ಬೆಂಕಿ ತಗುಲಿ ಅತ್ತೆ, ಸೊಸೆ ಸಾವು

ತುಮಕೂರು: ಆಕಸ್ಮಿಕ ಬೆಂಕಿ ತಗುಲಿ ಅತ್ತೆ, ಸೊಸೆ ಮೃತಪಟ್ಟಿರುವ ಘಟನೆ ಗ್ರಾಮಾಂತರ ಪೊಲೀಸ್‌ ಠಾಣಾ ವ್ಯಾಪ್ತಿಯ ಗಂಗಸಂದ್ರದಲ್ಲಿ ಶನಿವಾರ ಸಂಭವಿಸಿದೆ. ಗಂಗಸಂದ್ರ ಗ್ರಾಮದ ಪಾರ್ವತಮ್ಮ (75) ಮತ್ತು ರಾಜೇಶ್ವರಿ (45) ಮೃತಪಟ್ಟವರು. ಕಸಬಾ ಹೋಬಳಿ ಗಂಗಸಂದ್ರ ಗ್ರಾಮದಲ್ಲಿ ಪಾರ್ವತಮ್ಮ, ಮಗ ಕುಮಾರಪ್ಪ, ಸೊಸೆ ರಾಜೇಶ್ವರಿ, ಮೊಮ್ಮಗ ಸುನೀಲ್‌ಕುಮಾರ್‌ ವಾಸವಿದ್ದರು.

ಕುಮಾರಪ್ಪ ಪೇಂಟಿಂಗ್‌ ಕೆಲಸಕ್ಕೆ ತೆರಳಿದ್ದರು. ಪಾರ್ವತಮ್ಮ ಓಡಾಡಲು ಆಗದ ಕಾರಣ ಸೊಸೆ ರಾಜೇಶ್ವರಿ ಬಿಸಿ ನೀರು ಕಾಯಿಸಲು ಹಂಡೆ ಒಲೆಗೆ ಉರಿ ಹಾಕುತ್ತಿದ್ದರು. ಆಗ ಸೀಮೆಎಣ್ಣೆ ಬುಟ್ಟಿಯ ಬೆಂಕಿ ರಾಜೇಶ್ವರಿಯ ಸೀರೆಗೆ ತಗುಲಿತು. ಅಲ್ಲೇ ಇದ್ದ ಅತ್ತೆ ಪಾರ್ವತಮ್ಮನಿಗೂ ಬೆಂಕಿ ಆವರಿಸಿಕೊಂಡು ಇಬ್ಬರೂ ಅಸುನೀಗಿದ್ದಾರೆ ಎಂದು ಕುಮಾರಪ್ಪ ಪೊಲೀಸರಿಗೆ ದೂರು ನೀಡಿದ್ದಾರೆ.