ಫಾಸ್ಟ್ಯಾಗ್; ತಲಪಾಡಿಯಲ್ಲಿ ಮಾತಿನ ಚಕಮಕಿ, ಬಸ್ ಸಂಚಾರಕ್ಕೆ ವಿನಾಯಿತಿ

ಉಳ್ಳಾಲ: ಫಾಸ್ಟಾಗ್ ಕಡ್ಡಾಯದ ಹಿನ್ನಲೆಯಲ್ಲಿ ಕರ್ನಾಟಕ- ಕೇರಳ ಗಡಿ ಭಾಗದ ತಲಪಾಡಿ ಟೋಲ್ ಗೇಟ್ ನಲ್ಲಿ ಸಮಸ್ಯೆಗಳಾಗಿದ್ದು ಇಂದಿನಿಂದ ಎರಡು ಲೇನ್ ವ್ಯವಸ್ಥೆ ಮಾಡಲಾಗಿದೆ.

ತಲಪಾಡಿ – ಮಂಗಳೂರು ನಡುವೆ ಸಂಚರಿಸುವ ಖಾಸಗಿ ಬಸ್ ಸಿಬ್ಬಂದಿ ಮತ್ತು ಟೋಲ್ ಸಿಬ್ಬಂದಿ ನಡುವೆ ಮಾತಿನ ಚಕಮಕಿ ನಡೆದಿದೆ. ನಂತರದ ಬೆಳವಣಿಗೆಯಲ್ಲಿ ಟೋಲ್ ಸಿಬ್ಬಂದಿ ಇಂದು ತಾತ್ಕಾಲಿಕವಾಗಿ ಬಸ್ ಸಂಚಾರಕ್ಕೆ ವಿನಾಯಿತಿ ನೀಡಿದರು.

ಈ ಹಿಂದೆ ತಲಪಾಡಿ – ಮಂಗಳೂರು ನಡುವೆ ಸಂಚರಿಸುವ ಖಾಸಗಿ ಬಸ್ ಗಳಿಗೆ ಇಲ್ಲಿ ಟೋಲ್ ವಿನಾಯತಿ ನೀಡಲಾಗಿತ್ತು. ಆದರೆ ಫಾಸ್ಟಾಗ್ ಕಡ್ಡಾಯದ ಬಳಿಕ ಈ ಬಸ್ ಗಳಿಗೂ ಸುಂಕ ಪಾವತಿ ಕಡ್ಡಾಯವಾಗಿದೆ.

ಕಡ್ಡಾಯ ಟೋಲ್ ಪಾವತಿಯಿಂದಾಗಿ ರವಿವಾರ ಮೇಲಿನ ತಲಪಾಡಿ ಮತ್ತು ಕೆಳಗಿನ ತಲಪಾಡಿಗೆ ಹೋಗುವ ಬಸ್ ಗಳು ಟೋಲ್ ಗೇಟ್ ಅನ್ನೇ ಲಾಸ್ಟ್ ಸ್ಟಾಪ್ ಮಾಡಿದ್ದರು. ಇದರಿಂದಾಗಿ ಪ್ರಯಾಣಿಕರು ಪರದಾಡಿದ್ದರು. ಹೀಗಾಗಿ ಇಂದು ಬೆಳಿಗ್ಗೆ ಪ್ರಯಾಣಿಕರು ಟೋಲ್ ಗೇಟ್ ವರೆಗೆ ನಡೆದುಕೊಂಡು ಬಂದು ಬಸ್ ಗಾಗಿ ಕಾದು ಕುಳಿತಿದ್ದರು.