವು

ಘಟನೆಯಲ್ಲಿ ಯಾರೂ ಗಾಯಗೊಂಡಿಲ್ಲ ಎಂದು ವರದಿಯಾಗಿದೆ. ಹಲವು ವರ್ಷಗಳಿಂದ ಗೋದಾಮು ಮುಚ್ಚಿದ್ದು, ಬೆಂಕಿ ಹೊತ್ತಿಕೊಂಡಿದ್ದು ಹೇಗೆ ಎಂಬ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ. ಪಟಾಕಿಗಳೂ ಬೆಂಕಿಗೆ ಕಾರಣವಾಗಿರಬಹುದು ಎಂದು ವರದಿಯಾಗಿದೆ.