600 ಕಿಲೋ ಮೀಟರ್ ಸೈಕಲ್ ಸವಾರಿ ಮೂಲಕ ನೆಚ್ಚಿನ ನಟನ ಭೇಟಿಗೆ ಬಂದ ಅಭಿಮಾನಿ!

ಗುವಾಹಟಿ: ನೆಚ್ಚಿನ ಸಿನಿಮಾ ನಟನನ್ನು ಭೇಟಿಯಾಗುವ ನಿಟ್ಟಿನಲ್ಲಿ ಅಸ್ಸಾಂನ ಜಾಗುನ್ ಪ್ರದೇಶದ ಅಭಿಮಾನಿಯೊಬ್ಬ ಬರೋಬ್ಬರಿ 600 ಕಿಲೋ ಮೀಟರ್ ದೂರದಲ್ಲಿರುವ ಗುವಾಹಟಿಗೆ ಆಗಮಿಸಿರುವ ಘಟನೆ ನಡೆದಿದೆ.

ಭೂಪೇನ್ ಲಿಕ್ಸನ್ (52) ಎಂಬವರು ತಮ್ಮ ಊರಾದ ಟಿನ್ ಸುಕೀಯಾದಿಂದ ಫೆಬ್ರುವರಿ 8ರಂದು ಸೈಕಲ್ ಸವಾರಿ ಮೂಲಕ ಹೊರಟು ಫೆ.13ರಂದು ಗುವಾಹಟಿ ತಲುಪಿದ್ದಾರೆ. ಗುವಾಹಟಿಯಲ್ಲಿ ನಡೆಯಲಿರುವ ಫಿಲ್ಮ್ ಫೇರ್ ಪ್ರಶಸ್ತಿ ವಿತರಣಾ ಸಮಾರಂಭಕ್ಕೆ ಬಾಲಿವುಡ್ ಸ್ಟಾರ್ ನಟ ಸಲ್ಮಾನ್ ಖಾನ್ ಆಗಮಿಸುತ್ತಿದ್ದು, ಅವರನ್ನು ಭೇಟಿಯಾಗುವ ಇಚ್ಛೆ ಲಿಕ್ಸನ್ ಅವರದ್ದು.

ಫೆ.8ರಂದು ಟಿನ್ ಸುಕೀಯಾದ ಜಾಗುನ್ ಪ್ರದೇಶದಿಂದ ಸೈಕಲ್ ಸವಾರಿ ಮೂಲಕ ಹೊರಟಿದ್ದು, ಸಲ್ಮಾನ್ ಖಾನ್ ಅವರನ್ನು ಭೇಟಿಯಾಗುವುದು ನನ್ನ ಉದ್ದೇಶ ಎಂದು ಭೂಪೇನ್ ತಿಳಿಸಿದ್ದಾರೆ. ಭೂಪೇನ್ ಈಗಾಗಲೇ 48 ಕಿಲೋ ಮೀಟರ್ ದೂರವನ್ನು ಹ್ಯಾಂಡಲ್ ಹಿಡಿಯದೇ ಕೇವಲ ಒಂದು ಗಂಟೆಯಲ್ಲಿ ಕ್ರಮಿಸುವ ಮೂಲಕ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್ ನಲ್ಲಿ ದಾಖಲೆ ಬರೆದಿದ್ದಾರೆ. ಫೆಬ್ರುವರಿ 15ರಂದು ಗುವಾಹಟಿಯಲ್ಲಿ ನಡೆಯಲಿರುವ ಫಿಲ್ಮ್ ಫೇರ್ ಅವಾರ್ಡ್ ಸಮಾರಂಭದಲ್ಲಿ ಸಲ್ಮಾನ್ ಖಾನ್ ಭಾಗವಹಿಸಲಿದ್ದಾರೆ ಎಂದು ವರದಿ ತಿಳಿಸಿದೆ.