ರಾಂಚಿ : ಜಾರ್ಖಂಡ್‌ನ ಪ್ರಸಿದ್ಧ ಯೋಗ ಪಟು, ಶಿಕ್ಷಕಿ ರಾಫಿಯಾ ನಾಝ್ ಅವರಿಗೆ ಸ್ವಧರ್ಮೀಯರೇ ಜೀವ ಬೆದರಿಕೆ ಒಡ್ಡಿ ಫ‌ತ್ವಾ ಹೊರಡಿಸಿದ್ದಾರೆ.ಯೋಗ ಇಸ್ಲಾಂಗೆ ವಿರುದ್ಧವಾದುದ್ದು ನೀನು ತರಬೇತಿ ನೀಡುವುದನ್ನು ಮುಂದುವರಿಸಿದರೆ ಹತ್ಯೆಗೈಯುವುದಾಗಿ ಬೆದರಿಕೆ ಒಡ್ಡಲಾಗಿದೆ.
ವರದಿಯಾದಂತೆ, ಈ ವಿಚಾರವನ್ನು ಮುಖ್ಯಮಂತ್ರಿ ರಘುಬರ್‌ ದಾಸ್‌ ಅವರ ಸಂಸದೀಯ ಕಾರ್ಯದರ್ಶಿ ಸಂಜಯ್‌ ಕುಮಾರ್‌ ಅವರ ಗಮನಕ್ಕೆ ತರಲಾಗಿದ್ದು, ಇದೀಗ ನಾಝ್ಗೆ ಪೊಲೀಸ್‌ ಭದ್ರತೆ ಒದಗಿಸಲಾಗಿದೆ. ಓರ್ವ ಮಹಿಳಾ ಮತ್ತು ಓರ್ವ ಪುರುಷ ಸಿಬಂದಿ ಯನ್ನು ಭದ್ರತೆಗೆ ನಿಯೋಜಿಸಲಾಗಿದೆ.
ರಾಫಿನಾ ಅವರು ಕೆಲ ದಿನಗಳ ಹಿಂದೆ ಯೋಗ ಗುರು ಬಾಬಾ ರಾಮ್‌ ದೇವ್‌ ಅವರೊಂದಿಗೆ ವೇದಿಕೆಯಲ್ಲಿ ಕಾಣಿಸಿಕೊಂಡು ಕೆಲವರ ಕೆಂಗಣ್ಣಿಗೆ ಗುರಿಯಾಗಿದ್ದರು.
ಕೇವಲ ಯೋಗ ತರಬೇತಿಯಿಂದ ಪಡೆದ ಸಂಬಳದಿಂದ ರಾಫಿಯಾ ಅವರು ಕುಟುಂಬ ನಿರ್ವಹಿಸುತ್ತಿದ್ದು ಬೆದರಿಕೆಯ ನಡುವೆಯೂ ಯೋಗ ತರಬೇತಿ ನೀಡುವುದನ್ನು ಮುಂದುವರಿಸುತ್ತೇನೆ ಎಂದಿದ್ದಾರೆ.
‘ನನಗೆ ಎರಡೂ ಕಡೆಯಿಂದ ಬೆದರಿಕೆ ಇದ್ದು ಕೆಲವರು ಯೋಗ ತರಬೇತಿ ಮಾಡದಂತೆ ಬೆದರಿಕೆ ಹಾಕಿದರೆ, ಇನ್ನು ಕೆಲವರು ಹೆಸರು ಬದಲಾಯಿಸಲು ಹೇಳಿದ್ದಾರೆ. ನನ್ನ ಜೀವನದ ಕೊನೆಯವರೆಗೆ ಯೋಗ ಮಾಡುತ್ತೇನೆ’ ಎಂದು ವಿಶ್ವಾಸದ ನುಡಿಗಳನ್ನಾಡಿದ್ದಾರೆ.
